ޔުއެފާ ޗެމްޕިއަންސްލީގުގެ ސެމީ ފައިނަލުގެ ދެވަަނަ ލެގުގައި މިރޭ ރަށުން ބޭރުގައި މެންޗެސްޓާ ސިޓީ އަތުން 4-0 ގެ ނަތީޖާއަކުން ބަލިވެ، ޗެމްޕިއަން ރެއާލް މެޑްރިޑް މުބާރާތުން ކަޓައިފި އެވެ.

ރެއާލްގެ ދަނޑުގައި ކުޅެވުނު ފުރަތަަމަ ލެގު 1-1 ގެ ނަތީޖާއަކުން ދެޓީމު އެއްވަރުވިއިރު، މިރޭގެ މެޗުގެ ނަތީޖާ އެކު މެންޗެސްޓާ ސިޓީއަށް މުބާރާތުގެ ފައިނަލުން ޖާގަ ލިބުނީ 5-1 ގެ އެގްރިގޭޓު ނަތީޖާއަކުން ނެވެ. އަދި މިއީ މެންޗެސްޓާ ސިޓީގެ ތާރީޚްގައި އެކުލަބު ޔޫރަޕުގެ އެންމެ ޝަރަފުވެރި މުބާރާތުގެ ފައިނަލުން ޖާގަ ހޯދި ދެވަނަ ފަހަރެވެ.

މިރޭގެ މެޗުގެ ފުރަތަަމަ ހާފުގައި ރެއާލް މެޑްރިޑުގެ ފަރާތުން ވަރަށް އާދައިގެ ކުޅުމެއް ފެނިގެންދިޔަ އިރު، މިހާފުގައި ގިނަވަގުތު ބޯޅަ އޮތީ މެޑްރިޑުގެ ފަހުގެ މެދަށްވުރެ ޕެނަލްޓީ އޭރިއާ އާއި ކައިރީގައެވެ. އަދި މިހާފުގައި މެންޗެސްޓާ ސިޓީ އިން ރެއާލްގެ ގޯލަށް ގިނަ ހަމަލާތަކެއް ފޮނުވާލާފައިވާ އިރު، މި ހާފުގައި އެޓީމުން ވަނީ ދެ ލަނޑުގެ ލީޑެއް ނަގާފައެވެ. މި ދެލަނޑުވެސް އެޓީމަށް ކާމިޔާބުކޮށްދިނީ ޕޯޗުގަލްގެ މިޑްފީލްޑަރު ބެނާޑޯ ސިލްވާ އެވެ.

Advertisement

ފުރަތަމަ ހާފުގައި ސިޓީގެ ނޯވޭ ފޯވާޑް ހާލަންޑް ފޮނުވާލި ނުރައްކާތެރި ތިން ހަމަލާއެއް ރެއާލްގެ ކީޕަރު ކޯޓުއާ ދިފާއުކުރިއިރު، މިހާފުގައި ސިޓީގެ ގޯލާއި އަމާޒުކޮށް ރެއާލްއަށް ފޮނުވާލެވުނީ އެންމެ ހަމަލާއެކެވެ. ސިޓީގެ ހާފުގެ މެދަށްވުރެ ޕެނަލްޓީ އޭރިއާ ކައިރިން ރެއާލްގެ ޖަރުމަނު މިޑްފީލްޑަރު ޓޯނީ ކްރޫސް ފޮނުވާލި ބާރު ހަމަލާ އަމާޒުވީ ސިޓީގެ ގޯލުގެ ބުރަށް ދަނޑިއަށެވެ.

ދެވަަނަ ހާފުގައި ރެއާލްއިން އެޓީމުގެ ކުޅުން ރަނގަޅުކޮށް ރަގަޅު ކުރިއަށްޖެހި ކުޅެމުން އަންނަނިކޮށް ސިޓީއިން އިތުރު ލަނޑެއް ކާމިޔާބުކޮށް ނަތީޖާގެ ފަރަގު ބޮޑުކުރި އެވެ. މިއީ ރެއާލްގެ ބްރެޒިލް ޑިފެންޑަރު މިލިޓޯއަތުން ބައިކޮޅަށް ވަން ގޯލެކެވެ.

މި މެޗުގައި މެންޗެސްޓާ ސިޓީ އިން ކާމިޔާބުކުރި ހަތަރުވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ދެވަަނަ ހާފުގެ ފަހު ވަގުތުކޮޅުގެ ތެރޭގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް އާޖެންޓީނާގެ ޒުވާން ފޯވާޑް ޖޫލިއަން އަލްވަރޭޒް އެވެ.

މުބާރާތުގެ ފައިނަލްގައި މެންޗެސްޓާ ސިޓީ ނުކުންނާނީ އިޓަލީގެ އިންޓަ މިލާނާއި ދެކޮޅަށެވެ.