ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒެއިނާ އާދަމް، މަޖިލީހުގެ ރައީސް މުހައްމަދު ނަޝީދަށް މަޖިލީހުގެ ގަވާއިދުގައި ކަންކަން ކުރަން އޮންނަ ގޮތް ސާފުކޮށްދެއްވައިފިއެވެ. 

މަޖިލީހުގެ ދާއިިމީ ކޮމިޓީތަކަށް އެމްޑީޕީން އައްޔަންކޮށްފައިވާ މެމްބަރުންނަށް ބަދަލުތަކެއް ގެނެސްދިނުން އެދި އެ ޕާޓީން މަޖިލީހަށް ހުށަހެޅި ނަމަވެސް އެހުށަހެޅުމަށް އަމަލު ނުކުރާނެ ކަމަށް ނަޝީދު ވަނީ ވިދާޅުވެފަ އެވެ.

އެގޮތުން، ނަޝީދު މިއަދު މަޖިލީހުގެ ވަޓްއެޕް ގްރޫޕަށް ފޮނުވި މެސެޖެއްގައި ވިދާޅުވީ މަޖިލީހުގެ ރިޔާސަތުގައި އެމަނިކުފާނު އިންނަހާ ހިނދަކު މެންބަރުންގެ އެދުމާއި އަދި ރުހުމާއި ނުލައި މަޖިލީހުގެ އެއްވެސް ކޮމެޓީއަކުން އެއްވެސް މެންބަރަކު ވަކިނުކުރެވޭނެ ކަމަށެވެ. އަދި "މަޖިލީހަކީ ރައީސުލްޖުމްހޫރިއްޔާ އެދިވަޑައިގަންނަވާ ގޮތައް ހިންގަވަން އޮންނަތަނެއް ނޫން" ކަމަށްވެސް ނަޝީދު ވިދާޅުވިއެވެ.

ނަޝީދުގެ އެވާހަކަތަކަށް ފާޑުވިދާޅުވެ ރޮޒައިނާ ކުރެއްވި ޓްވީޓެއްގައި ވިދާޅުވީ، މަޖިލީހުގެ ގަވާއިދުގައި މަޖިލީހުގެ ކޮމިޓީތަކަށް މެންބަރުން ލުމާއި، ވަކިކުރުމަކީ، މަޖިލީހުގެ ރައީސް އަށް އޮންނަ ބާރެއް ނޫން ކަމަށާ، އެހެނެއް ކަމަކު އެއީ އެ މެންބަރަކު ހިމެނޭ ސިޔާސީ ޕާޓީއަށް އޮންނަ ބާރެއް ކަމަށެވެ.

މަޖިލީހުގެ ގަވާއިދުގައި އެކަން އޮންނަ ގޮތް ހާމަކުރާ ސަފްހާ ތަކުގެ ފޮޓޯ އާއިއެކު ކުރެއްވި އެ ޓުވީޓުގައި ރޮޒައިނާ އިތުރަށް ވިދާޅުވީ ކޮމިޓީތަކުން މެންބަރުން ވަކިކުރުމާއި ލުމުގައި އަމަލުކުރަންވީގޮތް އޭގައި ސާފުކޮށް އެނގެން އޮތް ކަމަށެވެ. 

މިއާއެކު އޭނާ ވަނީ ރައީސް ނަޝީދު އެހާ ހަޑިކޮށް ނޫޅުއްވުމަށް އެމަނިކުފާނުގެ އަރިހުން އެދިލައްވާފައެވެ. 

މަޖިލީހުގެ ގަވައިދުގައި ބުނެފައި އޮންނަނީ މަޖިލީހުގެ ކޮމެޓީތަކަށް މެންބަރުން ހުށަހަޅާނީ މެންބަރުން ނިސްބަތްވާ ޕާޓީތަކުގެ ޕާލިމެންޓްރީ ގްރޫޕްގެ ލީޑަރުން ކަމަށެވެ. މީގެ ކުރިން އަމަލު ކުރަމުން އަންނަ ގޮތަކީ ވެސް ޕީޖީ ލީޑަރު ކޮމެޓީއަކަށް ބަދަލެއް ގެންނަން އެދުމުން މަޖިލީހުގެ އިދާރާ އިން އެބަދަލު ގެނެސް، ޖަލްސާއެއްގައި ރިޔާސަތުން އެކަން އިއުލާން ކުރުމެވެ.

ނަޝީދުގެ ފެކްޝަނަށް ނިސްބަތްވާ މެންބަރުންގެ ކޮމެޓީ ބަދަލު ކުރަން އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް ހުށަހެޅި ބަދަލުތަކުގެ ތެރޭގައި ހާރިޖީ ގުޅުންތަކުގެ ކޮމިޓީގައި ހިމެނިވަޑައިގަންނަވާ ވިލުފުށި ދާއިރާގެ މެމްބަރު، ހަސަން އަފީފުގެ ކޮމެޓީން ވަކިކުރުމަށާއި އާންމު ކޮމިޓީއަށް ކުޅުދުއްފުށި އުތުރު ދާއިރާގެ މެމްބަރު، ޔާސިރު އަބްދުއްލަތީފް އައްޔަން ކުރުމަށާއި ޕެޓިޝަން ކޮމިޓީއަށް ވިލުފުށި ދާއިރާގެ މެމްބަރު، ހަސަން އަފީފާއި ހެންވޭރު ހުޅަނގު ދާއިރާގެ މެމްބަރު، ހަސަން ލަތީފު އައްޔަން ކުރުން ހިމެނެއެވެ.

ސްޓޭޓް އޯންޑު އެންޓަޕުރައިޒަސް ކޮމިޓީގައި ހިމެނިވަޑައިގަންނަވާ ހުޅުދޫ ދާއިރާގެ މެމްބަރު، އިލްޔާސް ލަބީބު ކޮމެޓީން ވަކިކުރުމަށާއި ޖުޑިޝަރީ ކޮމިޓީގައި ހިމެނިވަޑައިގަންނަވާ ހެންވޭރު ހުޅަނގު ދާއިރާގެ ދާއިރާގެ މެމްބަރު، ހަސަން ލަތީފު ކޮމެޓީން ވަކިކޮށް އިހަވަންދޫ ދާއިރާގެ މެމްބަރު، މުހައްމަދު ޝިފާއު އަދި މާފަންނު އުތުރު ދާއިރާގެ މެމްބަރު، އިމްތިޔާޒް ފަހުމީ ކޮމެޓީން ވަކިކޮށް ކޮމިޓީގައި މަރަދޫ ދާއިރާގެ މެމްބަރު، އިބްރާހިމް ޝަރީފް ހިމެނުމަށް ވެސް ވަނީ ހުށަހަޅާފައެވެ.

އޭގެ އިތުރުން އިޖްތިމާއީ ކޮމިޓީއަށް މާފަންނު އުތުރު ދާއިރާގެ މެމްބަރު، އިމްތިޔާޒް ފަހުމީ އައްޔަން ކުރުމަށާއި ސަލާމަތީ ހިދުމަތްތަކާ ބެހޭ ކޮމިޓީން ހުޅުދޫ ދާއިރާގެ މެމްބަރު، އިލްޔާސް ލަބީބު އާއި މެދު ހެންވޭރު ދާއިރާގެ މެމްބަރު، އަލީ އާޒިމް ވަކިކުރަން ވެސް އަސްލަމް ވަނީ ހުށަހަޅާފައެވެ.