ރާއްޖޭގައި ބާއްވާ އެންމެ ބޮޑު ރިސޯޓް ލީގު ފުޓްސަލް މުބާރާތުގެ ނޯތު މާލޭ ޒޯނުގެ ކުޅުން މިއަދު ހަވީރު ފެށިއިރު، ގުރޫޕް "އޭ" ގައި ހުވަފެން ފުއްޓާއި އޯގަ ވާދަކުރި މެޗު 5-5 ގެ ނަތީޖާއަކުން ދެޓީމު އެއްވަރުވެއްޖެ އެވެ.

ވަން އެންޑް އޮންލީ ރީތިރަށުގައި މިއަދު ހަވީރު ކުޅެވުނު މި މެޗުގެ ފުރަތަަމަ ހާފުގައި ހުވަފެން ފުށުން ހަތަރު ލަނޑު ކާމިޔާބުކުރި އިރު، މިހާފުގައި އޯގައަށް ކާމިޔާބުކުރެވުނީ އެންމެ ލަނޑެކެވެ.

މެޗު ފަށައިގެން ތިންވަނަ މިނެޓުގައި އޯގަ ޓީމުގެ ކީއްޕަރަށް އަނިޔާވެގެން ބަދަލުކުރަން ޖެހުނުއިރު، މި މެޗުގައި ފުރަތަަމަ ލަނޑުޖަހައި ކުރިހޯދީ ހުވަފެން ފުށިންނެވެ. މި ލަނޑު ފުރަތަމަ ހާފުގެ ހަތަރުވަނަ މިނެޓުގައި އެޓީމަށް ކާމިޔާބުކޮށްދިނީ ސާޖިދުއެވެ. އަދި އޭގެ ހަތަރު މިނެޓު ފަހުން އެޓީމުގެ ޝާހިލް ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

ހުވަފެން ފުށީގެ ތިން ލަނޑު ފުރަތަަމަ ހާފުގެ 13 ވަނަ މިނެޓުގައި އަތީދު ކާމިޔާބުކޮށްދިންއިރު، އެޓީމުގެ ހަތަރުވަނަ ލަނޑު 19 ވަނަ މިނެޓުގައި ކާމިޔާބުކޮށްދިނީ ޒައިން އެވެ. ފުރަތަަމަ ހާފުގައި އޯގަ އިން ކާމިޔާބުކުރި ހަމައެކަނި ލަނޑު އެންމެ ފަހުން މިނެޓުގައި ކާމިޔާބުކޮށްދިނީ އެޓީމުގެ ހުސެއިން ޝާފީއެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 4-1 ގެ ނަތީޖާއަކުން ހުވަފެންފުށި ކުރީގައި އޮވެގެންނެވެ.

ދެވަނަ ހާފު ފެށިގެން ފުރަތަަމަ މިނެޓުގައި ހުވަފެންފުށިން އެޓީމުގެ ފަސްވަނަ ލަނޑު ކާމިޔާބުކުރިއެވެ. މިލަނޑު އެޓީމަށް ކާމިޔާބުކޮށްދިނީ ސާޖިދުއެވެ. 5-1 ގެ ނަތީޖާއަކުން ހުވަފެންފުށި ކުރީގައި އޮއްވައި ފަހަތުން އަރައި އޯގަ އިން މެޗުގެ ނަތީޖާ އެއްވަރުކުރީ މެޗުގެ ފަހު 08 މިނެޓް ތެރޭގައި 04 ލަނޑު ކާމިޔާބުކޮށްގެންނެވެ.

ދެވަަނަ ހާފްގައި ވެހެމުންދިޔަ ބޯވާރޭގެ ތެރޭގައި އޯގައިގެ ދެވަނަ ލަނޑު މެޗުގެ 32 ވަނަ މިނެޓުގައި ކާމިޔާބުކޮށްދިނީ އެޓީމުގެ ޖޯޒީ ނަންބަރު 11 މުހައްމަދު އެވެ. އަދި އޭގެ ތިން މިނެޓު ފަހުން އެޓީމުގެ ތިންވަނަ ލަނޑު ކާމިޔާބުކޮށްދިނީ ހުސެއިން ޝާފީއެވެ. އަދި މެޗުގެ އެންމެ ފަހު ދެ މިނެޓު ތެރޭގައި އެޓީމުގެ ޖޯޒީ ނަމްބަރު 13 މުޚުތާރު ވަނީ ދެ ލަނޑު ކާމިޔާބުކޮށް އެޓީމަށް މެޗުގެ ނަތީޖާ އެއްވަރުކޮށްދީފައެވެ.

މިމެޗުގެ މޭން އޮފް ދަ މެޗަކަށް ހޮވިފައިވަނީ އޯގައިގެ ހުސެއިން ޝާފީއެވެ.