ޖަރުމަނު ބުންޑަސްލީގާގައި މިރޭ ރަށުން ބޭރުގައި 3-0 ގެ ނަތީޖާއަކުން އޮގްސްބާގް ބަލިކޮށް ބޮރޫޝިއާ ޑޯޓްމަންޑް އިން ލީގު ތާވަލުގެ އެއްވަނައަށް ކުރިއަށް ޖެހިލައިފިއެވެ.

މިރޭގެ މެޗަށް ބޮރޫޝިއާ ޑޯޓްމަންޑް ނުކުތްއިރު، ލީގުގައި ބަޔާން މިއުނިކް އެންމެ ފަހުން ކުޅުނު މެޗުގައި އާރްބީ ލައިޕްޒިގް އަތުން ބަލިވެފައި އޮތުމުން މިރޭގެ މެޗު ކާމިޔާބުކޮށް ލީގުގެ އެއްވަނަ މަގާމަށް ކުރިއަށް ޖެހިލުމުގެ ފުރުސަތު އެޓީމަށް އޮތީ ހުޅުވިފައެވެ.

މެޗުގެ ފުރަތަަމަ ހާފުގައި ޑޯޓްމަންޑްގެ ސެބެސްޓިއަން ހޯލަރ އަދި ޖޫލިއަން ބްރޭންޑްޓް މެޗުގެ ލީޑު ހޯދުމަށް ރަގަޅު ހުސް ފުރުސަތުތަކެއް ލިބި ބޭނުންނުކުރެވުނުއިރު، މިހާފުގައި އޮގްސްބާގް އަށް ދިމާވި އެންމެ ބޮޑު މައްސަލައަކީ ފުރަތަމަ ހާފުގެ 38 ވަނަ މިނެޓުގައި އެޓީމުގެ ޖަރުމަނު ޑިފެންޑަރު ފެލިކްސް އުދުއޯޚައި ޑޯޓްމަންޑްގެ ކުޅުންތެރިޔަކަށް ކުރި ނުރައްކާތެރި ފައުލަކާ ގުޅިގެން ރެފްރީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލުމުންނެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.

ދެވަަނަ ހާފު ފެށިގެން 59 ވަނަ މިނެޓުގައި ޑޯޓްމަންޑަށް ލީޑު ހޯދައިދިނީ އެޓީމުގެ އައިވަރީ ކޯސްޓުގެ ފޯވާޑް ސެބެސްޓިއަން ހޯލަރ އެވެ. އަދި މެޗުގެ 90 މިނެޓުގެ ކުޅުން ހަމަވާން ހަ މިނެޓަށް ވެފައި ވަނިކޮށް ހޯލަރ ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. މިއީ ލީގުގައި އެންމެ ފަހުން ކުޅުނު ތިން މެޗުގައި އޭނާ ކާމިޔާބުކޮށްދިން ފަސްވަނަ ލަނޑެވެ. އަދި މިސީޒަނުގައި ލީގުގައި ކުޅުނު 18 މެޗުގައި އޭނާ ކާމިޔާބުކޮށްދިން 9 ވަނަ ލަނޑެވެ.

ޑޯޓްމަންޑް އިން މި މެޗުގައި ކާމިޔާބުކުރި ތިންވަނަ ލަނޑު ދެވަނަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ޖަރުމަނު މިޑްފީލްޑަރު ޖޫލިއަން ބްރޭންޑްޓް އެވެ.

މި މެޗުން ލިބުނު ތިން ޕޮއިންޓާއެކު އެކު ލީގުގައި ކުޅުނު 33 މެޗުން ބޮރޫޝިއާ ޑޯޓްމަންޑަށް 70 ޕޮއިންޓް ލިބިފައިވާއިރު، 33 މެޗު ކުޅެގެން ދެވަނައިގައި އޮތް އެންމެ ފަހުގެ ޗެމްޕިއަން ބަޔާން މިއުނިކަށް ލިބިފައިވަނީ 68 ޕޮއިންޓެވެ. އަދި މިއީ 2011/12 ވަނަ ސީޒަނަށް ފަހު ލީގުގެ ފަހު މެޗަށް ދާއިރު ތާވަލުގެ އެއްވަނަ މަގާމު ޑޯޓްމަންޑަށް ލިބުނު ފުރަތަމަ ފަހަރެވެ.

ލީގު ފަހު މެޗުގައި މި މަހުގެ 27 ވަނަ ދުވަހު މެއިންޒް އާއި ދެކޮޅަށް ކުޅޭ މެޗު ކާމިޔާބުކޮށްގެން ލީގު ޗެމްޕިއަންކަން ހޯދުމުގެ އަމިއްލަ ބާރު ޑޯޓްމަންޑަށް ލިބިފައި އޮތްއިރު، ލީގު ފަހު މެޗުގައި އެސް ކޯން އަތުން ބަޔާނަށް މޮޅެއް ނުހޯދިއްޖެ ނަމަވެސް 2012 ވަނަ އަހަރަށް ފަހު ފުރަތަަމަ ފަހަރަށް ލީގު ޗެމްޕިއަންކަން ބޮރޫޝިއާ ޑޯޓްމަންޑަށް ލިބިގެންދާނެ އެވެ.