ރާއްޖޭގެ ޓޫރިޒަމް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް "ރިސޯޓް ލީގު 2023" ގެ އޮފިޝަލް ސަސްޓެއިނަބިލިޓީ ޕާޓްނަރަކަށް މެޓްކޮން ޕްރައިވެޓް ލިމިޓެޑް ހަމަޖައްސައިފިއެވެ.

މުބާރާތުގެ އޮފިޝަލް ސަސްޓެއިނަބިލިޓީ ޕާޓްނަރާއެކު ބޭއްވި ސޮއި ކުރުމުގެ ރަސްމިއްޔާތުގައި ބިގް ގޭމް މޯލްޑިވްސްގެ ފަރާތުން ސޮއިކުރެއްވީ ރިސޯޓް ލީގު 2023 ގެ ޕަބްލިކް ރިލޭޝަން އިސްމާއިލް މުފީދު (ބިއްލެ) އެވެ. މެޓްކޮން ޕްރައިވެޓް ލިމިޓެޑްގެ ފަރާތުން ސޮއިކުރެއްވީ ޑައިރެކްޓަރ އޮފް ފައިނޭންސް އަބްދުﷲ މިއުވާން ޝަރީފް އެވެ.

ވޮއިސް އަށް މައުލޫމާތު ދެއްވަމުން މެޓްކޮން ގެ ޑައިރެކްޓަރ އޮފް ފައިނޭންސް އަބްދުﷲ މިއުވާން ޝަރީފް ވިދާޅުވީ މެޓްކޮމް އަކީ ދިވެހިރާއްޖޭގައި އިންޖިނިއަރިން ކޮންސަލްޓެންސީ ޚިދުމަތް ފޯރުކޮށްދިނުމުގެ މަގުސަދުގައި  2019 ވަނަ އަހަރު އުފެދިގެން އައި ކުންފުންޏެއް ކަމަށެވެ. އަދި މި ކުންފުނިން ދޭ މުހިންމު ޚިދުމަތްތަކުގެ ތެރޭގައި ރާއްޖޭގެ އެކިއެކި ރަށްތަކަށް ދިމާވާ ރަށް ގިރުމުގެ މައްސަލަތަކަށް ދާއިމީ ހައްލެއް ހޯދުމަށް ކުރަންޖެހޭ ދިރާސާތައް ކުރުމާއި، އެ ދިރާސާތަކުގެ އަލީގައި ރަށް ގިރުމުގެ މައްސަލަ ހައްލުކުރުމަށް ޑިޒައިންތައް ތައްޔާރުކުރުން ހިމެނެއެވެ.

މީގެއިތުރުން ރާއްޖޭގެ ރިސޯޓްތަކުގެ އުމްރާނީ ވަސީލަތްތަކުގެ ކޮންޑިޝަނަލް އެސެސްމަންޓް ތައްޔާރުކޮށް، މިފަދަ ތަންތަން މަރާމާތުކޮށް ދިގުމުއްދަތަކަށް ރައްކާތެރިކުރުމަށް ކުރެވިދާނެ ކަންތައްތަކުގެ ތަފްސީލް ރިޕޯޓް ތައްޔާރުކުމާއި، އެފަދަ ޕްރޮޖެކްޓްތައް އިމްޕްލިމެންޓް ކުރުމަށް ބޭނުންވާ ޕްރޮޖެކްޓް މެނޭޖްމަންޓް ކޮންސަލްޓެންސީ ދިނުން ހިމެނެއެވެ.

މެޓްކޮން އުފެއްދުމުގެ އެންމެ މުހިންމު އެއް މަގުސަދަކީ ރާއްޖޭގެ މީހުން ދިރިއުޅޭ ރަށްތަކާއި ރިސޯޓްތަކުގެ އުމްރާނީ ވަސީލަތްތަކާއި ގޮނޑުދޮށް ހިމާޔަތްކުރަން ކުރާ އެކި އެކި ވަގުތީ މަސައްކަތްތަކުގެ ބަދަލުގައި، މި މައްސަލަތަކަށް ތަޖުރިބާކާރު އިންޖީނިއަރުން މެދުވެރިކޮށް ދާއިމީ ހައްލެއް ހޯދައިދިނުމަކީ އަދި މިފަދަ މަސައްކަތްތަކުގެ ސަބަބުން ތިމާވެށްޓަށް ކުރާނޭދެވޭ އަސަރު ކުޑަކޮށް ބޭކާރު ޚަރަދުތައް ކުޑަކުރުން ހިމެނެއެވެ. 

އިތުރަށް ވާހަކަ ދައްކަވަމުން މިއުވާން ވިދާޅުވީ މެޓްކޮން ގެ އަމާޒަކީ މި ކުންފުނިން ހުށަހަޅާ ހައްލުތަކަކީ ތިމާވެއްޓާއި ރައްޓެހި ޚިދުމަތް ހޯދާފަރާތައް އެންމެ ފައިދާކުރުވަނިވި، އެންމެ އެކަށީގެންވާ ހައްލުކަމުގައި ވުމެވެ.