އެމްޑީޕީގެ މެންބަރުންގެ ގޮތުގައި ގިނަ ދުވަސްތަކެއް ވަންދެން މަސައްކަތް ކުރެއްވި މެންބަރުން ތަކެއް ޕާޓީ ދޫކޮށް، އަައު ޕާޓީއެއް އުފައްދަން ނިންމެވުމާއި ގުޅިގެން ޕާޓީން މެންބަރުން މަދުވި ނަމަވެސް، އެ މަދުވާ ވަރަށްވުރެ ގިނަ މެންބަރުން ހޯދޭނެ ކަމަށް އެ ޕާޓީގެ ޗެއާޕާސަން ފައްޔާޟް އިސްމާއިލް ވިދާޅުވެއްޖެއެވެ.
އެމްޑީޕީން ކުރިއަށް އޮތް ރިޔާސީ އިންތިހާބަށް ތައްޔާރު ވުމުގެ މަސައްކަތް މިހާރު ފަށާފައިވާއިރު، އެކަމަށްޓަކައި މާލެއިން 400, އަދި އަތޮޅު ތެރޭއިން 600 އެއްހާ މެންބަރުން މަސައްކަތް ކުރަމުންދާނެ ކަމަށް މިއަދު ބޭއްވި އެ ޕާޓީގެ ނޫސްވެރިންގެ ބައްދަލުވުމައި ވަނީ ހާމަކޮށްފައެވެ. އެގޮތުން، ރަށްރަށުގައި ޕާޓީގެ އެެ މެންބަރުން ކުރާނެ މައިގަނޑު މަސައްކަތަކީ މެނިފެސްޓޯ އެކުލަވައި ލުމަށް، އެއްކުރަންޖެހޭ މައުލޫމާތު އެއްކުރުމާއި، ޕާޓީއަށް މެންބަރުން އިތުރު ކުރުމުގެ މަސައްކަތް ކަމަށް ޕާޓީގެ ޗެއާޕާސަންގެ ނާއިބު އިބްރާހީމް ވަހީދު ވަނީ ވިދާޅުވެފަ އެވެ.
ޕާޓީން މެންބަރުން ވަކިވަމުންދާ މައްސަލައާއި ގުޅިގެން އިތުރަށް ވާހަކަ ދައްކަވަމުން ފައްޔާޟު ވިދާޅުވީ، އަދި މިހާތަނަށް ޕާޓީން ވަކިވާން އެދި މާ ގިނަ މެންބަރުންގެ ފޯމް ލިބިފައި ނުވާ ކަމަށެވެ. އެހެންނަމަވެސް، ރަނގަޅު އަދަދަކަށް މެންބަރުން ޕާޓީން ވަކިވެގެންދާނެ ކަމަށް ބެލެވޭ ކަމަށާ، އެ މެންބަރުންނަކީ ޕާޓީގެ މެންބަރުންގެ ގޮތުގައި ތިބޭނެ ކަމަށް މީގެ ކުރިންވެސް ބަލަމުންއައި މެންބަރުން ނޫން ކަމަށް ފައްޔާޟު ވިދާޅުވި އެވެ.
އަދިއެއް ވަކިވެގެން މާ ގިނަ މެންބަރުން ތަކެއްގެ ފޯމް އަޅުގަނޑުމެންނަށް ލިބިފައެއް ނެތް. އެހެން ނަމަވެސް އަޅުގަނޑު ގަބޫލުކުރާ ގޮތުގައި ހަމަ ރަނގަޅު އަދަދަކަށް ވަކިވާނެ. އެހެންނަމަވެސް، އެއީ އަޅުގަނޑުމެން ކުރިން ދެންނެވިހެން އަޅުގަނޑުމެންގެ ކަލްކިޔުލޭޝަންގައި އަޅުގަނޑުމެން ބަލަމުންއައި ނަންބަރެއް ނޫން އަޅުގަނޑުމެންނާއިއެކު ތިބޭނެ ކަމަކަށެއް.
އިރާދަފުޅު ކުރެއްވިއްޔާ އަޅުގަނޑުމެން މިހާރުވެސް ކުރަމުން މިދާ މަސައްކަތުން އަޅުގަނޑުމެން އިތުރު ބައިވަރު މެންބަރުން ތަކެއް ވައްދަމުން މިދަނީ. އެހެންވީމާ ނަންބަރަކަށްވެސް މާ ބޮޑު ބަދަލެއް ނާންނާނެ. އަދި ވަކިވެގެންދާ ނަންބަރަށްވުރެ އިތުރަށް އިރާދަފުޅު ކުރެއްވިއްޔާ އަޅުގަނޑުމެންނަށް ހޯދެމުން މިދަނީ. އަދި މި ދަތުރާއި އެކު އެކަން އިތުރަށް ވަރުގަދަ ވެގެންދާނެ ކަމަށް އަޅުގަނޑަށް ގަބޫލު ކުރެވޭ.
އެމްޑީޕީ ޗެއާޕާސަން ފައްޔާޟް އިސްމާއިލް
ފައްޔާޟް ގެ ވާހަކަތަކާއި ގުޅިގެން އިބްރާހީމް ވަހީދު ވެސް ވަނީ ފިކުރެއްގެ ދިރުން ފެކްޝަނުގެ މަޖިލިސް މެމްބަރުން އިސްތިއުފާ ދެއްވުމާއިއެކު ކޮންމެވެސް ވަރަކަށް މެންބަރުން ޕާޓީން ވަކިވެގެން ދާނެ ކަމަށް ގަބޫލުކުރެވޭ ކަމަށް ވިދާޅުވެފައެވެ. އެހެންނަމަވެސް، އެގޮތުގެ މަތިން ޕާޓީން ކެނޑޭ ކަމަށް ބުނާ ގިނަ މެންބަރުންނަކީ މީގެ ކުރިންވެސް އެޕާޓީގައި ތިބި މެންބަރުން ނޫން ކަމަށް އޭނާ ވިދާޅުވި އެވެ.
އެމްޑީޕީ ޗެއާޕާސަންގެ ނާއިބު އިބްރާހީމް ވަހީދު
މިއަދުވެސް އަޅުގަނޑު ދެކުނިން ހަމަ، ވަރަށް ރީތިކޮށް ޓުވީޓެއް ހަދާފައި ގުޑް ބައި އެމްޑީޕީ ޖަހާފައި އޮތް. އެމްޑީޕީ މެންބަރެއް ނޫން. އެމީހުން ކިތަންމެ ވަރަށް ކެނޑުނަސް އަޅުގަނޑުމެން އެއަށް ކުރާނެ ކަމެއް ނެތް.
އެމްޑީޕީ ޗެއާޕާސަންގެ ނާއިބު އިބްރާޙީމް ވަހީދު--
އިބްރާހީމް ވަހީދު ވިދާޅުވީ އެމްޑީޕީގެ މެންބަރުންގެ ރެޖިސްޓްރީން ބައެއް މެންބަރުން ވަކިވާނެ ކަމަށާ، އެހެންނަމަވެސް، ރެޖިސްޓްރީ ގައި ނެތް މެންބަރުން ލާ އެފަދަ ސިޓީތަކަށް ޖަވާބުވެސް ނުދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
