މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގެ ސެމީ ފައިނަލުގެ ދެވަނަ މެޗުގައި މީދުއްޕަރު ދެ ލަނޑު ކާމިޔާބުކޮށްފައި ވަނިކޮށް ފަހަތުން އަރައި ތިން ލަނޑު ކާމިޔާބުކޮށް އެންމެ ފަހުގެ ރަނަރަޕް ޔޫ އެންޑް މީ މުބާރާތުގެ ފައިނަލުގެ ޖާގައެއް ކަށަވަރުކޮށްފިއެވެ.

މިރޭގެ ފޯރިގަދަ ސެމީފައިނަލު މެޗުގައި ފުރަތަަމަ ލަނޑުޖަހައި ކުރިހޯދީ މީދުއްޕަރުން ނެވެ. މި ލަނޑު ފުރަތަމަ ހާފުގެ 11 ވަނަ މިނެޓުގައި ކާމިޔާބުކޮށްދިނީ އެޓީމުގެ ނާޖިހު ޖަމީލް އެވެ. އަދި ފުރަތަަމަ ހާފުގެ ކުޅުން ނިމެން ދެމިނެޓަށް ވެފައި ވަނިކޮށް އެޓީމުގެ ލީޑު ފުޅާކޮށްދިނީ މުހައްމަދު ފަރުހާން އެވެ. މިއީ ޔޫ އެންޑް މީގެ ޕެނަލްޓީ އޭރިއާ ރޮނގުމަތިން ކަހަލަގޮތަކަށް ލިބުނު ހިލޭ ޖެހުމަކުން އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން މީދުއްޕަރު ކުރީގައި އޮވެގެންނެވެ.

މުބާރާތުގެ އެންމެ ފަހުގެ ރަނަރަޕް ޔޫ އެންޑް މީ އިން ދެވަަނަ ހާފުގެ ފެށީ ވަރުގަދަކޮށެވެ. ނަތީޖާއެއްގެ ގޮތުން ގާތްގާތުގައި ދެ ލަނޑު ކާމިޔާބުކޮށް އެޓީމުން ނަތީޖާ އެއްވަރުކުރި އެވެ. އެގޮތުން ދެވަނަ ހާފުގެ ދެވަަނަ މިނެޓުގައި އެޓީމުން ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރި އެވެ.

މި ލަނޑަކީ ޔޫ އެންޑް މީ ގެ ގޯލްކީޕަރު ނަދީމް އެޓީމުގެ ޕެނަލްޓީ އޭރިއާ ތެރޭގައި ހުރެފައި ކުރިއަށް އެއްލި ބޯޅައެއް މީދުއްޕަރުގެ ކީއްޕަރު ނާޝިއު ޝަރީފް ހިފަން އުޅުމުގެތެރޭގައި އޭނަގެ އަތުން ބައިކޮޅަށް ވަން ލަނޑެކެވެ. އަދި ޖެހިގެން އައި މިނެޓުގައި އެޓީމަށް މެޗުގެ ނަތީޖާ އެއްވަރުކޮށްދިނީ މުހައްމަދު މިފްރާހް އެވެ.

މި މެޗުން ޔޫ އެންޑް މީ މޮޅުވި ލަނޑު ދެވަނަ ހާފުގެ 13 ވަނަ މިނެޓުގައި ކާމިޔާބުކޮށްދިނީ މުހައްމަދު ސުހައިލް އެވެ. މިއީ މީދުއްޕަރުގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާ ގޯލްގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ ވެސް ޔޫ އެންޑް މީގެ ތިންވަނަ ލަނޑު ކާމިޔާބުކޮށްދިން މުހައްމަދު ސުހައިލް އެވެ.

މުބާރާތުގެ ފައިނަލްގައި ޔޫ އެންޑް މީ ނުކުންނާނީ މިރޭގެ ފުރަތަ ސެމީގައި ޕެނަލްޓީގައި ކޯރާކޯރާ މޯލްޑިވްސް ބަލިކޮށް ފައިނަލުން ޖާގަ ހޯދި ދިގަލި މޯލްޑިވްސް އާއި ދެކޮޅަށެވެ.