ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް ތާއީދު ކުރައްވާ މެންބަރުން އަލަށް އުފައްދަވާފައިވާ "ދި ޑިމޮކްރެޓްސް" ޕާޓީއާއި އެމަނިކުފާނު ގުޅިވަޑައިގަންނަވާނެ އިރެއް އެނގިވަޑައިގަންނަވާނީ އެމަނިކުފާނަށް ކަމަށް މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވެއްޖެއެވެ. 

"ދި ޑިމޮކްރެޓްސް" ޕާޓީ ރެޖިސްޓަރ ކުރުމުގެ ހުއްދައަށް އެދި އިލެކްޝަންސް ކޮމިޝަނަށް ފޯމް ހުށަހެޅުއްވުމަށްފަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން ހަސަން ވިދާޅުވީ، އެ ޕާޓީ އަކީ ވަކި މީހެއްގެ ޕާޓީއެއް ނޫން ކަމަށާ، އެހެން ނަމަވެސް ޕާޓީގެ ފަރާތުން ފޯމު ހުށަހަޅާފައިވާނީ އޭނާގެ ނަމުގައި ކަމަށެވެ. 

އަދި ޕާޓީގެ ކަންކަން ކުރައްވަމުން ގެންދަވާނީ ގާނޫނު ތެރެއިން ކަމަށާ ރައީސް ނަޝީދަކީ މިވަގުތު ސިޔާސީ ޕާޓީއެއްގެ މެންބަރެއްގެ ގޮތުގައި ހުންނެވި ބޭފުޅެއް ކަމަށްވާއިރު، ގާނޫނުގައި އޮންނަ ގޮތުން ސިޔާސީ ޕާޓީއެއްގެ މެންބަރެއްގެ ގޮތުގައި ހުންނަ ފަރާތަކަށް އެހެން ސިޔާސީ ޕާޓީއެއް ނު އުފެއްދޭނެ ކަމަށް ހަސަން ލަތީފް ވިދާޅުވިއެވެ.   

Advertisement

މިއާއެކު ހަސަން ލަތީފް ވަނީ އެ ޕާޓީ އުފައްދާފައިވަނީ ރައީސް ނަޝީދަށް ވެސް ފެނިވަޑައިގެން ކަމަށާ، ޕާޓީ އުފައްދަވާކަން އެމަނިކުފާނަށްވެސް އެނގިވަޑައިގަންނަވާ ކަމަށް ވިދާޅުވެފައެވެ. 

އެހެންނަމަވެސް، ޕާޓީއާއި އެމަނިކުފާނު ގުޅިވަޑައިގަންނަވާނެ އިރެއް އެނގޭނީ އެމަނިކުފާނަށް ކަމަށް އޭނާ ވިދާޅުވި އެވެ. 

ރައީސް ނަޝީދުގެ ފެކްޝަނުގެ 12 މަޖިލިސް މެންބަރުންނާއި އެމަނިކުފާނަށް ތާއީދު ކުރައްވާ ގިނަ މެންބަރުން ތަކެއް، އެމްޑީޕީން ކެނޑި އައު ޕާޓީއާއި ގުޅިވަޑައިގަންނަވާކަން އިއުލާން ކުރައްވާފައިވާ އިރު، އެމަނިކުފާނު އަދިވެސް ހުންނެވީ އެމްޑީޕީގެ މެންބަރެއްގެ ގޮތުގައި އެޕާޓީގެ ރައީސްގެ މަގާމުގައެވެ.