ވައްކަމާއި ކޮރަޕްޝަނަށް މި ސަރުކާރުން ދޭނެކަމަށް ބުނި "ޒީރޯ ޓޮލަރެންސް" ގެ ވާހަކަ ދެއްކުން ހުއްޓާލަން ޖެހުނީ ފެނަކަ ކުންފުނީގެ މެނޭޖިން ޑިރެކްޓަރު އަހުމަދު ސަޢީދުގެ ސަބަބުންކަމަށް ސްޓެލްކޯގެ ކުރީގެ މެނޭޖިން ޑިރެކްޓަރު އަދި އެންވަޔަރަމެންޓް މިނިސްޓްރީގެ ސްޓޭޓު މިނިސްޓަރު ޙަސަން މުޣުނީ ވިދާޅުވެއްޖެއެވެ.

މުޣުނީ މިފަދައިން ވިދާޅުވެފައި ވަނީ އޭނާ އަކީ މި ސަރުކާރުގެ އިސް މަޤާމެއްގައި ހުންނެވި އެންމެ ނާޤާބިލް ބޭފުޅާކަމަށް ވިދާޅުވެ ސައީދު ދެއްކެވި ވާހަކަތަކަށް ރައްދުދެއްވާ ކުރެއްވި ޓްވީޓެއްގަ އެވެ. 

ސައީދަށް ރައްދުދެއްވާ ކުރެއްވި އެ ޓްވީޓުގައި މުޣުނީ ވަނީ ފެނަކައިގެ އެމްޑީގެ މަޤާމަށް ސައީދު އައްޔަންކުރެއްވުމުގެ ކުރިން ސަރުކާރު ކުންފުނިތަކުގައި މަސައްކަތްކުރެއްވުމުގެ ތަޖުރިބާ އޮތް މިންވަރަކީ ކޮބައިކަން ވިދާޅުވެދެއްވުމަށާއި، މެނޭޖުމެންޓުގެ ދާއިރާއިން ސައީދުގެ އިލްމީ ފެންވަރަކީ ކޮބައިކަން ސާފުކޮށްދެއްވުމަށް އެދިވަޑައިގަންނަވާފަ އެވެ. 

ފެނަކަ އެމްޑީގެ މަޤާމާއި ހަވާލުވުމުގެ ކުރިން ސައީދު އަދާކުރެއްވި ހުރިހާ ވަޒީފާތަކުން ޚިޔާނާތުގެ ތުހުމަތުގައި ވަކިކުރެވިފައިވާ ގޮތް ސާފުކޯށްދެއްވުމަށް ވެސް މުޣުނީ ވަނީ އެދިވަޑައިގަންނަވާފަ އެވެ. 

އޭގެ އިތުރުން މުޣުނީ ވިދާޅުވީ ސައީދު މިވަގުތު ހަވާލުވެވަޑައިގެން ހުންނެވި ފެނަކަ ކުންފުންޏަށް ތުހުމަތުކުރެވޭ ކޮރަޕްޝަންގެ ގިނަ މައްސަލަތަކަކާއި ގުޅޭގޮތުން އެސީސީއިން ބޮޑު ރިޕޯޓެއް އެކުލަވާލާ ރައީސް އޮފީހަށް ފޮނުވާފައިވާއިރު، އެ ކޮރަޕްޝަންތައް ރައީސަށް ދިފާއުކުރައްވަން ޖެހިވަޑައިގަތީ ސައީދު ލޮބީކުރައްވައިގެން ކަމަށެވެ. 

ކޮންމެ އިންތިޚާބަކާއި ދިމާކޮށް ފެނަކަ ކުންފުނިން އެތައް ވަޒީފާއެއް އުފައްދަމުންދާތީ، އަދި އޭގެ މަންފާ ރައީސް ކާމިޔާބުކުރައްވަން ބޭނުންފުޅުވާ އިންތިޚާބުތަކަށް ކުރަމުންދާތީ ރައީސް ވެސް ހުންނެވީ ކޮމްޕްރޮމައިސް ވެފައިވާކަމަށް ގާތް އެކުވެރިންގެ ގާތުގައި ވާހަކަފުޅު ދައްކަވާ ސަޅިބައިސާ ކަނޑަނީވެސް ސައީދުކަމަށް މުޣުނީ ވިދާޅުވި އެވެ. އަދި އެކަންކަން އޭނާއަށް ރަނގަޅަށް އެނގިވަޑައިގަންނަވާކަމަށް ވެސް ވިދާޅުވި އެވެ. 

މުޣުނީ ވިދާޅުވީ ސައީދުގެ ފަރާތުން ފެންނަމުންދާ އެފަދަ ކަންކަމުގެ ސަބަބުން މި ސަރުކާރުން "ޒީރޯ ކޮރަޕްޝަން" ޕޮލިސީގެ ވާހަކަ ދެއްކުންވެސް ހުއްޓާލަން ޖެހިފައިވާ ކަމަށެވެ. 

އެކަންކަން ފާހަގަކުރައްވާ މުޣުނީ ވަނީ ރައީސުލްޖުމްހޫރިއްޔާގެ ފަރާތްޕުޅުން، ނުވަތަ ރައީސް އޮފީހުން އަންގަން ޖެހޭ ކަންކަން އެންގުމަށް ތަރުޖަމާނެއް ހުންނެވިއިރު، ސައީދު އޭނާގެ މަސްއޫލިއްޔަތުތައް އަދާކުރެއްވުމަށް އިސްކަން ދެއްވުމަށް އެދިވަޑައިގަންނަވާފަ އެވެ. 

ފެނަކަ ކުންފުނިން މިހާރުވެސް ކުދި ވިޔަފާރިތަކަށް ދައްކަން ޖެހިފައިވާ 1.9 ބިލިއަން ރުފިޔާ އޮތްއިރު، ބަނގުރޫޓުވަމުންދާ ކުޑި ވިޔަފާރިތަކަށް ނުދީ ހުރި ފައިސާ ދެއްކުން ކިހެނެއްވާނެތޯ އައްސަވާ މުޣުނީ ވަނީ ސައީދަށް ސުވާލު ކުރައްވާފަ އެވެ.