ކުރީގެ ރައީސް މައުމޫން އަބްދުލްޤައްޔޫމް އިސްވެ ހުންނަވައި އުފެއްދެވި ސިޔާސީ ޕާޓީ, މޯލްޑިވްސް ރިފޯމް މޫވްމަންޓް, އެމްއާރްއެމް އުވާލަން އިލެކްޝަންސް ކޮމިޝަނުން ނިންމައިފި އެވެ.

މައުލޫމާތު ލިބިފައިވާ ގޮތުގައި އެ ޕާޓީ އުވާލާފައިވަނީ ސިޔާސީ ޕާޓީތަކުގައި މަދުވެގެން ތިބެންޖެހޭ މެންބަރުން ކަމުގައިވާ 3000 މެންބަރުން ހަމަނުވުމުންނެވެ. 

ޕާޓީ އުވާލުމަށް އީސީން ނިންމިކަން އެ ޕާޓީގެ ރައީސް ފާރީސް މައުމޫންވެސް ވަނީ ކަށަވަރުކޮށްދެއްވާފައެވެ. އަދި އޭނާ ވަނީ އެ ނިންމުމަކީ ކޮރަޕްޓް ނިންމުމެއްކަން ފާހަގަކުރައްވައި ހިމޭންކަމާއި އެކު ތިބުމަށް ޕާޓީގެ މެންބަރުންގެ ކިބައިން އެދި ލައްވާފައެވެ. އެކަމާއި ގުޅިގެން އެ ޕާޓީގެ ޒަޢީމް މައުމޫން އަބްދުލްޤައްޔޫމް ވަނީ އެއީ ވަރަށް ކޮރަޕްޓް ނިންމުމެއް ކަމަށް ވިދާޅުވެފައެވެ. އަދި އެ ނިންމުމާއި ދެކޮޅަށް ވަކާލާތު ކުރައްވާނެ ކަމަށްވެސް ވިދާޅުވި އެވެ. 

އެ ޕާޓީގައި 3000 މެންބަރުން ހަމަނުވެގެން ދެފަހަރެއްގެ މަތިން ނޯޓިން ދީފައިވެއެވެ. އެގޮތުން 2022 ވަނަ އަހަރުވެސް މެންބަރުން ހަމަ ކުރަން ނޯޓިސް ދިނުމުން، މުއްދަތު ތެރޭގައި ޕާޓީން ވަނީ މެންބަރުން ހަމަ ކޮށްފައެވެ. އެއަށްފަހު، އަނެއްކާވެސް އެ ޕާޓީގެ މެންބަރުންގެ އަދަދު 3000 އަށްވުރެ ދަށްވެފައި ވަނިކޮށް، ސަރުކާރުގެ ވުޒާރާތަކުގައި ތިބި އެ ޕާޓީއަށް ނިސްބަތްވާ ގިނަ މެންބަރުންވެސް ވަނީ ޕާޓީން ވަކިވެފައެވެ. 

އެ މެންބަރުން ޕާޓީން ވަކިވެފައި ވަނީ މިދިޔަ ފެބުރުއަރީ މަހުގެ ތެރޭގައި އެ ޕާޓީއަށް މެންބަރުން ހަމަކުރުމަށް ނޯޓިސްވެސް ދީފައިވަނިކޮށެވެ. އެގޮތުން ޕާޓީއަށް ދިން ދެވަނަ ނޯޓިސްގެ މުއްދަތު ހަމަވީ މިދިޔަ ބުދަ ދުވަހަށެވެ. 

އިލެކްޝަންސް ކޮމިޝަނުގެ ވެބްސައިޓުގައިވާ މައުލޫމާތަށް ބަލާއިރު ފެބުރުއަރީއާ ހަމައަށް މެމްބަރުންގެ އަދަދަކީ 2،981 އެވެ.