ސްޕެނިޝް ލަލީގާގައި މިރޭ ރަށުން ބޭރުގައި 4-2 ގެ ނަތީޖާއަކުން އެސްޕަނިޔޯލް ބަލިކޮށް މުބާރާތުގެ ޗެމްޕިއަންކަން 27 ވަނަ ފަހަރަށް ބާސެލޯނާ އިން ހޯދައިފިއެވެ.

މިރޭގެ މެޗުގެ ފުރަތަަމަ ހާފުގައި ބާސެލޯނާ އިން ތިން ލަނޑުގެ ލީޑެއް ނެގިއިރު، އެޓީމުގެ ފުރަތަ ލަނޑު މެޗުގެ 11 ވަނަ މިނެޓުގައި ކާމިޔާބުކޮށްދިނީ ރޮބަޓް ލެވަންޑޮވްސްކީ އެވެ. މިއީ އެޓީމުގެ ޒުވާން ޑިފެންޑަރު އަލްޖެންޑްރޯ ބަލްޑޭ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ބާސެލޯނާގެ ދެވަނަ ލަނޑު މެޗުގެ 20 ވަނަ މިނެޓުގައި ޕެޑްރީ ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ އަލްޖެންޑްރޯ ބަލްޑޭ އެވެ. އަދި ފުރަތަަމަ ހާފު ނިމުމުގެ ކުރިން އެޓީމުގެ ތިންވަނަ ލަނޑު ކާމިޔާބުކޮށްދިނީ ވެސް ލެވަންޑޮވްސްކީ އެވެ. މިއީ އެޓީމުގެ ބްރެޒިލް ފޯވާޑް ރަފީންހާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މިއީ ލީގުގައި ކުޅުނު 30 މެޗުގައި އޭނާ ކާމިޔާބުކޮށްދިން 21 ވަނަ ލަނޑެވެ.

Advertisement

ދެވަަނަ ހާފުގެ 53 ވަނަ މިނެޓުގައި ބާސެލޯނާގެ ހަތަރު ވަނަ ލަނޑު ކާމިޔާބުކޮށްދިނީ އެޓީމުގެ ފްރާންސް ޑިފެންޑަރު ކުންޑޭއެވެ. މިއީ އެޓީމުގެ ނެދަލޭންޑްސް މިޑްފީލްޑަރު ފްރޭންކީ ޑި ޖޯން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުގައި އެސްޕަނިޔޯލްގެ ފުރަތަމަ ލަނޑު ދެވަނަ ހާފުގެ 73 ވަނަ މިނެޓުގައި ކާމިޔާބުކޮށްދިނީ އެޓީމުގެ ސްޕެނިޝް ފޯވާޑް ޖާވީ ޕުއާޑޯ އެވެ. އަދި މެޗުގެ އިތުރު ވަގުތުގެ ތެރޭގައި އެޓީމުގެ ދެވަަނަ ލަނޑު ކާމިޔާބުކޮށްދިނީ ތަޖުރިބާކާރު ފޯވާޑް ޖޯސެލޫ އެވެ. މިއީ މިސީޒަނުގައި ލީގުގައި އޭނާ ކާމިޔާބުކުރި 15 ވަނަ ލަނޑެވެ.

ލީގުގައި ކޮންމެ ޓީމަކަށް ބާކީ ހަތަރު މެޗު އޮތްއިރު، މިރޭގެ މެޗުން ލިބުނު ތިން ޕޮއިންޓާއެކު ބާސެލޯނާ އިން ލީގު ޗެމްޕިއަންކަން ކަށަވަރުކުރީ ލީގުގައި ކުޅުނު 34 މެޗުން 85 ޕޮއިންޓް ހަމަކޮށް ގެންނެވެ. ދެވަނައިގައި އޮތް ރެއާލް މެޑްރިޑަށް 34 މެޗު ކުޅެގެން 71 ޕޮއިންޓް ލިބިފައިވާއިރު، ބާކީ އޮތް ހަތަރު މެޗުން އެޓީމަށް އެންމެ ގިނަވެގެން ވެސް ހޯދޭނީ 83 ޕޮއިންޓެވެ.