ރާއްޖޭގައި ބާއްވާ އެންމެ ބޮޑު ރިސޯޓް ލީގު ފުޓްސަލް މުބާރާތުގެ ނޯތު މާލޭ ޒޯނުގެ ކުޅުން މިއަދު ހަވީރު ފެށިއިރު، ގުރޫޕް "އޭ" ގައި ވަން އެންޑް އޮންލީ ރީތިރަށާއި ވަރު ވާދަކުރި މެޗު 3-1 ގެ ނަތީޖާއަކުން ރީތިރަށް ކާމިޔާބުކޮށް މުބާރާތުގެ ފެށުން ރަނގަޅުކޮށްފި އެވެ.

ރިސޯޓް ލީގު 2023 ގެ ނޯތު މާލޭ ޒޯނުގައި މިއަހަރު 17 ޓީމެއް ބައިވެރިވެފައި ވާއިރު، މި ޒޯނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ހަތަރު ގުރޫޕަކަށް ބަހާލައިގެން ކޮންމެ ގްރޫޕަކުން ވެސް އެންމެ ރަގަޅު ނަތީޖާއެއް ހޯދާ ދެޓީމު ކުއާޓާ ފައިނަލަށް ހޮވޭގޮތަށެވެ. 

މި ގުރޫޕުގެ ހުރިހާ މެޗެއްވެސް ވަން އެންޑް އޮންލީ ރީތިރަށުގައި ކުޅުމަށް ހަމަޖެހިފައިވާއިރު، ގުރޫޕް "އޭ" ގައި ފަސް ޓީމު ހިމެނޭއިރު، އަނެއް ތިން ގުރޫޕްގެ ތެރެއިިން ކޮންމެ ގުރޫޕެއްގައި ހިމެނެނީ ހަތަރު ޓީމެވެ.

މިއަދު ހަވީރު ކުޅެވުނު ފުރަތަަމަ މެޗުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި މެޗުގައި ފުރަތަަމަ ލަނޑުޖަހައި ކުރިހޯދީ ވަން އެންޑް އޮންލީ ރީތިރަށުންނެވެ. މިލަނޑު ފުރަތަަމަ ހާފުގެ 06 ވަނަ މިނެޓުގައި ކާމިޔާބުކޮށްދިނީ އެޓީމުގެ ޖޯޒީ ނަންބަރު 11 އަބްދުﷲ އެވެ.  ވަރު ޓީމުން މެޗުގެ ނަތީޖާ އެއްވަރުކުރި ލަނޑު ފުރަތަމަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ޖޯޒީ ނަންބަރު 07 އަހުމަދު އެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

ދެވަަނަ ހާފުގެ 10 ވަަނަ މިނެޓުގައި ވަން އެންޑް އޮންލީ ރީތިރަށުން ލަނޑެއް ކާމިޔާބުކޮށް ދެވަަނަ ފަހަރަށް މި މެޗުގައި ލީޑު ނެގިއެވެ. މި ލަނޑު އެޓީމަށް ކާމިޔާބުކޮށްދިނީ ޖޯޒީ ނަންބަރު 10 ގާސިމް އެވެ. އަދި މެޗުގެ އެންމެ ފަހު ވަގުތުކޮޅުގެ ތެރޭގައި އެޓީމުގެ ލީޑު ފުޅާކޮށްދިނީ މުހައްމަދު ނާފިއު އެވެ. 

މި މެޗުގެ މޭން އޮފް ދަ މެޗަކަށް ހޮވުނީ ވަން އެންޑް އޮންލީ ރީތިރަށުގެ ޖޯޒީ ނަންބަރު 11 އަބްދުﷲ އެވެ.

މި މުބާރާތުގެ މެއިން ސްޕޮންސަރަކީ ބީއެމްއެލް އިސްލާމިކް، ފަހިޕޭ، އެހީ ޖަމްޢިއްޔާ، މެޓްކޮމް ޕްރައިވެޓް ލިމިޓެޑް، އިންޓަނޭޝަނަލް އެއިޑް ކެމްޕެއިން، ޓްރިޕްވެރިން، ޖޯޒީ އެމްވީ، އުރިދޫ މޯލްޑިވްސް، މެރިން މާސްޓާރސް، ސޮނީ ސްޕޯޓްސް، ދޮންދީނާގެ އިތުރުން ޔަމަހާ އެވެ. އަދި މުބާރާތުގެ އޮފިޝަލް މީޑިއާ ޕާޓްނަރަކީ ވޮއިސް އެވެ.