މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގެ ގުރޫޕް "އޭ" ގައި މިރޭ 8-1 ގެ ނަތީޖާއަކުން ކޮތައިފަރު ބަލިކޮށް ގުރޫޕްގެ އެއްވަނަ ޓީމުގެ ގޮތުގައި ދިގަލި މޯލްޑިވްސް މުބާރާތުގެ ކުއާޓާ ފައިނަލުގެ ޖާގައެއް ކަށަވަރުކޮށްފިއެވެ.

މިރޭގެ މެޗުގެ ފުރަތަަމަ ހާފުގައި ދިގަލި މޯލްޑިވްސް އިން ދެ ލަނޑުގެ ލީޑެއް ނެގިއިރު، އެޓީމުގެ ފުރަތަމަ ލަނޑު މެޗުގެ 06 ވަނަ މިނެޓުގައި ކާމިޔާބުކޮށްދިނީ އަބްދުﷲ ނަބީހް އެވެ. އަދި އެޓީމުގެ ދެވަަނަ ލަނޑު ފުރަތަމަ ހާފުގެ އެންމެ ފަހު މިނެޓްގައި ކާމިޔާބުކޮށްދިނީ އަހުމަދު ފިރުޝާން އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ދިގަލި މޯލްޑިވްސް ކުރީގައި އޮވެގެންނެވެ.

މިރޭގެ މެޗުން މޮޅުވެ ގުރޫޕް އެއްވަނަ މަގާމު ހޯދުމުގެ ފުރުސަތު އޮތް ދިގަލި މޯލްޑިވްސްއިން ވަނީ ދެވަނަ ހާފުގައި އިތުރު 06 ލަނޑު ކާމިޔާބުކޮށްފައެވެ. ދެވަަނަ ހާފުގައި އެޓީމުގެ އަހުމަދު ފިރުޝާން، މުހައްމަދު އިރުޝާމް، ސިނާން އަބްދުލް ޣަނީ، އަހުމަދު ހިލްމީ އަދި އިސްމާއީލް ރަފްހާން މިއިން ކޮންމެ ކުޅުންތެރިއެއް އެއް ލަނޑު ކާމިޔާބުކުރިއިރު، ކޮތައިފަރުގެ ގުސައްޔު އަތުން ބައިކޮޅަށް ވަނީ އެއް ލަނޑު ވަދެފައިވެ.

Advertisement

މި މެޗުގައި ކޮތައިފަރުގެ ޓީމުން ކާމިޔާބުކުރި ހަމައެކަނި ލަނޑު މެޗު ނިމެން ދެ މިނިޓަށްވެފައި ވަނިކޮށް ކާމިޔާބުކޮށްދިނީ އެޓީމުގެ މުހައްމަދު ޒަޔާން އެވެ. މިއާއެކު މެޗުގެ ކުޅުން ނިމިގެންދިޔައީ 8-1 ގެ ނަތީޖާއަކުން ދިގަލި މޯލްޑިވްސް މޮޅުވެގެންނެވެ.

މި މެޗުގެ މޭން އޮފް ދަ މެޗަކަށް ހޮވުނީ ދިގަލި މޯލްޑިވްސްގެ މުހައްމަދު އިރުޝާމްއެވެ.

މި މެޗުން ލިބުނު ތިން ޕޮއިންޓާއެކު ކުޅުނު ތިން މެޗުން ދިގަލި މޯލްޑިވްސްއަށް 07 ޕޮއިންޓާއެކު ފައިދާ 12 ގޯލު ލިބިފައިވާއިރު، މި ގުރޫޕްގެ ދެވަނަ ލިބުނު ކޯރާކޯރާ އަށް ވެސް ދެ މެޗުން 07 ޕޮއިންޓް ލިބިފައިވާއިރު، އެޓީމަށް ލިބިފައިވަނީ ފައިދާ 03 ގޯލެވެ. މި ދެ ޓީމަށް ވެސް މުބާރާތުގެ ކުއާޓާ ފައިނަލުގެ ޖާގައެއް ކަށަވަރުވެފައިވާއިރު، މި ގުރޫޕްގެ ތިންވަނަ ލިބެނީ ކުޅުނު ތިން މެޗުން ތިން ޕޮއިންޓް ހޯދި ދަ ސްޓޭންޑާޑް އަށެވެ. އަދި ހަތަރު ޓީމު ހިމެނޭ މި ގުރޫޕްގެ ފުލަށް ދިޔައީ ކުޅުނު ތިން މެޗުން ވެސް ބަލިވި ކޮތައިފަރު އެވެ.

މި މުބާރާތުގެ ގްރޫޕް ސްޓޭޖުގެ މެޗުތައް ނިމިފައިވާ އިރު، މާދަމާރޭ 21:00 ގައި ކުޅޭ ގުރޫޕް "ޑީ" ގެ ޕްލޭއޮފްގައި ވާދަކުރާނީ ޔޫ އެންޑް މީ އާއި އާރަށެވެ. މި މެޗުން މޮޅުވާ ޓީމަކަށް މުބާރާތުގެ ކުއާޓާ ފައިނަލުގެ ފަހުޖާގަ ލިބޭއިރު، ކުއާޓާ ފައިނަލުގެ މެޗުތައް ކުޅުމަށް ހަމަޖެހިފައިވަނީ މިމަހުގެ 18 އަދި 19 ވަނަ ދުވަހުގެރޭ އެވެ.