ކުރިއަށް އޮތް ރިޔާސީ އިންތިހާބު ސަރުކާރު ހިންގާ މައު ޕާޓީ، އެމްޑީޕީން އެއްބުރުން ކާމިޔާބު ކުރާނެ ކަމަށް އެޕާޓީގެ ޗެއާޕާސަން އަދި އިކޮނަމިކް މިނިސްޓަރު ފައްޔާޟް އިސްމާއިލް ވިދާޅުވެއްޖެއެވެ. 

އެމްޑީޕީން 2023 ވަނަ އަހަރުގެ ރިޔާސީ އިންތިޚާބަށް ނެރޭ މެނިފެސްޓޯ ތައްޔާރުކުރުމަށް ބޭނުންވާ މައުލޫމާތު އެއްކުރުމާއި، ޕާޓީއަށް މެމްބަރުން އިތުރުކޮށް ރިޔާސީ ކެންޕޭނު ދަތުރުތައް އިއްޔެ ވަނީ ފަށާފައެވެ. 

އަދި އެ ދަތުރުގެ ތެރެއިން، މިއަދު ރާއްޖޭގެ ހުރިހާ ރަށެއްގައި އެމްޑީޕީގެ ދިދަ ނަގާފައިވާ ކަމަށް އެ ޕާޓީން ވަނީ ބުނެފައެވެ. 

Advertisement

އެކަމާއި ގުޅިގެން ފައްޔާޟް ކުރެއްވި ޓްވީޓެއްގައި ވިދާޅުވީ، އެމްޑީޕީން ކުރަމުންދާ އެ ދަތުރުގެ ތެރެއިން ޕާޓީގެ ހަރަކާތްތައް އިތުރު ގިޔަރެއް ކުރިއަށް ޖެހިލާފައިވާ ކަމަށެވެ. އަދި މިއަދު ޕާޓީގެ ދިދަ ހުރިހާ ރަށެއްގައި ނަގާ ކެމްޕޭން ޓީމްތައް ރުކުރުވާލުމުގެ މަސައްކަތް ފެށިފައިވާ ކަމަށްވެސް ވިދާޅުވި އެވެ. 

"އިރާދަކުރެއްވިއްޔާ އިންތިހާބު އެމްޑީޕީ އެއްބުރުން ކާމިޔާބު ކުރާނަން." ފައްޔާޟް ވިދާޅުވިއެެވެ. 

އެމްޑީޕީން ރިޔާސީ އިންތިހާބުގެ ކެމްޕެއިން މަސައްކަތް ރަސްމީކޮށް ފަށާފައިވާއިރު، އިދިކޮޅު ޕީޕީއެމާއި، ޖުމްހޫރީ ޕާޓީންވެސް އަންނަނީ ކެންޕެއިންގެ މަސައްކަތް ފެށުމަށް ތައްޔާރުވަމުންނެވެ. އަދި އެޕާޓީތަކުންވެސް އަންނަނީ ކުރިއަށް އޮތް ރިޔާސީ އިންތިހާބު އެ ކާމިޔާބު ކުރެވޭނެ ކަމުގެ ޔަގީިންކަން އޮތް ކަމަށް ބުނަމުންނެވެ. 

މިއަހަރުގެ ރިޔާސީ އިންތިހާބު ބޭއްވުމަށް ހަމަޖެހިފައިވަނީ ސެޕްޓެމްބަރު މަހުގެ 9 ވަނާ ދުވަހުއެވެ. އަދި ދެވަނަ ބުރެއް ބާއްވަން ޖެހިއްޖެ ނަމަ، ވޯޓުލުން އޮންނާނީ ސެޕްޓެމްބަރު 30 ވަނަ ދުވަހުއެވެ.