ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ނޯތު މާލޭ ޒޯނުގައި މިއަދު ހަވީރު ކުޅެވުނު ފުރަތަމަ މެޗުގައި ގުރޫޕް "އޭ" ގައި 4-0 ގެ ނަތީޖާއަކުން އޯގަ ބަލިކޮށް ރީތިރަށުން ގްރޫޕްގެ އެއްވަނައިގައި ހަމަޖެހިލައިފި އެވެ. 

ދެޓީމުގެ ފަރާތުން އަވަސް ކުޅުމެއް ފެނިގެންދިޔަ، މި މެޗުގެ ފުރަތަަމަ ހާފުގައި ލަނޑުޖަހާނެ ރަގަޅު ފުރުސަތުތަކެއް ތަނަވަސްކުރީ ރީތިރަށުން ނެވެ. އެގޮތުން ފުރަތަމަ ހާފުގެ 10 ވަނަ މިނެޓުގައި އެޓީމުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ.

މިލަނޑު އެޓީމަށް ކާމިޔާބުކޮށްދިނީ ގާއިދު ގާސިމް އެވެ. މީގެ އިތުރުން ވެސް މިހާފުގައި ލަނޑު ޖަހާނެ ރަގަޅު ފުރުސަތުތަކެއް ރީތިރަށުން ތަނަވަސްކުރި ނަމަވެސް މިހާފުގައި އެޓީމަށް އިތުރު ލަނޑެއް ކާމިޔާބުކުރެވޭ ގޮތެއްނުވި އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ރީތިރަށް ކުރީގައި އޮވެގެންނެވެ.

ފުރަތަަމަ ހާފުގައި ރީތިރަށުގެ ހަމަލާތައް ދިފާއުކުރުމުގައި އޯގައިން ރަގަޅު ޑިފެންސިވް ކުޅުމެއް ދެއްކި ނަމަވެސް ދެވަަނަ ހާފްގައި އެކުޅުން އެޓީމަށް ތަކުރާރުކުރެވޭ ގޮތެއް ނުވިއެވެ. ނަތީޖާއެއްގެ ގޮތުން ދެވަނަ ހާފުގެ ހަވަނަ މިނެޓުގައި ރީތިރަށުން އެޓީމުގެ ލީޑު ފުޅާކުރި އެވެ. މި ލަނޑު ވެސް އެޓީމަށް ކާމިޔާބުކޮށްދިނީ ފުރަތަމަ ލަނޑުވެސް ކާމިޔާބުކޮށްދިން ގާއިދު ގާސިމް އެވެ.

ރީތިރަށުން މި މެޗުގައި ކާމިޔާބުކުރި ތިންވަނަ ލަނޑު ދެވަނަ ހާފުގެ 12 ވަނަ މިނެޓުގައި މުހައްމަދު ނާފިއު ކާމިޔާބުކޮށްދިން އިރު އެޓީމުގެ ހަތަރުވަނަ ލަނޑު އޭގެ ދެމިނެޓު ފަހުން ކާމިޔާބުކޮށްދިނީ ސަމްހާން އަބްދުއް ރަހުމާން އެވެ. މިއާއެކު މެޗުގެ ކުޅުން ނިމިގެންދިޔައީ 4-0 ގެ ނަތީޖާއަކުން ރީތިރަށް މޮޅުވެގެންނެވެ.

މި މެޗުގެ މޭން އޮފް ދަ މެޗަކަށް ހޮވުނީ ރީތިރަށުގެ ސަމްހާން އަބްދުއް ރަހުމާން އެވެ.

ރިސޯޓް ލީގު 2023 ގެ ނޯތު މާލޭ ޒޯނުގައި މިއަހަރު 17 ޓީމެއް ބައިވެރިވެފައި ވާއިރު، މި ޒޯނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ހަތަރު ގުރޫޕަކަށް ބަހާލައިގެން ކޮންމެ ގްރޫޕަކުން ވެސް އެންމެ ރަގަޅު ނަތީޖާއެއް ހޯދާ ދެޓީމު ކުއާޓާ ފައިނަލަށް ހޮވޭގޮތަށެވެ. 

މި ޒޯނުގެ ހުރިހާ މެޗެއްވެސް ވަން އެންޑް އޮންލީ ރީތިރަށުގައި ކުޅުމަށް ހަމަޖެހިފައިވާއިރު، ގުރޫޕް "އޭ" ގައި ފަސް ޓީމު ހިމެނޭއިރު، އަނެއް ތިން ގުރޫޕްގެ ތެރެއިިން ކޮންމެ ގުރޫޕެއްގައި ހިމެނެނީ ހަތަރު ޓީމެވެ.