މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގެ ޕްލޭއޮފްގައި 3-1 ގެ ނަތީޖާއަކުން އާރަށް ބަލިކޮށް މުބާރާތުގެ ކުއާޓާ ފައިނަލުގެ ފަހު ޖާގަ އެންމެ ފަހުގެ ރަނަރަޕް، ޔޫ އެންޑް މީ އިން ހޯދައިފިއެވެ

މުބާރާތުގެ ގުރޫޕް ސްޓޭޖުގައި މިދެޓީމު ވާދަކުރި މެޗު 2-1 ގެ ނަތީޖާއަކުން އާރަށް ކާމިޔާބުކުރި ނަމަވެސް، މިރޭގެ މެޗުގައި ޔޫ އެންޑް މީ ގެ ފަރާތުން ފެނިގެންދިޔައީ މުޅިން ތަފާތު ރޫހެކެވެ.

އަނިޔާގެ ސަބަބުން މުހިންމު ތިން ކުޅުންތެރިންނާއި ނުލައި އާރަށުން މި މެޗަށް ނުކުތްއިރު، މިރޭގެ މެޗުގެ ވަރަށް ކުރީކޮޅު ޔޫ އެންޑް މީ އިން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މި ލަނޑު މެޗު ފެށިގެން ތިންވަނަ މިނެޓުގައި ކާމިޔާބުކޮށްދިނީ އެޓީމުގެ ޖަޒުލާން އަބްދުﷲ އެވެ. ނަމަވެސް ފުރަތަމަ ހާފުގެ 10 ވަނަ މިނެޓުގައި އާރަށުން ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކުރި އެވެ މި ލަނޑު އެޓީމަށް ކާމިޔާބުކޮށްދިނީ އިރުޝާދު މުހައްމަދު އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެގެންނެވެ.

Advertisement

ދެވަަނަ ހާފު ފެށިގެން ފަސްވަނަ މިނެޓްގައި ޔޫ އެންޑް މީ އިން ލަނޑެއް ކާމިޔާބުކޮށް ދެވަނަ ފަހަރަށް މެޗުގެ ލީޑު ހޯދިއެވެ. މިއީ އާރަށުގެ ކީއްޕަރު އަބްދުﷲ އަށް ހެދުނު ގޯހެއްގެ ފައިދާ ނަގައި ޔޫ އެންޑް މީ ގެ ވިޝާހު ޝަރީފް ކާމިޔާބުކޮށްދިން ލަނޑެކެވެ. އަދި އޭގެ ހަތަރު މިނެޓު ފަހުން އެޓީމުގެ މުހައްމަދު ޝުހައިލް ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. މިއާއެކު މެޗުގެ ކުޅުން ނިމިގެންދިޔައީ 3-1 ގެ ނަތީޖާއަކުން ޔޫ އެންޑް މީ މޮޅުވެގެންނެވެ.

މުބާރާތުގެ ކުއާޓާ ފައިނަލުގެ މެޗުތައް މާދަމާރޭ ފަށާއިރު، 21:00 ގައި ފަށާ ފުރަތަމަ މެޗުގައި ވާދަކުރާނީ، ދިގަލި މޯލްޑިވްސް އާއި ކުޑަފުށި މޯލްޑިވްސް އެވެ. އަދި 22:00 ގައި ފަށާ ދެވަނަ މެޗުގައި ބައްދަލުކުރާނީ ޖޯލި މޯލްޑިވްސް އާއި ކޯރާކޯރާ މޯލްޑިވްސް އެވެ.