ކަޅުދަބަސް ހިފައިގެން ނުކުމެ ދިމާވާ ކޮންމެ މީހަކަށް އެއްޗެއް ދީގެން ޕާޓީއަށް ގިނަ ފޯމް ތަކެއް ފުރާކަށް އެބޭފުޅުންނަކަށް ވެސް އުނދަގުލެއް ނުވާނެ ކަމަށް މިއަދު އުވާލެވުނު އެމްއާރްއެމްގެ ރައީސް ފާރިސް މައުމޫން ވިދާޅުވެއްޖެއެވެ.
ފާރިސް މިހެން ވިދާޅުވީ އެމްއާރްއެމް އުވާލުމާއި ގުޅިގެން ބޭއްވުނު ނޫސްވެރިންގެ ބައްދަލުވުމެއްގައެވެ.
"އަޅުގަނޑުމެން އެކަން (ކަޅުދަބަސް ހިފައިގެން ނުކުމެ ދިމާވާ ކޮންމެ މީހަކަށް އެއްޗެއް) އެގޮތަށް ކުރަން ބޭނުން ނުވަނީ، އެކަން އެގޮތަށް ކުރަން ފަށާ ދުވަހު އެހެންމީހުންނެކޭ އަޅުގަނޑުމެންނެކޭ އެއްވެސް ތަފާތެެއް ނުހުންނާނެ" ފާރިސް ވިދާޅުވިއެވެ.
ފާރިސް ވިދާޅުވީ އެޕާޓީ ނެތި ދިޔަޔަސް ދާނީ އެގޮތުގައި ތިއްބަވައިގެން ކަމަށެވެ. އަދި ޕާޓީ ނެތިދިޔުން އޮތް ކަމަށް ޤަބޫލު ނުކުރައްވާ ކަމަށް ފާރިސް ވިދާޅުވިއެވެ. ފާރިސް ވިދާޅުވީ މިމަސައްކަތުގައި ތާއީދާއި ހިތްވަރު ރައްޔިތުންގެ ކިބައިން ލިބޭ ކަމަށެވެ.
ސިޔާސީ ފަރާތަކަށް އެބޭފުޅުން އެކުރާ މަސައްކަތަކީ ރަނގަޅު މަސައްކަތެކޭ ބުނުން މަނާ ވެދާނެ ކަމަށާއި، އަދި އެހެން ބުނާ މީހާއަށް ސިޔާސީ ގޮތުން "ޗެލެންޖަސް" ތަކެެއް ދިމާވެދާނެ ކަމަށް ފާރިސް ވިދާޅުވިއެވެ.
"އެހެން ސިޔާސީ ޕާޓީތަކުން މި މަސައްކަތް ފަށައިފިއްޔާ އަޅުގަނޑުމެން ވަރަށް އުފާވާނެ، އަޅުގަނޑު މެން ބޭނުންވަނީ އެހެން ސިޔާސީ ލީޑަރުންވެސް، އެހެން ސިޔާސީ ޕާޓިތަކުންވެސް މިވާހަކަތައް ފާޅުގަ ދައްކަން، ތިމަންނަމެން ދޫކޮށްލާނަމޭ ނުފޫޒު ފޯރުވާ ބައި ތިމަަންމެން ދޫކޮށްލާނަމޭ، ރައްޔިތުންނަށް، ރައްޔިތުންގެ ހައްޤުގަ މިނިވަންކަމާއި އެކު ގޮތް ނިންމަން ފުރުސަތު ދޭނަމޭ، އެހެނެއް ނުބުނެވޭ ދެެއްތޯ" ފާރިސް ވިދާޅުވިއެވެ.
ފާރިސް ވިދާޅުވީ މީހުން ޕާޓީތަކަށް ތާއީދު މިކުރަނީ ކޮންމެވެސް އެެއްޗެއް ދޭނެތީ ކަމަށާއި، ކޮންމެވެސް ވަޒީފާއެއް ލިބޭނެތީ ޕާޓީގައި ތިބެނީ ކަމަށެވެ. ފާރިސް ވިދާޅުވީ މިގޮތައް ކަންކަން ބަހައްޓަން ބޭނުންވާ ބަޔަކީ ހަޤީޤީ އިންސާފު ހަޤީޤީ އިސްލާހު ގެނެވޭނެ ބައެއްތޯ ސުވާލު އުފައްދަން ޖެހޭ ކަމަށެވެ.
ފާރިސް މިހެން ވިދާޅުވެފައި މިވަނީ އެމްއާރްއެމް އިން މެމްބަރުންތަކެއް މަދުވެ ޕާޓީ އުވާލައިފައިވާ ދަނޑިވަޅެެއްގައެެވެ. އަދި ޕާޓީ އުވާލެވިފައިވަނީ ޤަވާއިދުތަކާއި ޚިލާފަށް ކަމަށް ފާރިސް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
