މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު އިސްވެ ހުންނަވައިގެން އުފައްދެވި ފިކުރެއްގެ ދިރުން ގޮފިން އުފައްދަން ނިންމާފައިވާ ޕާޓީ ކަމުގައިވާ "ދި ޑިމޮކްރެޓްސް" އުފެއްދުމުގެ ހުއްދަ އިލެކްޝަންސް ކޮމިޝަން (އީސީން) ދީފިއެވެ.

އެ ހުއްދަ ދިނުމަށް އީސީން މިއަދު ބޭއްވި ބައްދަލުވުމެއްގައި އީސީގެ ނައިބުރައީސް އިބްރާހިމް ހަބީބު ވިދާޅުވީ، ޕާޓީއަށް މަދުވެގެން 3000 މެމްބަރުން ހަމަކުރުމަށްޓަކައި ތިން މަސް ލިބިގެންދާނެ ކަމަށާއި އެ އަދަދަށް މެމްބަރުން ހަމަ ކުރުމުން ޕާޓީ އުފެއްދުމަށް ބާއްވާ ބައްދަލުވުމަށް އެ ޕާޓީއަށް ދައުވަތު ދޭނެ ކަމަށެވެ.

އެމްޑީޕީގެ ފިކުރެއްގެ ދިރުމުގެ ގޮފީގެ އައު ސިޔާސީ ޕާޓީ އުފައްދަން ބޭނުންވާ ހުއްދައަށް އެދި އިލެކްޝަންސް ކޮމިޝަނަށް ފޯމު ހުށަހަޅާފައި ވަނީ އާދީއްތަ ދުވަހުއެވެ.

Advertisement

އެއަށްފަހު އެ ގޮފީގެ ފަރާތުން މީޑިއާއަށް މައުލޫމާތު ދެއްވަމުން ގޮފީގެ ސްޕޯކްސްޕާސަން އަދި އެލްޖީއޭގެ ކުރީގެ ސީއީއޯ އަފްޝަން ވަނީ އަލަށް އުފައްދާ ޕާޓީއަށް ކިޔުމައް ހަމަޖެހިފައިވާ ނަމަކީ "ދި ޑިމޮކްރެޓްސް" ކަމަށް ވިދާޅުވެފައެވެ. 

އެ ނަމާއި ގުޅިގެން ވާހަކަ ދައްކަވަމުން އަފްޝަން ވިދާޅުވީ، އެ ޕާޓީ އުފެދުނީ ރާއްޖޭގައި ޑިމޮކްރަސީގެ ހަމަތަކާއި އުސޫލުތައް ގާއިމް ކުރުމަށް ކަމަށެވެ. އަދި ޕާޓީގެ ނަން ކަނޑައަޅާފައިވަނީވެސް އެ އުސޫލުގެ މަތިން ވަރަށް ގިނަ ފަރާތްތަކުގެ ޚިޔާލާއި މަޝްވަރާ ހޯދުމަށްފަހުގައި ކަމަށް އޭނާ ވިދާޅުވި އެވެ. 

އަދި މީގެ އިތުރުން، އަފްޝަން ވިދާޅުވީ، ޕާޓީގެ ހުރިހާ ކަމެއްވެސް ކުރިއަށް ދާނީ ނަމާއި އެއްފަދައިން ޑިމޮކްރަސީގެ ހަމަތަކާއި އުޞޫލުތަކުގެ މަތިން ކަމަށެވެ. އަފި ޕާޓީގެ މަސައްކަތް ކުރާނީ އިގްތިޞާދީގޮތުން ރައްޔިތުންނަށް ތަނަވަސްކަން ހޯދައި ދިނުމަށް ކަމަށްވެސް އޭނާ ވިދާޅުވި އެވެ. 

ސަރުކާރު ހިންގާ މައި ޕާޓީ، އެމްޑީޕީ މިހާރު ހިނގަމުންދަނީ ޕާޓީ އުފެއްދި އަސާސްތަކާއި ޚިލާފަށް ކަމަށް ބުނެ އެމްޑީޕީގައި ހިމެނޭ ގިނަ މެންބަރުން ތަކެއް އެ ޕާޓީން ކެނޑި، އައު ޕާޓީއެއް އުފައްދަވާނެ ކަމަށް އިއުލާން ކުރީ ފާއިތުވި ބުދަ ދުވަހުއެވެ. 

އެއަށްފަހު އެ ޕާޓީއަށް ކިޔާނެ ނަމަކާއި މެދު އާއްމުންގެ މަޝްވަރާވެސް ވަނީ ހޯދާފައެވެ. 

ދި ޑިމޮކްރެޓްސް އުފެއްދުމުގެ ހުއްދަ އިލެކްޝަންސްއިން ދީފައި ވާއިރު، އެ ޕާޓީން މިއަހަރުގެ ރިޔާސީ އިންތިހާބުގައި ވާދަކުރަންވެސް ވަނީ ނިންމާފައެވެ.