މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގެ ކުއާޓާ ފައިނަލުގެ ފުރަތަަމަ މެޗުގައި 5-1 ގެ ނަތީޖާއަކުން ކުޑަފުށި ބަލިކޮށް ދިގަލި މޯލްޑިވްސް އިން ސެމީގެ ފުރަތަަމަ ޖާގަ ކަށަވަރުކޮށްފިއެވެ.

ދެ ޓީމުގެ ގިނަ އަދަދެއްގެ ސަޕޯޓަރުންގެ ކުރިމަތީގައި މިރޭ ކުޅެވުނު ކުއާޓާ ފައިނަލުގެ ފުރަތަމަ މެޗުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި މެޗުގައި ފުރަތަަމަ ލަނޑުޖަހައި ކުރިހޯދީ ދިގަލި މޯލްޑިވްސް އިންނެވެ. މިލަނޑު ފުރަތަމަ ހާފުގެ ހަތަރުވަނަ މިނެޓުގައި ކާމިޔާބުކޮށްދިނީ އެޓީމުގެ މުހައްމަދު ފިރުޝާން އެވެ.

ނަމަވެސް ފުރަތަމަ ހާފުގެ 10 ވަނަ މިނެޓުގައި ދިގަލި މޯލްޑިވްސް ކީއްޕަރުގެ މިސްޓޭކަކުން ކުޑަފުށި ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކުރި އެވެ. މިއީ ކުޑަފުށީގެ ކީއްޕަރު އަބްދުﷲ ސުމައިދު ސޯލިހު އެޓީމުގެ ޕެނަލްޓީ އޭރިއާ ތެރޭގައި ހުރެފައި ކުރިއަށް އެއްލި ބޯޅައެއް ދިގަލި މޯލްޑިވްސްގެ ޕެނަލްޓީ އޭރިއާ ތެެރެއިން އެޓީމުގެ ކީއްޕަރު ކޮންޓްރޯލް ކުރަން އުޅުމުގެތެރޭގައި އޭނަގެ ފައިގައި ޖެހިފައި ވަން ލަނޑެކެވެ.

Advertisement

ފުރަތަަމަ ހާފު ނިމުމުގެ ކުރިން މި މެޗުގައި ދެވަނަ ފަހަރަށް ދިގަލި މޯލްޑިވްސް އަށް ލީޑުހޯދައިދިނީ ހާފު ނިމެން ތިން މިނިޓަށްވެފައި ވަނިކޮށް އެޓީމުގެ އަބްދުﷲ ނަބީހް އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން ދިގަލި މޯލްޑިވްސް ކުރީގައި އޮވެގެންނެވެ.

ދެވަނަ ހާފުގައި ދިގަލި މޯލްޑިވްސްގެ ތިންވަނަ ލަނޑު ކާމިޔާބުކޮށްދިނީ އެޓީމުގެ ފުރަތަމަ ލަނޑު ވެސް ކާމިޔާބުކޮށްދިން މުހައްމަދު ފިރުޝާން އެވެ. މިއީ ދެވަނަ ހާފުގެ 09 ވަނަ މިނެޓުގައި އެޓީމުގެ މުހައްމަދު އިރުޝަމް ކުޑަފުށީގެ ތިން ކުޅުންތެރިން ކައިރިން ނައްޓާލުމަށް ފަހު މުޅިން ހުސްކޮށްލާފައި ޖައްސާލި ބޯޅައެއް ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ދިގަލި މޯލްޑިވްސް ހަތަރުވަނަ ލަނޑު މެޗު ނިމެން ތިން މިނިޓަށްވެފައި ވަނިކޮށް ކާމިޔާބުކޮށްދިނީ އެޓީމުގެ އަލީ މުހައްމަދު އެވެ. މިއީ އެޓީމުގެ އަބްދުﷲ ނަބީހް މުޅިން ހުސްކޮށްލާފައި ޖައްސާލި ބޯޅައެއް ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި އޭގެ މިނެޓެއް ފަހުން އެޓީމުގެ ފަސްވަނަ ލަނޑު ކާމިޔާބުކޮށްދިނީ މިރޭގެ މެޗުގެ މޭން އޮފް ދަ މެޗުގެ މަގާމު ހޯދި މުހައްމަދު އިރުޝަމް އެވެ.