އިގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި ޗެންޕިއަން މެންޗެސްޓާ ސިޓީ އާއި ޗެލްސީ ވާދަކުރި މެޗު 1-0 ގެ ނަތީޖާއަކުން ސިޓީ އިން ކާމިޔާބުކޮށްފި އެވެ.

މިރޭގެ މެޗަށް ނުކުތްއިރު ވެސް ލީގު ޗެމްޕިއަންކަން ކަށަވަރުވެފައިވާ ސިޓީއިން އެޓީމުގެ ފުރަތަަމަ އެގާރައިގައި އާންމުކޮށް ކުޅޭ ގިނަ ކުޅުންތެރިންނަށް މިރޭގެ މެޗުގައި ވަނީ ރެސްޓުދީފައެވެ. އޭގެތެރޭގައި ހާލަންޑް، ޑިބްރޭނާ، ގުންޑޮގާން، ގްރިލިޝް، ބެނާޑޯ ސިލްވާ އަދި ގޯލްކީޕަރު އެޑަސަން ހިމެނެއެވެ.

މިރޭގެ މެޗުގެ ފުރަތަަމަ ހާފުގައި ސިޓީގެ ޒުވާން ކުޅުންތެރިންގެ ފަރާތުން ހަލުވި މޮޅު ކުޅުމެއް ފެނިގެންދިޔަ އިރު، އެޓީމުން ވަނީ މެޗުގެ ވަރަށް ކުރީކޮޅު ލަނޑެއް ކާމިޔާބުކޮށް މެޗުގެ ލީޑު ނަގާފައެވެ. މި ލަނޑު ފުރަތަމަ ހާފުގެ 12 ވަނަ މިނެޓުގައި ކާމިޔާބުކޮށްދިނީ އެޓީމުގެ އާޖެންޓީނާ ފޯވާޑް އަލްވަރޭޒް އެވެ. މިއީ ޗެލްސީގެ ފަހަތުން ހެދުނު ގޯހެއްގެ ފައިދާ ނަގައި އެޓީމުގެ ޒުވާން މިޑްފިލްޑަރ ކޯލް ޕާމަރ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ސިޓީގެ ލަނޑަށްފަހު މެޗުގެ ނަތީޖާ އެއްވަރުކުރުމަށް ފުރަތަަމަ ހާފުގައި ޗެލްސީގެ ރަހީމް ސްޓާލިން އަށާއި މިޑްފީލްޑަރު ކޮނޯރ ގަލަގަރް އަށް ވަނީ ލަނޑު ޖަހާނެ ރަގަޅު ހުސް ދެ ފުރުސަތު ލިބި ބޭނުންކުރެވޭ ގޮތްނުވެފައެވެ.

ދެވަަނަ ހާފުގައި ވެސް ޗެލްސީގެ ރަހީމް ސްޓާލިން އަށް މެޗުގެ ނަތީޖާ ހަމަހަމަ ކުރުމަށް ލިބުނު ހުސް ފުރުސަތުތަކުގެ ބޭނުން ނުކުރެވުނު އިރު، ހާފުގައި ސިޓީ އިން ވަނީ ހާލަންޑް ގެ އިތުރުން ކެވިން ޑިބްރޭނާ ވެސް ކުޅެން ނެރެފައެވެ.

ދެވަނަ ހާފުގެ 70 ވަނަ މިނެޓުގައި މެންޗެސްޓާ ސިޓީ އިން ލަނޑެއް ކާމިޔާބުކޮށް އެޓީމުގެ ލީޑު ފުޅާކުރި އެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ ގޯލު ޖެހުމުގެ ކުރިން ސިޓީގެ ކުޅުންތެރިއެއްގެ އަތުގައި ބޯޅަ ޖެހުމުން އެއީ ރަގަޅު ގޯލެއް ނޫންކަމަށެވެ.

މެޗުގެ ފަހުވަގުތު ކޮޅުގެ ތެރޭގައި ޗެލްސީގެ މޮޑްރިކް އަދި ޗަލަބާ އަށް ހުސް ދެ ފުރުސަތު ލިބުނުއިރު، މި މެޗުގައިވެސް ޗެލްސީއަށް ދިމާވި އެންމެ ބޮޑު މައްސަލައަކީ ލިބޭ ފުރުސަތުތަކުގައި ލަނޑު ނުޖެހުނުގެ މައްސަލައެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 36 މެޗުން މެންޗެސްޓާ ސިޓީއަށް 88 ޕޮއިންޓް ލިބިފައިވާއިރު، މި މެޗުން ބަލިވި ޗެލްސީއަށް 36 މެޗު ކުޅެގެން ލިބިފައިވަނީ 43 ޕޮއިންޓެވެ.

މިސީޒަނުގެ ޕްރެމިއާ ލީގުގެ ގަދަ 10 ގެ ފުރުސަތު ޗެލްސީއަށް ގެއްލިފައިވާއިރު، ބާކީ އޮތް ދެމެޗުން މޮޅުވިއަސް އެޓީމަށް އެންމެ ގިނަވެގެން ހަމަކުރެވޭނީ 49 ޕޮއިންޓެވެ. މިއީ ޕްރެމިއާ ލީގުގައި 38 މެޗު ކުޅެން ފެށިފަހުން ޗެލްސީއަށް މަދުވެގެން 50 ޕޮއިންޓް ހަމަނުކުރެވުނު ފުރަތަަމަ ފަހަރެވެ.