އިނގިރޭސި ޕްރިމިއާ ލީގުގައި މިރޭ ރަށުން ބޭރުގައި 1-0 ގެ ނަތީޖާއަކުން ނޮޓިންހަމް ފޮރެސްޓް އަތުން އާސެނަލް ބަލިވުމުން ލީގުގައި ބާކީ ތިން މެޗު އޮއްވައި މެންޗެސްޓާ ސިޓީއަށް ލީގު ޗެމްޕިއަންކަން ކަށަވަރުވެއްޖެއެވެ.

މިއީ ޕްރިމިއާ ލީގުގެ ޗެމްޕިއަންކަން ވިދިވިދިގެން މެންޗެސްޓާ ސިޓީ ހޯދި ތިންވަނަ ފަހަރެވެ. އަދި މިއީ ފާއިތުވި ހަ ސީޒަންގެ ތެރޭ ސިޓީން ޕްރިމިއާ ލީގުގެ ޗެމްޕިއަންކަން ހޯދި ފަސްވަނަ ފަހަރެވެ. މީގެ އިތުރުން މިއީ މެންޗެސްޓާ ސިޓީގެ ތާރީޚުގައި އެ ކުލަބުން ޕްރިމިއާ ލީގު ކާމިޔާބުކުރި ނުވަވަނަ ފަހަރެވެ.

މިރޭގެ މެޗުގައި ގިނަވަގުތު ބޯޅަ ހިފަހައްޓައިގެން އާސެނަލް އިން މެޗު ޑޮމިނޭޓުކުރި ނަމަވެސް ފުރަތަަމަ ހާފުގައި ފޮރެސްޓުގރ ގޯލާއި އަމާޒުކޮށް އެޓީމަށް ފޮނުވާލެވުނީ އެންމެ ދެ ހަމަލައެވެ. އޭގެ ތެރެއިން ފުރަތަަމަ ހަމަލާ ފުރަތަމަ ހާފުގެ 18 ވަނަ މިނެޓުގައި އާސެނަލްގެ ބްރެޒިލް ފޯވާޑް ގެބްރިއަލް ޖީސަސް ފޮނުވާލުމުން ގޯލާއި އަމާޒުނުވެ ދިޔައީ ހުރަސް ދަނޑިމަތިން ބޭރަށެވެ. 

ޖެހިގެން އައި މިނެޓުގައި ފޮރެސްޓުން އުފެއްދި ކައުންޓާ އެޓޭކެއްގައި އެޓީމުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މިލަނޑު އެޓީމަށް ކާމިޔާބުކޮށްދިނީ ނައިޖީރިއާގެ ފޯވާޑް ޓައިވޯ އަވޮނިޔީ އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ފޮރެސްޓް ކުރީގައި އޮވެގެންނެވެ.

ދެވަަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން އާސެނަލް އިން ކުޅުނު ނަމަވެސް ފޮރެސްޓުން ވަނީ ރޭވުންތެރިކަމާއެކު އާސެނަލްގެ އެޓޭކްތައް ހުއްޓުވުމުގައި މޮޅު ޑިފެންސިވް ކުޅުމެއް ދައްކައިދީފައެވެ.

މިރޭގެ މެޗުން ބަލިވުމުން ލީގުގައި ކުޅުނު 37 މެޗުން ލިބުނު 81 ޕޮއިންޓާއެކު އާސެނަލް އޮތީ ލީގު ތާވަލްގެ ދެވަނައިގައެވެ. އެއްވަނައިގައި އޮތް ޗެންޕިއަން މެންޗެސްޓާ ސިޓީއަށް 35 މެޗު ކުޅެގެން ވަނީ 84 ޕޮއިންޓް ލިބިފައެވެ. އަދި މިރޭގެ މެޗުން ލިބުނު ތިން ޕޮއިންޓާއެކު ފޮރެސްޓަށް ވަނީ 37 މެޗު ކުޅެގެން 37 ޕޮއިންޓް ލިބިފައެވެ. ލީގު ތާވަލުގެ 16 ވަނައިގައި އެޓީމު މިވަގުތު އޮތްއިރު، މިރޭގެ މެޗުގެ ނަތީޖާއާއެކު އަންނަ ސީޒަނުގައި ޕްރިމިއާ ލީގުގައި ދެމިއޮވޭނެކަން އެޓީމަށް ވަނީ ކަށަވަރުވެފައެވެ.