މާލޭގެ ރައްޔިތުންނަށް ޚާއްސަކޮށްގެން ސަރުކާރުން އިއުލާނުކޮށްފައިވާ ގޯތި ދޫކުރަން ފަށާނީ ޖޫން މަހުގައިކަމަށް ޕްލޭނިން މިނިސްޓަރު މުޙައްމަދު އަސްލަމް ވިދާޅުވެއްޖެ އެވެ. 

ރައްޔިތުންގެ މަޖިލީހަށް ޕްލޭނިން މިނިސްޓަރު މިއަދު ހާޒިރުކުރައްވާފައިވާއިރު، ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އާޒިމް ވަނީ މާލޭ ރައްޔިތުންނަށް ގޯތި ދޫކުރުމުގެ މަޝްރޫއު އޮތް ހިސާބެއް ސާފުކޮށްދެއްވުމަށް މިނިސްޓަރު އަރިހުން އެދިވަޑައިގަންނަވާފަ އެވެ. 

ގޯތި ލިބޭނެ މީހުންގެ ނަންތައް މޭމަހު އާންމު ކުރާނެ ކަމަށާއި، އަދި ޖޫން މަހު ގޯތިތައް ދޫކުރާނެކަމަށް މިނިސްޓަރު އަސްލަމް މީގެ ކުރިންވެސް ވިދާޅުވެފައިވާއިރު، މޭމަސްވެން ނިމެން ކައިރިވެފައިވާއިރު، އެ މަސައްކަތް އޮތީ ކިހާ ހިސާބަކުކަން ސާފުކޮށްދެއްވުމަށް އާޒިމް ވަނީ ވިދާޅުވެފަ އެވެ. 

Advertisement

އާޒިމްގެ އެ ސުވާލާއި ގުޅިގެން މިނިސްޓަރު ވިދާޅުވީ ގޯތި ދޫކުރުމަށް ހަމަޖެހިފައިވާ ތާރީހަށް އަދި ބަދަލެއް ނާންނަކަމަށެވެ. 

އެގޮތުން ކުރިންވެސް އޮތް ގޮތަށް ޖޫން މަހުގައި ގޯތި ދޫކުރަން ފަށާނެކަމަށް މިނިސްޓަރު ވިދާޅުވިއެވެ.

އެހެން ނަމަވެސް ގޯތި ލިބޭ ފަރާތްތަކުގެ ލިސްޓު އާންމުކުރާނެ ދުވަހެއް މިނިސްޓަރު ހާމަކުރައްވާފައެއް ނުވެއެވެ. 

މިނިސްޓަރުގެ އެ ޖަވާބާއި ގުޅިގެން މަޖިލީހުގެ ރައީސް މުޙައްމަދު ނަޝީދު ވަނީ އެކަމާއި ގުޅޭ އިތުރު ތަފްސީލުތައް ހާމަކުރެއްވުމަށް އެދިވަޑައިގެންފައެވެ. 

އެހެން ނަމަވެސް މިނިސްޓަރު އިތުރު ތަފްސީލެއް ދެއްވާފައެއް ނުވެއެވެ. ވިދާޅުވީ ޖޫން މަހު ގޯތި ދޫކުރާނެކަމަށެވެ. 

ރައްޔިތުންގެ މަޖިލީހުގެ ފުރަތަމަ ދައުރުގައި ވާހަކަދައްކަވަމުން ވެސް މިނިސްޓަރު އަސްލަމް ވަނީ މާލޭގެ ރަށްވެހިންނަށް ދިމާވެފައިވާ ބޯހިޔާވަހިކަމުގެ މައްސަލައަށް ނިމުމެއް ގެނެސްދީ އެ ރައްޔިތުންނަށް ގޯއްޗާއި ފްލެޓް ލިބޭނެކަމުގެ ޔަގީންކަން ދެއްވާފަ އެވެ. 

މާލޭ ސިޓީގެ ރައްޔިތުންނަށް ގޯއްޗާއި ފްލެޓު ދިނުމަށް ހިންގާ ސްކީމްގެ ދަށުން، މާލެ ސަރަހައްދުން ދޫކުރާ ގޯތީގެ އަދަދު އިތުރު ކުރުމަށް ނިންމާފައިވާކަން މިއަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙްވަނީ ހާމަކުރައްވާފައެވެ.

ބިންވެރިޔާ އަދި ގެދޮރުވެރިޔާ ސްކީމާ ގުޅޭގޮތުން ރިޔާސީ ބަޔާން އިއްވަވަމުން ރައީސް ސާލިޙް ވާހަކަފުޅުދައްކަވާފައިވާއިރު، މާލޭގެ ރައްޔިތުންނަށް ގޯތި ދޫކުރުމަށް ހުޅުވާލި ފުރުސަތުގައި 15،000 އަށްވުރެ ގިނަ ފޯމުވަނީ ހުށައަޅާފައެވެ.