ވެރިކަމުގަ ގަދަބާރުން ހުރުމަށް ރައްޔިތުން ހާލުގަ ނުޖައްސުމަށް އެސްޓީއޯގެ ކުރީގެ މެނޭޖިންގ ޑިރެކްޓަރ ހުސެއިން އަމްރު ގޮވާލައްވައިފިއެވެ.
އަމްރު ކުަރައްވާފައިވާ ޓްވީޓެއްގައި ވިދާޅުވެފައިވަނީ ވައްކަމުން ސަރުކާރު ކުންފުނިތައް ހުސްކޮށްލާ، ބަދަލުދީ ބައިތުލް މާލް ހުސްކޮށްލާ، ބަހާ ރަށްތައް ހުސްކޮށްލުމަކީ އިންތިޚާބުވާން ކިތައްމެ ބޭނުމަސް ކުރަން ހެޔޮވާވަރު ކަމެއްނޫން ކަމަށެވެ.
"ވެރިކަމުގަ ގަދަބާރުން ހުރުމަށް ރައްޔިތުން ހާލުގަ ނުޖައްސާ" އަމްރު  ވިދާލުވެފައިވެއެވެ.
އަމްރު މިގޮތަށް ޓްވީޓް ކުރައްވާފައިވަނީ ވ ބިޑަކާއި ނުލައި އިޤްތިޞާދީ ބޭނުމަށް ފަޅު ރަށް ދެވޭގޮތަށް  ޤަވާއިދެެއް ހަދައިފިކަމަށް ބުނެ ލިޔެފައިވާ ޚަބަރެއް ހިއްސާކުރައްވަމުންނެވެ.
އިއްޔެ އިކޮނޮމިކް މިނިސްޓްރީން ގެޒެޓުކޮށްފައިވާ "އިގްތިސާދީ ބޭނުންތަކަށް ތަރައްގީކުރުމަށް ފަޅުރަށްރަށް ކުއްޔަށް ދިނުމާބެހޭ ޤަވާއިދު" ގައިވާ ގޮތުން ފަޅު ރަށެއްގައި އިޤްތިޞާދީ މަސައްކަތެއް ކުރުމަށް އެ ރަށަކީ އިންޑަސްޓްރިއަލް ރަށެއްގެ ގޮތުގައި ކަނޑައަޅާނީ އިކޮނޮމިކް ކައުންސިލުގެ ލަފާގެ މަތިން ރައީސުލްޖުމްހޫރިއްޔާ ކަމަށެވެ.
އަމްރުގެ ފާޑިކިޔުން ސަރުކާރަށް އަމާޒު ކުރައްވާފައިވާއިރު، އަމްރު ވަނީ ވެރިކަން ކުރާ މައި ޕާޓީ އެމްޑީޕީ އިން އިއްޔެ ވަކިވެވަޑައިގެންފައެވެ. އަމްރު ކުރިން ހުންނެވި މަޤާމު ކަމަށްވާ އެސްޓީއޯގެ މެނޭޖިންގް ޑިރެކްޓަރު ކަމުން ވަކި ކޮށްފައިވަނީ އެމްޑީޕިގެ އެތެރޭގެ އިންތިޚާބުގެ ތެރޭގައި ރައީސް ނަޝީދަށް ކެމްޕޭނު ކުރައްވައި، އޭރުގެ އެމްޑީޕީގެ ފިކުރެއްގެ ދިރުން ފެކްޝަނުން ފަރާތުން ޖުމްހޫރީ ޕާޓީއާއި ބައްދަލު ކުރި ބައްދަލު ކުރުން ތަކަކަށް ފަހުގައެވެ.
އަމްރު އޭރު  ވިދާޅުވެފައި ވަނީ ރައީސް ނަޝީދާއި އެކު ކެމްޕޭންއާއި ގުޅިވަޑައިގަތީ ރައީސް ޞާލިޙްގެ ރުހުންލިބިވަޑައިގެން ކަމަށެވެ. ނަމަވެސް އެވާހަކަތައް އެމްޑީޕީ އިން ވަނީ ދޮގުކޮށްފައެވެ.
އަމްރު މިހާރު ހުންނެވީ އެމްޑީޕީ އިން ވަކިވި ފިކުރެއްގެ ދިރުމާއި އެކު އެވެ. އިއްޔެ ފިކުރެއްގެ ދިރުމުން ވަނީ އައު ޕާޓީއެއް އުފައްދާނެ ކަން އިއުލާނު ކޮށްފައެވެ.