ކޮޕާ އިޓާލިއާގެ ފައިނަލުގައި ރޭ ފިއޮރެންޓީނާ ލަނޑެއް ކާމިޔާބުކޮށް ލީޑު ހޯދާފައި ވަނިކޮށް ފަހަތުން އަރައި ދެލަނޑު ކާމިޔާބު އިންޓަ މިލާނުން މުބާރާތުގެ ޗެމްޕިއަންކަން ހޯދައިފި އެވެ. މިއީ މި މުބާރާތުގެ ޗެމްޕިއަންކަން އިންޓަ މިލާނުން ހޯދި ނުވަވަނަ ފަހަރެވެ.

ރޭގެ ފައިނަލް މެޗުގެ ވަރަށް ކުރީކޮޅު ފިއޮރެންޓީނާ އިން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މި ލަނޑު މެޗު ފެށިގެން ތިންވަނަ މިނެޓުގައި ކާމިޔާބުކޮށްދިނީ އެޓީމުގެ އާޖެންޓީނާ ފޯވާޑް ނިކޮލަސް ގޮންޒާލޭޒް އެވެ. އަދި އެޓީމުގެ ލީޑު ފުޅާކުރުމަށް 18 ވަނަ މިނެޓުގައި ގޮންޒާލޭޒަށް ލިބުނު ހުސް ފުރުސަތުގައި އޭނާ ފޮނުވާލި ހަމަލާ ދިޔައީ ހުރަސް ދަނޑިމަތިން ބޭރަށެވެ.

ފުރަތަަމަ ހާފުގެ 25 ވަނަ މިނެޓުގައި އިންޓަ މިލާންގެ ފޯވާޑް އެޑިން ޖެކޯ އަށް މެޗުގެ ނަތީޖާ އެރުކުރަށް ލިބުނު ހުސް ފުރުސަތުގައި އޭނާ ފޮނުވާލި ބޯޅަ ދިޔައީ ގޯލާއި އަމާޒުނުވެ ހުރަސް ދަނޑިމަތިން ބޭރަށެވެ.

އިންޓަ މިލާނުން މެޗުގެ ނަތީޖާ އެއްވަރުކުރި ލަނޑު ފުރަތަމަ ހާފުގެ 29 ވަނަ މިނެޓުގައި ކާމިޔާބުކޮށްދިނީ އެޓީމުގެ އާޖެންޓީނާ ފޯވާޑް ލައުޓާރޯ މާޓިނޭޒް އެވެ. މިއީ އެޓީމުގެ ކްރޮއޭޝިޔާ މިޑްފީލްޑަރު މާސެލޯ ބްރޯޒޯވިޗް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި އޭގެ 08 މިނެޓް ފަހުން މަޓިނޭޒް ވަނީ އިތުރު ލަނޑެއް ކާމިޔާބުކޮށް ފުރަތަމަ ފަހަރަށް މެޗުގެ ލީޑު އެޓީމަށް ހޯދައިދީފައެވެ.

ދެވަނަ ހާފުގައި އިންޓަ މިލާންގެ ލީޑު ފުޅާކުރުމަށް އެޓީމުގެ ބެލްޖިއަމް ފޯވާޑް ރޮމެލޫ ލުކާކޫ ލިބުނު ހުސް ފުރުސަތު އޭނާ ފޮނުވާލި ހަމަލާ ފިއޮރެންޓީނާގެ ކީއްޕަރު ދިފާއުކުރިއިރު، މިހާފުގައި ފިއޮރެންޓީނާ ޓީމުން އެންމެ ހުސް ފުރުސަތެއް ލިބުނީ އެޓީމުގެ ނިކޮލަސް ގޮންޒާލޭޒް އަށެވެ.

ދެވަނަ ހާފުގައި 74 ވަނަ މިނެޓުގައި ގޮންޒާލޭޒަށް ލިބުނު ހުސް ފުރުސަތުގައި އޭނާ ފޮނުވާލި ހަމަލާ އިންޓަ މިލާންގެ ކީއްޕަރު ސަމީރު ހަންޑަނޮވިޗް ވަނީ ދިފާއުކޮށްފައެވެ. އަދި އޭގެ މިނެޓެއް ފަހުން އެޓީމުގެ ކްރިސްޓިއާނޯ ބިރާގީ ބޮލުން ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ. މިއާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން އިންޓަ މިލާން ކުރީގައި އޮވެގެންނެވެ.