ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ނޯތު މާލޭ ޒޯނުގައި މިއަދު ހަވީރު ކުޅެވުނު ފުރަތަމަ މެޗުގައި ގުރޫޕް "އޭ" ގައި 5-7 ގެ ނަތީޖާއަކުން ވަރު ބަލިކޮށް ޕަޓީނާ އިން ކުޅުނު ދެވަަނަ މެޗުވެސް ކާމިޔާބުކޮށްފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ޕަޓީނާ އިންނެވެ. މި ލަނޑު މެޗު ފެށިގެން ތިންވަނަ މިނެޓުގައި ކާމިޔާބުކޮށްދިނީ އެޓީމުގެ އިބްރާހިމް ނާއިޝް އެވެ. އަދި އޭގެ ތިން މިނެޓު ފަހުން އެޓީމުގެ އިބްރާހިމް ވަޖީހު ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. 

ޕަޓީނާ އިން ދެ ލަނޑުގެ ލީޑެއްގައި ވަނިކޮށް ގާތްގާތުގައި ދެ ލަނޑު ކާމިޔާބުކޮށް ވަރު ޓީމުން މެޗުގެ ނަތީޖާ އެއްވަރުކުރި އެވެ. މި ގޮތުން އެޓީމުގެ ފުރަތަމަ ލަނޑު 09 ވަނަ މިނެޓުގައި އަހުމަދު ޒަމީމް ކާމިޔާބުކޮށްދިންއިރު، އޭގެ މިނެޓެއް ފަހުން އެޓީމުގެ އަހުމަދު ފިރުޝާން ވަނީ ލަނޑެއް ކާމިޔާބުކޮށް އެޓީމަށް ނަތީޖާ އެއްވަރުކޮށްދީފައެވެ.

ޕަޓީނާއަށް ދެވަނަ ފަހަރަށް މެޗުގެ ލީޑު ހޯދައިދިނީ 13 ވަނަ މިނެޓުގައި މުހައްމަދު ހާޒިމް ރިފްއަތު އެވެ. އަދި އޭގެ ފަސް މިނެޓު ފަހުން އެޓީމުގެ އިބްރާހިމް ރައްޒާން ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. ނަމަވެސް ފުރަތަމަ ހާފު ނިމުމުގެ ކުރިން ވަރުގެ އަހުމަދު ޒަމީމް ލަނޑެއް ކާމިޔާބުކޮށް ނަތީޖާގެ ފަރަގު އެޓީމަށް ކުޑަކޮށްދިނެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 4-3 ގެ ނަތީޖާއަކުން ޕަޓީނާ ކުރީގައި އޮވެގެންނެވެ.

ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މެޗުގެ 29 ވަނަ މިނެޓުގައި ވަރުގެ އަހުމަދު ޒަމީމް ވަނީ މި މެޗުގައި އޭނާގެ ހެޓްރިކް ފުރިހަމަކޮށް، ދެވަނަ ފަހަރަށް އެޓީމަށް މެޗުގެ ނަތީޖާ އެއްވަރުކޮށްދީފައެވެ. ނަމަވެސް އޭގެ ހަތަރު މިނެޓު ފަހުން ޕަޓީނާ އިން މި މެޗުގައި ތިންވަނަ ފަހަރަށް ލީޑު ނެގިއެވެ. މިލަނޑު އެޓީމަށް ކާމިޔާބުކޮށްދިނީ އިބްރާހިމް ނާއިޝް އެވެ.

މި މެޗުގައި ޕަޓީނާ އިން ކާމިޔާބުކުރި 06 ވަނަ ލަނޑަކީ މެޗު ނިމެން މިނެޓަކަށް ވެފައިވަނިކޮށް ވަރުގެ ކީއްޕަރު ހަސަން މުނާޒު އަތުން ބައިކޮޅަށް ވަން ލަނޑެކެވެ. ނަމަވެސް ޖެހިގެން އައި މިނެޓުގައި ވަރުގެ އަލީ މިސްބާހް ވަނީ  އަނެއްކާވެސް އިތުރު ލަނޑެއް ކާމިޔާބުކޮށް މެޗުގެ ނަތީޖާ 6-5 އަށް ބަދަލުކޮށްފައެވެ.

ޕަޓީނާ އިން މި މެޗުގައި ކާމިޔާބުކުރި 07 ވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ އިބްރާހިމް އަފްލާހް އެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ އެފްސީ ޕަޓީނާގެ ޖޯޒީ ނަންބަރު 11 އިބްރާހީމް އަފްލާހް އެވެ.

މި މެޗުން ލިބުނު ތިން ޕޮއިންޓާއެކު އެކު ކުޅުނު ދެ މެޗުން ޕަޓީނާ އަށް 06 ޕޮއިންޓް ލިބިފައިވާއިރު، ފަސް ޓީމު ހިމެނޭ މި ގުރޫޕްގައި ވަރު ކުޅުނު ދެ މެޗުން ވެސް އެޓީމު ވަނީ ބަލިވެފައެވެ.