މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގެ ފައިނަލުގައި 1-1 އެއްވަރުވެ، ޕެނަލްޓީގައި 3-2 ގެ ނަތީޖާއަކުން ދިގަލި މޯލްޑިވްސް ބަލިކޮށް މުބާރާތުގެ ޗެމްޕިއަންކަން ޔޫ އެންޑް މީ އިން ހޯދައިފިއެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަމަ ލަނޑުޖަހައި ކުރިހޯދީ ޔޫ އެންޑް މީ އިންނެވެ. މިލަނޑު އެޓީމަށް ކާމިޔާބުކޮށްދިނީ އަހުމަދު މިފްރާހް އެވެ. މިއީ ދިގަލި ޕެނަލްޓީ އޭރިއާ ބޭރުން ލިބުނު ބޯޅައެއް ކައިރީގައި ހުރި ކުޅުންތެރިއާ ކައިރިން ނައްޓާލުމަށް ގޯލުގެ މަތީ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ޔޫ އެންޑް މީ ކުރީގައި އޮވެގެންނެވެ.

ދެވަަނަ ހާފުގައި ދިގަލި މޯލްޑިވްސް އިން ވަނީ އެޓީމުގެ ކުޅުން ރަނގަޅުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ ކެޕްޓަން މުހައްމަދު މަމްދޫހު އެވެ. ދެވަނަ ހާފުގައި ދެޓީމަށް ވެސް ލަނޑުޖަހާނެ ރަގަޅު ހުސް ފުރުސަތުތަކެއް ލިބުނު ނަމަވެސް މެޗުގެ ފުރަތަަމަ ވަގުތު ހަމަވިއިރު ދެޓީމުންކުރެ ޓީމަކަށް އިތުރު ލަނޑެއް ކާމިޔާބު ކުރެވޭގޮތެއް ނުވިއެވެ. މިއާއެކު ނަތީއްޖާނެރުމަށް ޖެހި ޕެނަލްޓީގައި ދިގަލި މޯލްޑިވްސްގެ ހަ ޕެނަލްޓީ ގެތެރެއިން އެޓީމަށް ކާމިޔާބު ކުރެވުނީ ދެ ޕެނަލްޓީއެވެ. ޔޫ އެންޑް މީ އިން ޖެހި ހަ ޕެނަލްޓީގެ ތެރެއިިން އެޓީމުން ވަނީ ތިން ޕެނަލްޓީ ކާމިޔާބުކޮށް މުބާރާތުގެ ޗެމްޕިއަންކަން ހޯދާފައެވެ.

މުބާރާތުގެ އެންމެ މޮޅު ފަސް ކުޅުންތެރިންނަށް ހޮވުނީ އިބްރާހިމް ނަދީމް، ޖަޒުލާން އަބްދުﷲ، މުހައްމަދު މަމްދޫހު، މުހައްމަދު އިސާމް އަދި މުހައްމަދު އިރުޝާމް އެވެ. މުބާރާތުގެ އެންމެ މޮޅު ކޯޗަށް ހޮވުނީ މުހައްމަދު މަމްދޫހު އެވެ. އަދި މުބާރާތުގެ ފެއާޕްލޭ ޓީމަކަށް ހޮވުނީ  މީދުއްޕަރު މޯލްޑިވްސް އެވެ.

މުބާރާތުގެ އެންމެ ގިނަ ލަނޑުޖެހި ކުޅުންތެރިއަކަށް ހޮވުނީ ޖޯލިބީއިންގެ އަބްދުﷲ ހަނީފު އެވެ. އޭނާ ވަނީ މި މުބާރާތުގައި 10 ލަނޑު ކާމިޔާބުކޮށްފައެވެ. އަދި މުބާރާތުގެ އެންމެ ޝަރަފްވެރި މަގާމް ކިންގް އޮފް ދަ ޓޯނަމަންޓަށް ހޮވުނީ ދިގަލި މޯލްޑިވްސްގެ މުހައްމަދު އިރުޝާމް އެވެ