5 ޖުޑިޝަލް ދާއިރާއެއްގެ، އިސްމެޖިސްޓްރޭޓް ކަމަށް 5 ބޭފުޅުން އައްޔަނުކޮށް ފަތްކޮޅު އަރުވައިފިއެވެ.

މި 5 ބޭފުޅުންނަށް ފަތްކޮޅު އަރުވައިފައިވަނީ ޖުޑިޝަލް ސާވިސް ކޮމިޝަންގައި ބޭއްވުނު ރަސްމިއްޔަތެއްގައެވެ. އެބޭފުޅުންނަށް ފަތްކޮޅު އަރުވައިފައިވަނީ ކޮމިޝަނުގެ ރައީސް ޙިސާން ހުސައިންއެވެ.

އެގޮތުން، ށ. ޖުޑީޝަލް ދާއިރާއަށް ޢައްޔަންކޮށް ފަތްކޮޅު އަރުވައިފައިވަނީ  ށ.މިލަންދޫ، ކެތީހައުސް، އަލްއުސްތާޛު ޙަސަން ޝިޔާމްއެވެ. އަލްއުސްތާޛު ޙަސަން ޝިޔާމް މި މަގާމަށް އައްޔަނު ކުރެވުމުގެ ކުރިން ހުންނެވީ ށ.މިލަންދޫ މެޖިސްޓްރޭޓް ކޯޓުގެ އިސްމެޖިސްޓްރޭޓްގެ މަޤާމުގައެވެ. ޝިޔާމް ފަނޑިޔަރެއްގެ ގޮތުގައި އައްޔަނު ކުރެވިފައިވަނީ 2010 މޭ 30 ވަނަ ދުވަހުއެވެ.

މިއަދު ފަތް ކޮޅުއެރުވުނު އަނެއް ބޭފުޅަކީ 1996 ފެބްރުއަރީ 13 ވަނަ ދުވަހު ފަނޑިޔާރުކަމަށް ޢައްޔަންކުރެވުނު ނ.ޅޮހީ، ސަންޝައިން، އަލްއުސްތާޛު އަޙްމަދު ޙަސަން މަނިކުއެވެ. އޭނާ އައްޔަނު ކުރައްވާފައިވަނީ ނ. ޖުޑީޝަލް ދާއިރާގެ އިސްމެޖިސްޓްރޭޓްކަމަށެވެ. ދާއިރާގެ އިސްމެޖިސްޓްރޭޓްކަމަށް ޢައްޔަންކުރެވުނުއިރު އަލްއުސްތާޛު އަޙްމަދު ޙަސަން ހުންނެވީ ނ.ޅޮހީ މެޖިސްޓްރޭޓް ކޯޓުގެ އިސްމެޖިސްޓްރޭޓްގެ މަޤާމުގައެވެ.

ބ.ޖުޑީޝަލް ދާއިރާގެ އިސްމެޖިސްޓްރޭޓްކަމަށް ކޮމިޝަނުން ޢައްޔަންކުރުމަށް ނިންމަވާ ފަތްކޮޅު އަރުވާފައިވަނީ ބ.މާޅޮސް، ނަފާޕެލަސް، އަލްއުސްތާޛު ޢަބްދުއްރަޝީދު ޔޫސުފްއަށެވެ.  އެބޭފުޅާއަކީ 1995 އިން 1998 އަށް ފަނޑިޔާރުކަން ކުރެއްވައި، މަގާމުން ދުރުވެވަޑައި ގަތުމަަށްފަހު، 2013 ޖަނަވަރީ 08 ވަނަ ދުވަހު އަލުން ފަނޑިޔާރުކަމަށް ޢައްޔަންކުރެވިފައިވާ ބޭފުޅެކެވެ. މަޤާމަށް އައްޔަނުކުރެއްވުމުގެ ކުރިން މި ބޭފުޅާ ހުންނެވީ ބ.މާޅޮހު މެޖިސްޓްރޭޓް ކޯޓުގެ އިސްމެޖިސްޓްރޭޓްގެ މަޤާމުގައެވެ.

މީގެ އިތުރުން މިއަދު ފަތް ކޮޅު އަރުވައިފައިވަނީ ބ.ކިހާދޫ، ގާރޑެނިޔާވިލާ، އަލްއުސްތާޛު ޢަލީ ނަޞީރުއަަށެވެ. ނަޞީރު އައްޔަނު ކުރައްވާފައިވަނީ ވ.ޖުޑީޝަލް ދާއިރާގެ އިސްމެޖިސްޓްރޭޓްކަމަށެވެ.  މީގެ ކުރިން ވ.ފެލިދޫ މެޖިސްޓްރޭޓް ކޯޓުގެ މެޖިސްޓްރޭޓްކަމުގައި ހުންނެވި  ނަޞީރުއަކީ 1994 އޮކްޓޫބަރު މަހުގެ 09 ވަނަ ދުވަހު ފަނޑިޔާރުކަމަށް ޢައްޔަންކުރެވުނު ބޭފުޅެކެވެ.  

މ.ޖުޑީޝަލް ދާއިރާގެ އިސްމެޖިސްޓްރޭޓްކަމަށް ޢައްޔަންކޮށް ފަތްކޮޅު އަރުވައިފައިވަނީ މ.ކޮޅުފުށި، ލިލީމާގެ، އަލްއުސްތާޛު އަޙްމަދު ނަޖީބު އަށެވެ. މި މަޤާމަށް އައްޔަނު ވުމުގެ ކުރިން  ނަޖީބު ހުންނެވީ މ.ކޮޅުފުށީ މެޖިސްޓްރޭޓް ކޯޓުގެ މެޖިސްޓްރޭޓްއެއްގެ ގޮތުގައެވެ. އަލްއުސްތާޛު އަޙްމަދު ނަޖީބު ފަނޑިޔާރުކަމަށް ޢައްޔަންކުރެވިފައިވަނީ، 2003 މާރިޗު 23 ވަނަ ދުވަހުއެވެ.