މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގެ ގުރޫޕް "ސީ" ގައި ރޭ ކުޅެވުނު މެޗުގައި 6-3 ގެ ނަތީޖާއަކުން ފުރަވެރި މޯލްޑިވްސް ބަލިކޮށް ގުރޫޕްގެ އެއްވަނަ ޖޯލިބީއިން ހޯދައިފިއެވެ.

މުބާރާތް ފެށުނުއިރު މި ގުރޫޕުގައި ތިން ޓީމު ހިމެނުނު ނަމަވެސް މި ގުރޫޕުގައި ހިމެނޭ ކޮއްޓެފަރު މުބާރާތުގެ ގަވާއިދާއި ޚިލާފަށް ޓީމު ލިސްޓުގައި ކުޅުންތެރިއަކު ހިމަނާފައި އޮތުމުން، މުބާރާތުގެ ހިންގާ ކޮމިޓީން އެމައްސަލައިގައި ނިންމި ނިންމުމާއި މެދު ހިތްހަމަނުޖެހި އެޓީމު ވަނީ މުބާރާތުން ވަކިވެފަ އެވެ.

ވުމާއެކު މިގުރޫޕްގައި ބާކީ އޮތް ދެޓީމުގެ ކޮއްޓެއްފަރާއެކު ކުޅެން އޮތް މެޗުން އެދެޓިމު މޮޅުވިކަމަށް ނިންމައި، ކޮންމެ ޓީމަކަށް ތިން ޕޮއިންޓާއެކު ފައިދާ ދެގޯލުވަނީ ދީފައެވެ. ގްރޫޕް "ސީ"ގައި ބާކީ އޮތް ދެޓީމު އޮޓެމެޓިކުން ކުއާޓާ ފައިނަލަށް ކޮލިފައިވެފައިވާއިރު، މި ގުރޫޕުގެ އެއްވަނަ ކަނޑައެޅުމަށް މި ދެޓީމުގެ މެދުގައި ވަނީ ދެ މެޗު ކުޅެފައެވެ.

Advertisement

ފުރަތަަމަ މެޗު 13-2 ތަފާތުބޮޑު ނަތީޖާއަކުން ޖޯލިބީއިން ކާމިޔާބުކުރި އިރު، ދެވަަނަ މެޗުން އެޓީމު ކާމިޔާބުކުރީ ވާދަވެރި ކުޅުމަކަށްފަހު 6-3 ގެ ނަތީޖާއަކުން ނެވެ.

މިރޭގެ މެޗުގައި ފުރަތަަމަ ލަނޑުޖަހައި ކުރިހޯދީ ޖޯލިބީއިން އެވެ. މިލަނޑު ފުރަތަމަ ހާފުގެ ފަސްވަނަ މިނެޓްގައި ކާމިޔާބުކޮށްދިނީ އެޓީމުގެ އަބްދުﷲ ހަނީފް އެވެ. އަދި އޭގެ ދެ މިނެޓު ފަހުން ހަނީފް ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. އަދި މި މެޗުގައި ޖޯލިބީއިންގެ ތިން ލަނޑު ފުރަތަމަ ހާފުގެ 13 ވަނަ މިނެޓުގައި ކާމިޔާބުކޮށްދީ އަބްދުﷲ ހަނީފް އޭނާގެ ހެޓްރިކް ފުރިހަމަކުރިއިރު، އޭގެ ދެ މިނެޓު ފަހުން އެޓީމުގެ ހަތަރުވަނަ ލަނޑު ކާމިޔާބުކޮށްދިނީ ވެސް ހަނީފް އެވެ.

ފުރަވެރި މޯލްޑިވްސް އިން މި މެޗުގައި ކާމިޔާބުކުރި ފުރަތަމަ ލަނޑު، ފުރަތަމަ ހާފުގެ ކުޅުން ނިމެން ހަތަރު މިނެޓަށް ވެފައި ވަނިކޮށް ކާމިޔާބުކޮށްދިނީ އެޓީމުގެ މުހައްމަދު ޝައުލާން އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 4-1 ގެ ނަތީޖާއަކުން ޖޯލިބީއިން ކުރީގައި އޮވެގެންނެވެ.

ފުރަތަަމަ ހާފުގައި ޖޯލިބީއިން އިން ފޮނުވާލި ގިނަ ހަމަލާތަކެއް ފުރަވެރި މޯލްޑިވްސް ގެ ކީއްޕަރު ދިފާއުކުރިއިރު، ދެވަަނަ ހާފުގެ ފުރަތަމަ މިނެޓުގައި ފުރަވެރި މޯލްޑިވްސް އިން ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރި އެވެ. މިލަނޑު އެޓީމަށް ކާމިޔާބުކޮށްދިނީ މުހައްމަދު ޝައުލާން އެވެ. އަދި އޭގެ ހަތަރު މިނެޓު ފަހުން ޝައުލާން ވަނީ އިތުރު ލަނޑެއް ކާމިޔާބުކޮށް މި މެޗުގައި އޭނާގެ ހެޓްރިކް ފުރިހަމަކޮށްފައެވެ.

ޖޯލިބީއިންގެ ފަސްވަނަ ލަނޑު ދެވަނަ ހާފުގެ 12 ވަނަ މިނެޓުގައި ކާމިޔާބުކޮށްދިނީ އެޓީމުގެ ހަސަން ސާދިން އެވެ. އަދި އެޓީމުގެ ފަހު ލަނޑު މެޗު ނިމެން ފަސް މިނެޓަށް ވެފައި ވަނިކޮށް ކާމިޔާބުކޮށްދިނީ ރުޝްދާން އަބްދުލް ޝުކޫރު އެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ ޖޯލިބީއިންގެ އަބްދުﷲ ހަނީފް އެވެ.