ފޯޅަވަހީގެ ކަނޑުގެ ސަރަހައްދު ބައި ކުރި އިރު, ރާއްޖޭގެ ކަނޑުން ބައެއް ގެއްލިގެން ދިޔަ ކަމަށް ބުނާ މައްސަލާގައި ސަރުކާރާއި ދެކޮޅު ފަރާތްތަކާއި އެކު ސަރުކާރުން އާއްމު ބަހުސަކަށް ދިޔުމަށް ޢިލްމުވެރިންގެ ގުޅުމުން އެދިއްޖެއެވެ. 

‏އީ.އީ.ޒެޑް މައްސަލައިގައި ޢިލްމުވެރިންގެ ގުޅުމުގެ ފަރާތުން ކުރިއަށް ގެންދާ މަޢުލޫމާތު އެއްކުރުމުގެ ސިލްސިލާގެ ތެރެއިން ސަރުކާރަށް ހުށައަޅަން ހުރި ސުވާލުތައް ހުށައެޅުމަށާއި ރައީސުލްޖުމްހޫރިއްޔާއާއި ހިއްސާކުރަން ހުރި ކަންބޮޑުވުންތައް ހިއްސާކުރުމަށް ޓަކައި މިއަދު އެމަނިކުފާނާ ވަނީ ބައްދަލު ކުރައްވާފައެވެ. 

އެކަމާއި ގުޅިގެން އިލްމުވެރިންގެ ގުޅުމުން ކުރި ޓުވީޓެއްގައި ބުނީ، ދޮޅުގަޑިއިރަށް ދެމިގެން ދިޔަ އެ ބައްދަލުމުގައި އެ ޖަމިއްޔާ ގެ ފަރާތުން ގިނަ ކަންކަން ހުށަހަޅާފައިވާ ކަމަށެވެ. 

އެގޮތުން ހުށަހެޅި ކަންކަމުގެ ތެރޭގައި؛

1) މޮރިޝަސްގެ ބޮޑުވަޒީރަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ފޮނުއްވި ސިޓީފުޅު 241 ކޮމިޓީއަށް ހިއްސާ ކުރުން.

2) ރާއްޖޭ ޚާއްޞަ އިޤްތިޞާދީ ސަރަޙައްދު ކަމަށް ޤާނޫނުގައި ބަޔާންކޮށްފައި ސަރަޙައްދާ މެދު، އިޓްލޮސްއިން ނިންމާފައިވާ ނިންމުން މުރާޖަޢާ ކުރުމަށް ހުށައެޅުން.

3) ޢިލްމުވެރިންގެ ގުޅުމުގެ އިސްނެގުމާއެކު، އީއީޒެޑް މައްސަލައިގައި ސަރުކާރުގެ މައުޤިފާ ދެކޮޅު ފަރާތްތަކާ އެކު ސަރުކާރުން ޕަބްލިކް ޑިބޭޓަކަށް (އާއްމު ބަހުސަކަށް) ގޮސްދެއްވުން.

ދިވެހިރާއްޖޭގެ ޚާއްޞަ އިޤްތިޞާދީ ސަރަހައްދުން ބޮޑު ބައެއް މުސްލިމް ނޫން ދައުލަތަކަށް ދިވެހި ސަރުކާރުން ދޫކޮށްލުމާ ގުޅިގެން ޢިލްމުވެރިންގެ ގުޅުމުގެ ފަރާތުން މަޝްވަރާ ބައްދަލުވުމެއް ބާއްވައިފައި ވާކަމަށް އެ ޖަމިއްޔާއިން މީގެ ކުރިން ވަނީ ހާމަކޮށްފައެވެ. 

އަދި އެ މައްސަލައިގައި ދީނީ ޢިލްމުވެރިންގެ ފަރާތުން ހުރި ކަންބޮޑުވުންތަކާ މެދު ވާހަކަ ދެއްކުމަށް އެޕޮއިންޓްމެންޓަށް އެދި ޢިލްމުވެރިންގެ ގުޅުމުން، ރައީސް އޮފީހުގެ އިތުރުން، މިނިސްޓްރީ އޮފް އިސްލާމިކް އެފެއަރޒް އަށާއި، އެޓާނީ ޖެނެރަލްގެ އޮފީހަށާއި ޚާރިޖީ ވުޒާރާއަށް ވެސް ވަނީ ހުށަހަޅާފައެވެ.