ހިޔާ ފްލެޓުން އެއްކޮށްލި ދެފްލެޓްގެ އެއްބަސްވުން ބާތިލްކޮށް 14 ދުވަހުގެ ތެރޭގައި އެ ދެފްލެޓް ހުސްކުރުމަށް އާބަންކޯއިން އެ ދެ ފްލެޓްގެ ވެރިންނަށް އަންގައިފިއެވެ.

ހިޔާ އިމާރާތެއްގެ ފްލެޓެއްގެ ފާރު ތަޅާލައި ދެ އެޕާޓްމެންޓް އެއްކޮށްލައިގެން ހަތަރު ކޮޓަރީގެ އެޕާޓްމެންޓަކަށް ހަދައިގެން އުޅެމުންދާކަން އެނގިގެން އާބަންކޯއިން ވަނީ، ކޮންމެ އެޕާޓްމެންޓެއް 100،000 ރުފިޔާއިން ޖޫރިމަނާކޮށް 10 ދުވަހުގެ ތެރޭގައި ފާރު އަލުން ރޭނުމަށް އެފަރާތައް އަންގައިފައެވެ.

އާބަންކޯގެ ޑިރެކްޓަރ އޮފް މާކެޓިންގ އެންޑް ޕަބްލިކް ރިލޭޝަންސް ނިއުޝާދު ޝަރީފް "ވޮއިސް" އަށް ވިދާޅުވީ އެ ފަރާތުން އެއްވެސް ވަރަކަށް ޖޫރިމަނާގެ ފައިސާ ދައްކާފައި ނުވާ ކަމަށެވެ. އަދި ދިން މުއްދަތުގެ ތެރޭގައި ފާރު ރޭނުމުގެ މަސައްކަތްވެސް ކޮށްފައި ނުވާކަމަށެވެ.

Advertisement

އަދި އެއްވެސް ވަރަކަށް ފައިސާ ދައްކައި ފައި ނުވާތީ ދެފްލެޓްގެ ވެސް އެއްބަސްވުން ބާތިލް ކޮށް 14 ދުވަސް ތެރޭގައި ފްލެޓް އަނބުރާ އާބަންކޯ އާއި ހަވާލު ކުރުމަށް އަންގައިފައިވާ ކަމަށެވެ.

"އެންމެފަހުގެ ނިންމުން ފްލެޓް އަތުލުން އެއީ، މި ކޭސްގަ ވާގޮތަކީ ކުލިވެސް ދައްކާފަ ނެތީ، ވަރަށް ބޮޑު ބަދަލެއް އެ އެޕާޓްމެންޓަށް ގެނެސްފަ މިހުރީ، ފައިސާ ނެތިގެން ނޫންކަން އެނގޭ ކުލި ނުދައްކާ ހުރީ، މިއަކަށް ނެތް އަޅުގަނޑުމެންނަކަށް ލުޔެއް ދެވޭކަށް، އެހެންވެ ކޮންޓްރެކްޓް ބާތިލް ކުރީ" ވޮއިސް އަށް މައުލޫމާތު ދެއްވަމުން ނިއުޝާދު ވިދާޅުވިއެވެ.

ނިއުޝާދު ވިދާޅުވީ ފްލެޓްތައް އަނބުރާ އާބަންކޯ އާއި ހަވާލު ކުރަން ވާނީ ފްލެޓް ދޫކުރި އިރު ހުރި ގޮތަށް ކަމަށެވެ. އަދި އެކުންފުނިން ފްލެޓާއި ހަވާލުވާއިރު ފްލެޓްގައި ހުންނަ އެއްޗެއްސަކީ އާބަންކޯއަށް ނެގޭނެ ތަކެތި ކަމަށެވެ. އަދި އެފަރާތުން ނުދައްކައިވާ ކުލީގެ ފައިސާ ދެއްކުމަށްވެސް އަންގާފައި ވާނެ ކަމަށްވެސް ނިއުޝާދު ވިދާޅުވިއެވެ.