ސައުދީ ޕްރޮފެޝަނަލް ލީގުގެ މިރޭ އަމިއްލަ ދަނޑުގައި ފަހަތުން އަރައި ތިން ލަނޑު ކާމިޔާބުކޮށް 3-2 ގެ ނަތީޖާއަކުން އަލް ޝަބާބް ބަލިކޮށް އަލް ނަސްރު ލީގު ޗެމްޕިއަންކަން ހޯދުމުގެ އުންމީދު ދަމަހައްޓައިފި އެވެ.

މިރޭގެ މެޗުގެ ފުރަތަަމަ ހާފުގައި އަލް ޝަބާބް އިން ދެލަނޑުގެ ލީޑެއް ހޯދިއިރު، އެޓީމުގެ ފުރަތަަމަ ލަނޑު ލިބުނު ޕެނަލްޓީއަކުން ކާމިޔާބުކޮށްދީ އެޓީމުގެ އާޖެންޓީނާ މިޑްފީލްޑަރު  ކްރިސްޓިއަން ގުއަންކާ އެވެ. މިއީ ފުރަތަމަ ހާފުގެ 25 ވަނަ މިނެޓުގައި އަލް ނަސްރުގެ ޕެނަލްޓީ އޭރިއާ ތެެރެއިން އެޓީމުގެ ބްރެޒިލް މިޑްފީލްޑަރު ލުއިސް ގުސްޓާވޯ އަތުގައި ބޯޅަ ޖެހުމުން ރެފްރީ އެޓީމަށް ދިން ޕެނަލްޓީއެކެވެ.

ފުރަތަަމަ ހާފުގައި މެޗުގެ ނަތީޖާ އެއްވަރުކުރުމަށް އަލް ނަސްރުން އެންމެ ހުސް ފުރުސަތެއް ލިބުނީ އެޓީމުގެ ކެޕްޓަން ކްރިސްޓިއާނޯ ރޮނާލްޑޯއަށެވެ. އެގޮތުން ފުރަތަމަ ހާފުގެ 32 ވަނަ މިނެޓުގައި އަލް ޝަބާބްގެ ޕެނަލްޓީ އޭރިއާ ތެެރެއިން ރޮނާލްޑޯ ބޮލުން ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ.

Advertisement

އަލް ޝަބާބް އިން މި މެޗުގައި އެޓީމުން ކާމިޔާބުކުރި ދެވަނަ ލަނޑު ފުރަތަަމަ ހާފުގެ 40 ވަނަ މިނެޓުގައި ކާމިޔާބުކޮށްދިނީ ވެސް އެޓީމުގެ ފުރަތަަމަ ލަނޑު ކާމިޔާބުކޮށްދިން ގުއަންކާއެވެ. ނަމަވެސް ފުރަތަަމަ ހާފު ނިމުމުގެ ކުރިން އަލް ނަސްރުގެ ބްރެޒިލް މިޑްފީލްޑަރު އެންޑަސަން ޓަލިސްކާ ވަނީ ލަނޑެއް ކާމިޔާބުކޮށް އެޓީމަށް ނަތީޖާ ފަރަގު ކުޑަކޮށްދީފައެވެ. މިއީ އެޓީމުގެ އަލީ އަލް ހަސަން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން އަލް ޝަބާބް ކުރީގައި އޮވެގެންނެވެ.

ދެވަނަ ހާފު ފެށިގެން ހަވަނަ މިނެޓުގައި އަލް ނަސްރަށް މެޗުގެ ނަތީޖާ އެއްވަރުކޮށްދިނީ އެޓީމުގެ ސައުދީ މިޑްފީލްޑަރު އަބްދުއްރަހުމާން ގަރީބު އެވެ. މިއީ އެޓީމުގެ އަލީ އަލް ހަސަން އަރިމަތިން އަލް ޝަބާބްގެ ގޯލްއޭރިއާ ތެރެއަށް ހުރަސްކޮދިން ބޯޅައެއް ކޮންޓްރޯލް ކުރުމަށް ފަހު ވަރަށް ހަމަޖެހިލާފައި ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުން އަލް ނަސްރު މޮޅުވި ލަނޑު ދެވަނަ ހާފުގެ 59 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން ކްރިސްޓިއާނޯ ރޮނާލްޑޯ އެވެ. މިއީ އަލް ޝަބާބްގެ ހާފު މެދަށްވުރެ ޕެނަލްޓީ އޭރިއާ ކައިރިން އެޓީމުގެ ބްރެޒިލް މިޑްފީލްޑަރު ލުއިސް ގުސްޓާވޯ ތަނަވަސްކޮށްދިން ފުރުސަތެއްގައި ޕެނަލްޓީ އޭރިއާގެ ބޭރުން ފޮނުވާލި ބާރު ހަމަލާއެއް ގޯލުގެ ދުރު ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި މިއީ މިސީޒަނުގައި ލީގުގައި ރޮނާލްޑޯ ކުޅުނު 15 މެޗުގައި އޭނާ ކާމިޔާބުކޮށްދިން 14 ވަނަ ލަނޑެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 28 މެޗު ކުޅެގެން އަލް ނަސްރަށް 63 ޕޮއިންޓް ލިބިފައިވާއިރު، އެއްވަނައިގައި އޮތް އަލް އިއްތިހާދަށް 28 މެޗު ކުޅެގެން ލިބިފައިވަނީ 66 ޕޮއިންޓެވެ. ލީގުގައި ކޮންމެ ޓީމަކަށް ބާކީ ދެ މެޗު އޮތްއިރު، ޕޮއިންޓްގެ ގޮތުން ދެޓީމު އެއްވަރުވެއްޖެނަމަ ޗެންޕިއަންކަން ލިބޭނީ މި ދެޓީމުގެ ލީގުގައި ކުޅުނު ދެ މެޗުގެ ނަތީޖާއިން ކުރި ލިބޭ ޓީމަކަށެވެ.

ލީގުގައި މި ދެޓީމު ވާދަކުރި ފުރަތަމަ މެޗު 0-0 ގެ ނަތީޖާއަކުން އެއްވަރުވިއިރު، ދެވަނަ މެޗު 1-0 ގެ ނަތީޖާއަކުން ކާމިޔާބުކުރީ އަލް އިއްތިހާދު އެވެ. ވުމާއެކު ޕޮއިންޓްގެ ގޮތުން ދެޓީމު އެއްވަރުވެއްޖެނަމަ ލީގު ޗެމްޕިއަންކަން ލިބިގެންދާނީ އަލް އިއްތިހާދަށެވެ.