Advertisement

ރަށުން ބޭރުގައި އޮކްސްރޭ އަތުން ޕީއެސްޖީއަށް އުދަގޫ މޮޅެއް!

22 May 2023 | 09:07
އެމްބާޕޭ ލަނޑު ޖެހުމަށް ފަހު އުފާފާޅުކުރަނީ

ފްރާންސް ލީގުގައި ރޭ ރަށުން ބޭރުގައި 2-1 ގެ ނަތީޖާއަކުން އޮކްސްރޭ ބަލިކޮށް ލީގު ތާވަލުގެ އެއްވަނައިގައި ޕީއެސްޖީން ހަ ޕޮއިންޓްގެ ލީޑެއް ނަގައިފިއެވެ.

ރޭގެ މެޗުގެ ފުރަތަަމަ ހާފުގެ ވަރަށް ކުރީކޮޅު ޕީއެސްޖީ އިން ދެލަނޑުގެ ލީޑެއް ނަގާފައިވާއިރު، އެޓީމުގެ ދެ ލަނޑު ވެސް ކާމިޔާބުކޮށްދިނީ ކެޕްޓަން އެމްބާޕޭ އެވެ.

ޕީއެސްޖީގެ ފުރަތަމަ ލަނޑު މެޗުގެ ހަ ވަނަ މިނެޓުގައި އެޓީމުގެ ސްޕެނިޝް މިޑްފީލްޑަރު ފަބިއަން ރުއިޒް ތަނަވަސްކޮށްދިން ފުރުސަތެއްގައި އެމްބާޕޭ ކާމިޔާބުކޮށްދިންއިރު، އޭގެ ދެ މިނެޓު ފަހުން އެޓީމުގެ ދެވަނަ ލަނޑު އޭނާ ކާމިޔާބުކުރީ މެސީ ތަނަވަސްކޮށްދިން ފުރުސަތެއްގައެވެ.

Advertisement

މި މެޗުގައި އެމްބާޕޭ ކާމިޔާބުކުރި ދެ ލަނޑާއެކު މިސީޒަނުގައި ލީގުގައި އޭނާ ކާމިޔާބުކުރި ލަނޑުގެ އަދަދު ވަނީ 28 އަށް އަރާފައެވެ. އަދި މި މެޗުގައި މެސީގެ ފަރާތުން ފެނިގެންދިޔަ އެސިސްޓަކީ މިސީޒަނުގައި ޕީއެސްޖީއަށް ކުޅެދިން 38 މެޗުގައި މެސީގެ 20 ވަނަ އެސިސްޓެވެ.

މިސީޒަނުގައި ލީގު ކުޅުނު 30 މެޗުގައި މެސީގެ ފަރާތުން 16 އެސިސްޓް ފެނިގެން ގޮސްފައިވާއިރު، ލީގުގައި މެސީ ވަނީ 15 ލަނޑު ކާމިޔާބުކޮށްފައެވެ. އަދި އުމުރުން 35 އަހަރުގެ މެސީ ވަނީ މިސީޒަނުގައި ޕީއެސްޖީއަށް ކުޅެދިން 38 މެޗުގައި 20 އެސިސްޓުގެ އިތުރުން އެޓީމަށް 20 ލަނޑު ކާމިޔާބު ކޮށްދިފަ އެވެ.

ރޭގެ މެޗުގެ ފުރަތަަމަ ހާފުގައި އޮކްސްރޭގެ ތަން ފޮނުވާލި ހަމަލާ ޕީއެސްޖީގެ ގޯލުގެ ހުރަސް ދަނޑިއަށް އަމާޒުވިއިރު، މި މެޗުގައި އެޓީމުން ކާމިޔާބުކުރި ހަމައެކަނި ލަނޑު ދެވަނަ ހާފުގެ 51 ވަނަ މިނެޓުގައި ކާމިޔާބުކޮށްދިނީ އެޓީމުގެ މާލީ ފޯވާޑް ލަސިން ސިނާޔޮކޯ އެވެ. މިއީ އެޓީމުގެ ނޫނޯ ޑާ ކޮސްޓާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކުރި ލަނޑެކެވެ.

ރޭގެ މެޗުގެ ދެވަަނަ ހާފުގެ އިތުރު ވަގުތުގެ ތެރޭގައި އެމްބާޕޭ ލަނޑެއް ކާމިޔާބުކޮށް ހެޓްރިކް ހެދި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.މި މެޗުން ލިބުނު ތިން ޕޮއިންޓާއެކު އެކު ލީގުގައި ކުޅުނު 36 މެޗުން ޕީއެސްޖީއަށް 84 ޕޮއިންޓް ލިބިފައިވާއިރު، ދެވަނައިގައި އޮތް ލެންސް އަށް 36 މެޗު ކުޅެގެން ލިބިފައިވަނީ 78 ޕޮއިންޓެވެ. އަދި ބާކީ އޮތް ދެ މެޗުން ޕީއެސްޖީ ބަލިވި ނަމަވެސް އެޓީމަށް ލީގު ގެއްލުމުގެ ފުރުސަތު ވަރަށް ކުޑައެވެ. ސަބަބަކީ ބާކީ އޮތް ދެ މެޗުން ލެންސް މޮޅުވި ނަމަވެސް އެޓީމަށް ގިނަވެގެން ހޯދޭނީ 84 ޕޮއިންޓެވެ. އަދި މިވަގުތު ޕީއެސްޖީއަށް ފައިދާ 50 ގޯލު އޮތްއިރު، ލެންސް އަށް އޮތީ ފައިދާ 34 ގޯލެވެ.

Advertisement

ކޮމެންޓް

Advertisement

Advertisement