ޖޯކަކަށް ވާ ފަރާތްތައް ޖޯކު ޖެއްސެވިޔަސް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަކީ ރައީސް މުޙައްމަދު ނަޝީދު ނަގާ ކޮޅަށް ޖެއްސެވި ޕާޓީއެއް ކަމަށާއި، އެމަނިކުފާނާއި ނުލާ އެ ޕާޓީ ނޯންނާނެކަމަށް ޕާޓީން ވަކިވެވަޑައިގެންނެވި އެމްޑީޕީގެ ނައިބުރައީސް އަޙްމަދު ޝިފާޒު ވިދާޅުވެއްޖެ އެވެ.
ޝިފާޒު މިފަދައިން ވިދާޅުވެފައިވަނީ އެމްޑީޕީގައި ތިއްބެވި ރައީސް ނަޝީދުގެ ވަފާތެރި މެމްބަރުން ޕާޓީއިން ވަކިވެ އާ ސިޔާސީ ޕާޓީއެއް އުފައްދާނެކަން އިއުލާނުކުރުމަށް ބޭއްވި ޕްރެސް ކޮންފަރެންސްގައި ވާހަކަދައްކަވަމުން ނެވެ.
ނަޝީދަކީ އެމްޑީޕީގައި މިހާރުވެސް އެންމެ މަގުބޫލު އަދި އެންމެ ތާއީދުބޮޑު ބޭފުޅާކަމަށާއި، އެމަނިކުފާނަކީ އެމްޑީޕީ ނަގާ ކޮޅަށް ޖެއްސެވި ބޭފުޅާކަމާމެދު ސުވާލު އުފެއްދޭނެ އެއްވެސް ޖާގައެއް ނެތްކަމަށް ޝިފާޒު ވިދާޅުވި އެވެ.
"މުޅި ރާއްޖޭގެ ރައްޔިތުންނަށް.. މުޅި ދުނިޔެއަށް، ދުނިޔޭގެ ލީޑަރަކު ހުރިއްޔާ ދަންނަކަމެއް މީ ރައީސް ނަޝީދު ބިނާކޮށް، ރައީސް ނަޝީދާއި އެކީގައި އޮތް ޕާޓީއެއް.. އެމްޑީޕީއޭ ބުނީމަ ރައީސް ނަޝީދު.. މިދެން ތިބޭފުޅުންނަށް ޖޯކަކށް ވަންޏާ ވާންވީ"
އެމްޑީޕީގެ ކުރީގެ ނައިބުރައީސް އަޙްމަދު ޝިފާޒު
ޝިފާޒު ވިދާޅުވީ އެމްޑީޕީ ބައިބައިވާން ދިމާވި އެންމެ ބޮޑު ސަބަބަކީ ރައީސް ނަޝީދު ޕާޓީގެ ކަންކަމުން އެކަހެރިކޮށް ބާކީކޮށްލުން ކަމަށެވެ. އެފަދައިން އެކަން ކޮށްގެން ޕާޓީއަށް ލިބޭނެ އެއްވެސް ކުރިއެރުމެއް ފެނިވަޑައި ނުގަންނަވާކަމަށް އޭނާ ވިދާޅުވި އެވެ.
"އަޅުގަނޑު ދަންނަވަމުން ދިޔައިން ތި އެންމެ ބޭފުޅެއް ނޫނޭ ތި އެއްފަރާތް ކުރެވެނީ. ރީތިކޮށް އޮތް ޕާޓީއެކޭ ތި ފަޅާލަނީ. މި ޕާޓީ ފަޅާލައިގެން ވާ މޮޅެއް އަޅުގަނޑަކަށް ނުފެނެއޭ"
އެމްޑީޕީގެ ކުރީގެ ނައިބުރައީސް އަޙްމަދު ޝިފާޒު
ޝިފާޒު ވިދާޅުވީ ޕާޓީ ބައިނުކޮށް އެކީގައި މަސައްކަތް ކުރެވޭނެ ހުރިހާގޮތެއް މަގުފަހިކޮށްދީފައިވާނެ ކަމަށެވެ.
އެހެން ނަމަވެސް، ޕާޓީގެ މަސްލަހަތު އިސްނުކުރައްވާ ރައީސް ޞާލިހު ޕާޓީ ބައިކޮށްލާފައިވާކަމަށް ޝިފާޒު ވިދާޅުވިއެވެ. އޭނާ ވިދާޅުވީ އެމްޑީޕީ ބައިބައި ކުރުމަކީ އެއްވެސް ވެރިއަކަށް ކުރެވުނު ކަމެއް ނޫން ކަމަށެވެ.
އެހެން ނަމަވެސް މި ވެރިކަމާއި ހަމައިން އެކަން ބަދަލުކޮށް ޕާޓީއަށް ގެއްލުން ވިޔަސް ހެޔޮކަމަށް ޕާޓީ ބައިކުރީ ހަމަ އެނގިތިބެކަމަށް އޭނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
