މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގެ ކުއާޓާ ފައިނަލުގެ ހަތަރުވަނަ މެޗުގައި 2-1 ގެ ނަތީޖާއަކުން އެންމެ ފަހުގެ ޗެމްޕިއަން ޖޯލިބީއިން ބަލިކޮށް ޔޫ އެންޑް މީ އިން މުބާރާތުގެ ސެމީގެ ފައިނަލުގެ ޖާގައެއް ކަށަވަރުކޮށްފިއެވެ.

މިދިޔަ އަހަރުގެ މުބާރާތުގެ ފައިނަލުގައި ތަފާތުބޮޑު ނަތީޖާއަކުން ޖޯލިބީއިން އަތުން ބަލިވުމުގެ އިތުރަށް މިއަހަރުގެ މުބާރާތް ފެއްޓުމުގެ ގޮތުން ކުޅެވުނު ޗެރިޓީ ޝީލްޑް މެޗުގައި ވެސް ޔޫ އެންޑް މީ ވަނީ ބަލިވެފަ އެވެ.

ގިނަ އަދަދެއްގެ ސަޕޯޓަރުންގެ ކުރިމަތީގައި ކުޅުނު މިރޭގެ މެޗު ފަށައިގެން ދެޓީމުގެ ފަރާތުން އަވަސް ކުޅުމެއް ފެނިގެންދިޔަ އިރު، މި މެޗުގައި ފުރަތަަމަ ލަނޑުޖަހައި ކުރިހޯދީ ޔޫ އެންޑް މީ އިންނެވެ. މިލަނޑު ފުރަތަަމަ ހާފުގެ އެންމެ ފަހު މިނެޓްގައި ކާމިޔާބުކޮށްދިނީ އެޓީމުގެ އިބްރާހިމް އިރުބާންއެވެ. މިއީ ޖޯލިބީއިންގެ ޕެނަލްޓީ އޭރިއާ ބޭރުން އެޓީމުގެ ބެންޖޯ ކައިރިން ނައްޓާލުމަށް ތިރިތިރިން ފޮނުވާލި ބޯޅަ ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

Advertisement

ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިމެޗުގައި ޔޫ އެންޑް މީ ގެ ލީޑު ފުޅާކޮށްދިނީ ދެވަަނަ ހާފުގެ 07 ވަނަ މިނެޓުގައި އެޓީމުގެ މުހައްމަދު ސުހައިލް އެވެ. މިއީ ޖޯލިބީއިންގެ ފަހަތުން ހެދުނު ގޯހެއްގެ ފައިދާ ނަގައި އެޓީމުގެ ޕެނަލްޓީ އޭރިއާގެ ރޮނގުމަތީހުރެ ފޮނުވާލި ހަމަލާ ގޯލުގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

ދެވަނަ ހާފުގައި ޖޯލިބީއިން ގިނަ ފުރުސަތުތަކެއް ތަނަވަސްކުރި ނަމަވެސް އެޓީމުގެ ހަމަލާތައް ދިފާއުކުރުމުގައި ޔޫ އެންޑް މީ ގެ ކުޅުންތެރިން ދިޔައީ ރޭވުންތެރިކަމާއެކު މޮޅު ޑިފެންސިވް ގޭމެއް ކުޅެމުންނެވެ. ނަމަވެސް މެޗު ނިމެން ހަތަރު މިނެޓަށް ވެފައި ވަނިކޮށް ޖޯލިބީއިން އިން ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރި އެވެ. މިލަނޑު އެޓީމަށް ކާމިޔާބުކޮށްދިނީ އިރުފާން މުހައްމަދު އެވެ.

މިއީ އެޓީމަށް ލިބުނު ކޯނަރެއްގައި ބެންޖޯ ޖައްސާލި ބޯޅައެއް ޕެނަލްޓީ އޭރިއާ ބޭރުން، އެއްފަހަރުން ޖަހައި ގޯލުގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ޔޫ އެންޑް މީ މޮޅުވެގެންނެވެ.

މި މެޗުގެ މޭން އޮފް ދަ މެޗަކަށް ހޮވުނީ ޔޫ އެންޑް މީ ގެ ގޯލްކީޕަރު އިބްރާހިމް ނަދީމް އެވެ. އޭނާ ވަނީ މި މެޗުގައި ޖޯލިބީއިން ފޮނުވާލި ނުރައްކާތެރި ގިނަ ހަމަލާތަކެއް ހުޝިޔާރުކަމާއެކު ދިފާއުކޮށްފައެވެ.

މާދަމާ ރޭ ކުޅޭ މުބާރާތުގެ ސެމީ ފައިނަލްގެ ދެވަނަ މެޗުގައި ޔޫ އެންޑް މީ ނުކުންނާނީ މީދުއްޕަރު ޓީމާއި ދެކޮޅަށެވެ. ސެމީގެ ފުރަތަަމަ މެޗުގައި ބައްދަލުކުރާނީ ދިގަލި މޯލްޑިވްސް އާއި ކޯރާކޯރާ މޯލްޑިވްސް އެވެ. މި ދެމެޗު ވެސް ކުޅުމަށް ހަމަޖެހިފައިވަނީ މާދަމާ ރޭ 21:00 ގައެވެ.