އެމްޑީޕި އިން ވަކިވީ މާބޮޑު އުފަލަކާއި އެކު އެއް ނޫން ކަމަށް ރައްޔިތުންގެ މަޖިލީހުގެ ނައިބް ރައީސް އިވާ ޢަބްދުالله ވިދާޅުވެއްޖެއެވެ.
އީވާ މިހެން ވިދާޅުވީ އެމްޑީޕީ ތެރެއިން އުފެދިގެން އައި ފިކުރެއްގެ ދިރުމުން ބޭއްވި ނޫސްވެރިންގެ ބައްދަލުވުމެއްގައެެވެ. އެ ބައްދަލުވުމުގައި އީވާ ވަނީ ފިކުރެއްގެ ދިރުމުން އައު ސިޔާސީ ޕާޓީ އެއް އުފެއްދުމުގެ މަސައްކަތް ފަށައިފައިވާ ކަން އިއުލާން ކުރައްވާފައެވެ.
"އެމްޑީޕީ އިން އަޅުގަނޑުމެން މިވަކިވީ މާބޮޑު ހިތްހަމަޖެހުމަކާއި، މާބޮޑު އުފަލަކާއި އެކުއެއް ނޫން، އެނގިވަޑައިގަންނަވާނެ އަޅުގަނޑުމެން ކޮންމެ މީހަކީވެސް އެމްޑީޕީ އަށް ޓަކައި އެތައް މަސައްކަތް ތަކެއް ކޮށްދީފައިވާ ބައެއް، އެމްޑީޕީ އަކީ ރާއްޖޭގެ ސިޔާސީ މަޝްރަހަށާއި، ޤައުމުގެ މުސްތަޤްބަލް ބައްޓަން ކުރުމުގައި މުހިންމު މުއައްސަސާއެއް ކަމަށް ދެކިގެން ޕާޓީއަށް އެތައް މަސައްކަތެއް ކުރި ބައެއް އަޅުގަނޑުމެންނަކީ، އެގޮތުން ދެފަހަރު މަތިން ރާއްޖޭގެ ވެރިކަމަށް އެމްޑީޕީ ގެނައުމަށް ވެސް މަސައްކަތް ކުރެވިފައިވާނީ" ނޫސްވެރިންގެ ބައްދަލުވުމުގައި ވާހަކަ ދައްކަވަމުން އީވާ ވިދާޅުވިއެވެ.
އީވާ ވިދާޅުވީ ހިތާމަޔާއި އެކުވެސް މިޖެހުނީ ޕާޓީ އިން ވަކިވާން ކަމަށެވެ. އަދި ޕާޓީ އިން ވަކި ވަނީ އުއްމީދާއި ވެސް އެކުގައި ކަމަށެވެ.
އީވާ ވިދާޅުވީ އެބޭފުޅުން އުފައްދަން މަސައްކަތް ފަށައިފައިވާ ޕާޓީ އުފައްދައިގެން އަނެއްކާވެސް ދިވެހި ރާއްޖޭގެ މުސްތަޤްބަލަށާއި ޒުވާނުންނާއި ރާއްޖޭގެ ސިޔާސީ މުސްތަޤްބަލް ބިނާކުރުމުގެ ވަރަށް އުންމީދު ބޮޑު ކަމަށެވެ.
"އެމްޑީޕީ މެމްބަރުން މިއޮއްހާ ދުވަހު އެމްޑީޕީގަ ތިބީ އެމްޑީޕިގައި ޤަބޫލްކުރާ އަސާސްތަކެއް ހުރުމުގެ ސަބަބުން" އީވާ ވިދާޅުވިއެވެ.
އެގޮތުން ހެޔޮ ވެރިކަމެއް ކުރުމާއި، ވައްކަމާއި ދެކޮޅަަށް މަސައްކަތަ ކުރުމާއި، އިންސާނީ ހައްޤުތައް ކަށަވަރު ކުރުމާއި، ނޫސްވެރިކަމުގެ މިނިވަން ކަން ކަށަވަރު ކުރުމާއި، ދެފުއް ފެންނަ ހަމަހަމަ ތެދުވެރި އިޚްލާސްތެރި ވެރިކަމެއް ކުރުން އެއަސާސް ތަކުގައި ހިމެނޭކަމަށް އީވާ ވިދާޅުވިއެވެެ.
އީވާ ވިދާޅުވީ މިއަދުގެ އެމްޑީޕީ އަކީ އެ އަސާސްތަކުގެ މައްޗަށް އޮތް ޕާޓީ އެއް ނޫން ކަމަށާއި، އެމްޑީޕީ ވައްކަމުގެ ހާއްޔަކަށް ހަދައިފިކަމަށެވެ.
އެމްޑީޕީ އިން އެ އަސާސްތައް ދޫކޮށްލިޔަސް އެބޭފުޅުން އެ އަސާސްތަކާއި ދުރަށް ދާންނުޖެހޭ ކަމަށާއި، އެމްޑީޕީ އިން ވަކިވެ އަނެއްކާވެސް އެ އަސާސްތަކުގެ މައްޗަށް ބިނާވާ ޕާޓީއެެއް އުފެއްދުމަށް މަސައްކަތް ކުރާ ކަމަށް އީވާ ވިދާޅުވިއެވެ.
މިއަދުގެ ނޫސްވެރިންގެ ބައްދަލުވުމުގައި ރައީސް ނަޝީދާއި އެމަނިކުފާނަށް އަޅުއްވާފައިވާނެ ފިޔަވަޅު ތަކާއި ގުޅޭ ގޮތުން ކުރެވުނު ސުވާލުތަކަށް ޖަވާބު ނުދެއްވައި، އެމަނިކުފާނާއި ސުވާލު ކުރުމަށް އީވާ ވަނީ ވިދާޅުވެފައެވެ.
އެމްޑީޕީގެ 12 މެމްބަރަކު މިއަދު ޕާޓީ އިން ވަކިވިއިރު ފިކުރެއްގެ ދިރުން އުފެއްދެވި، ކުރީގެ ރައީސް ނަޝީދު ހުންނެވީ ޕާޓީގައެވެ.
Advertisement
This content is created and paid for by advertisers and does not involve Voice Journalists
