ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތް 2023 ގެ ނޯތު މާލޭ ޒޯނުގައި މިއަދު ހަވީރު ކުޅެވުނު ފުރަތަމަ މެޗުގައި ގުރޫޕް "ސީ" ގައި 1-0 ގެ ނަތީޖާއަކުން ޖުމައިރާ ބަލިކޮށް ކުޑަހުރާ އިން މުބާރާތުގެ ކުއާޓާ ފައިނަލުގެ ޖާގައެއް ކަށަވަރުކޮށްފިއެވެ. 

މި ގުރޫޕްގެ އެންމެ ފުރަތަަމަ މެޗުގައި ޗެންޕިއަން ބަރޮސް އަތުން ތަފާތުބޮޑުކޮށް މޮޅުވި، ޖުމެއިރާ އާއި ދެކޮޅަށް ކުޑަހުރާ އިން ވަނީ މި މެޗުގައި ރޭވުންތެރިކަމާއެކު މޮޅު ޑިފެންސިވް ކުޅުމެއް ދައްކައިދީފައެވެ. 

ފުރަތަަމަ ހާފުގައި ކުޑަހުރާ އިން ގިނަ ފުރުސަތުތަކެއް ތަނަވަސްކުރި ނަމަވެސް، އެޓީމުން ފޮނުވާލި ގިނަ ހަމަލާތަކެއް ޖުމެއިރާގެ ގޯލާއި އަމާޒުނުވެ ދިޔައީ ބޭރަށެވެ. ނަމަވެސް މެޗު ނިމެން ދެ މިނިޓަށްވެފައި ވަނިކޮށް އެޓީމުން ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކުރި އެވެ. މިލަނޑު އެޓީމަށް ކާމިޔާބުކޮށްދިނީ މުހައްމަދު މަޒީން އެވެ. މިއީ އެޓީމަށް ލިބުނު ކޯނަރެއް ގޯލްތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ދެވަަނަ ހާފު ފެށިގެން ގާތްގާތުގައި ދެޓީމަށް ހުސް ދެ ފުރުސަތު ލިބުނުއިރު، މި ހާފުގައި ޖުމެއިރާގެ އެޓޭކްތައް ފެނުނީ މާބޮޑަށްވެސް ވަރުގަދަކޮށެވެ. ނަތީޖާއެއްގެ ގޮތުން ފުލުފުލުގައި އެޓީމުން ދިޔައީ ކުޑަހުރާގެ ގޯލަށް ނުރައްކާ ކުރަމުންނެވެ. ނަމަވެސް މިހާފުގައި ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި، މެޗު ނިމިގެންދިޔައީ 1-0 ގެ ނަތީޖާއަކުން ކުޑަހުރާ މޮޅުވެގެންނެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ ކުޑަހުރާގެ އިބްރާހީމް އަބްދުލް ނާސިރުއެވެ.

މި މެޗުން ލިބުނު ތިން ޕޮއިންޓާއެކު އެކު ކުޅުނު ދެ މެޗުން ކުޑަހުރާއަށް ހަ ޕޮއިންޓް ލިބިފައިވާއިރު، ގްރޫޕް ސީގެ އެއްވަނައިގައި އޮތީ އެޓީމުވެ. އަދި މި މެޗުން ބަލިވި ޖުމައިރާއަށް ދެ މެޗުން ތިން ޕޮއިންޓް ލިބިފައިވާއިރު މިވަގުތު އެޓީމު އޮތީ ގްރޫޕްގެ ދެވަނައިގައެވެ.

ރިސޯޓް ލީގު 2023 ގެ ނޯތު މާލޭ ޒޯނުގައި މިއަހަރު 17 ޓީމެއް ބައިވެރިވެފައި ވާއިރު، މި ޒޯނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ހަތަރު ގުރޫޕަކަށް ބަހާލައިގެން ކޮންމެ ގްރޫޕަކުން ވެސް އެންމެ ރަގަޅު ނަތީޖާއެއް ހޯދާ ދެޓީމު ކުއާޓާ ފައިނަލަށް ހޮވޭގޮތަށެވެ. 

މި ޒޯނުގެ ހުރިހާ މެޗެއްވެސް ވަން އެންޑް އޮންލީ ރީތިރަށުގައި ކުޅުމަށް ހަމަޖެހިފައިވާއިރު، ގުރޫޕް "އޭ" ގައި ފަސް ޓީމު ހިމެނޭއިރު، އަނެއް ތިން ގުރޫޕްގެ ތެރެއިިން ކޮންމެ ގުރޫޕެއްގައި ހިމެނެނީ ހަތަރު ޓީމެވެ.