ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ނޯތު މާލޭ ޒޯނުގައި މިއަދު ހަވީރު ކުޅެވުނު ފުރަތަމަ މެޗުގައި ގުރޫޕް "ބީ" ގައި ބަނޑޮސް ދެ ލަނޑު ކާމިޔާބުކޮށްފައި ވަނިކޮށް ފަހަތުން އަރައި ތިން ލަނޑު ކާމިޔާބުކޮށް ހިލްޓަން އިން ކުއާޓާ ފައިނަލުގެ ޖާގައެއް ކަށަވަރުކޮށްފިއެވެ.

މި މެޗަށް ނުކުތްއިރު މެޗު އެއްވަރުކޮށްލައިގެން ވެސް ކުއާޓާގެ ފުރުސަތު ކަށަވަރު ކުރެވެން އޮތް ބަނޑޮހުން ފުރަތަަމަ ހާފުގައި ރަގަޅު ކުޅުމެއް ދެއްކި އިރު، މި މެޗުގައި ފުރަތަަމަ ލަނޑުޖަހައި ކުރިހޯދީ ވެސް އެޓީމުންނެވެ. މި ލަނޑު ފުރަތަމަ ހާފުގެ 10 ވަނަ މިނެޓުގައި ކާމިޔާބުކޮށްދިނީ އެޓީމުގެ މުހައްމަދު އިކްރާމް އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ބަނޑޮސް ކުރީގައި އޮވެގެންނެވެ.

ދެވަަނަ ހާފު ފެށިގެން ފުރަތަމަ މިނެޓުގައި ބަނޑޮހުން ލަނޑެއް ކާމިޔާބުކޮށް އެޓީމުގެ ލީޑު ފުޅާކުރި އެވެ. މި ލަނޑު އެޓީމަށް ކާމިޔާބުކޮށްދިނީ އަހުމަދު ޝަމީމް އެވެ. ނަމަވެސް އޭގެ ތިން މިނެޓު ފަހުން ހިލްޓަންގެ އަބްދުލް މުއްތަލިބު އިސްމާއިލް ލަނޑެއް ކާމިޔާބުކޮށް އެޓީމަށް ނަތީޖާ ފަރަގު ކުޑަކޮށްދިނެވެ.

ހިލްޓަން އިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 27 ވަނަ މިނެޓުގައި ކާމިޔާބުކޮށްދިނީ އެޓީމުގެ އިބްރާހިމް ރަޝީދު އެވެ. އަދި އޭގެ ފަސް މިނެޓު ފަހުން އިބްރާހީމް ރަޝީދު ވަނީ އިތުރު ލަނޑެއް ކާމިޔާބުކޮށް މި މެޗުގައި ފުރަތަަމަ ފަހަރަށް އެޓީމަށް ލީޑު ހޯދައިދީފައެވެ. މިއާއެކު މެޗުގެ ކުޅުން ނިމިގެންދިޔައީ 3-2 ގެ ނަތީޖާއަކުން ހިލްޓަން މޮޅުވެގެންނެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ ހިލްޓަންގެ އިބްރާހީމް ރަޝީދު އެވެ.

މި މެޗުން ލިބުނު ތިން ޕޮއިންޓާއެކު ކުޅުނު ތިން މެޗުން ހިލްޓަން އަށް ހަ ޕޮއިންޓް ލިބިފައިވާއިރު، މި މެޗުން ބަލިވި ބަނޑޮހަށް ވެސް ތިން މެޗު ކުޅެގެން ވަނީ ހަ ޕޮއިންޓް ލިބިފައެވެ. އަދި ލަނޑުގެ ތަފާތުން ގުރޫޕް ބީ ގެ އެއްވަނައިގައި މިވަގުތު އޮތީ ބަނޑޮހެވެ. މި ގުރޫޕުން މިދެޓީމަށް ވެސް މުބާރާތުގެ ކުއާޓާ ފައިނަލުގެ ޖާގައެއް ކަށަވަރުވެފައިވާއިރު މި ގުރޫޕްގެ ތިންވަނަ ލިބުނީ ކާލްޓަން އަށެވެ އެޓީމަށް ހަތަރު ޕޮއިންޓް ލިބިފައިވާއިރު، ގުރޫޕްގެ ފުލަށް ދިޔަ ރަސްފުއްޓަށް ލިބުނީ އެންމެ ޕޮއިންޓެކެވެ.

ރިސޯޓް ލީގު 2023 ގެ ނޯތު މާލޭ ޒޯނުގައި މިއަހަރު 17 ޓީމެއް ބައިވެރިވެފައި ވާއިރު، މި ޒޯނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ހަތަރު ގުރޫޕަކަށް ބަހާލައިގެން ކޮންމެ ގްރޫޕަކުން ވެސް އެންމެ ރަގަޅު ނަތީޖާއެއް ހޯދާ ދެޓީމު ކުއާޓާ ފައިނަލަށް ހޮވޭގޮތަށެވެ. 

މި ޒޯނުގެ ހުރިހާ މެޗެއްވެސް ވަން އެންޑް އޮންލީ ރީތިރަށުގައި ކުޅުމަށް ހަމަޖެހިފައިވާއިރު، ގުރޫޕް "އޭ" ގައި ފަސް ޓީމު ހިމެނޭއިރު، އަނެއް ތިން ގުރޫޕްގެ ތެރެއިިން ކޮންމެ ގުރޫޕެއްގައި ހިމެނެނީ ހަތަރު ޓީމެވެ.