އިގިރޭސި ޕްރެމިއާ ލީގުގައި ރޭ އަމިއްލަ ދަނޑުގައި ބްރައިޓަން އިން ޗެންޕިއަން މެންޗެސްޓާ ސިޓީ މޮޅުވިޔަނުދީ ހިފަހައްޓައިފި އެވެ.

ރޭގެ މެޗުގެ ފުރަތަަމަ ހާފުގައި މެންޗެސްޓާ ސިޓީ އިން ގިނަވަގުތު ބޯޅަ ހިފަހައްޓައިގެން ކުޅުނު ނަމަވެސް ބްރައިޓަން އިން ވަނީ ލަނޑު ޖަހާނެ ރަގަޅު ގިނަ ފުރުސަތުތަކެއް ތަނަވަސްކޮށްފައެވެ. އެ ގޮތުން ފުރަތަަމަ ހާފުގައި މެންޗެސްޓާ ސިޓީގެ ގޯލާއި އަމާޒުކޮށް އެޓީމުން ފަސް ހަމަލާއެއް ފޮނުވާލި ނަމަވެސް މި މެޗުގައި ފުރަތަަމަ ލަނޑުޖަހައި ކުރިހޯދީ މެންޗެސްޓާ ސިޓީ އިންނެވެ.

ފުރަތަަމަ ހާފުގެ 25 ވަނަ މިނެޓުގައި މެންޗެސްޓާ ސިޓީއަށް މެޗުގެ ލީޑު ހޯދައިދިނީ އެޓީމުގެ އިގިރޭސި ފޯވާޑް ފިލް ފޯޑެން އެވެ. މިއީ އެޓީމުގެ ނޯވޭ ފޯވާޑް ހާލަންޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. ނަމަވެސް އޭގެ ހަ މިނެޓް ފަހުން ބްރައިޓަން އިން ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކުރި އެވެ.

ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެޓީމުގެ މިޓޯމާ އަތުގައި ބޯޅަ ޖެހިފައިވާތީ އެއީ ރަގަޅު ލަނޑެއް ނޫންކަމަށެވެ.

ފުރަތަަމަ ހާފު ނިމުމުގެ ކުރިން ބްރައިޓަން އިން މެޗުގެ ނަތީޖާ އެއްވަރުކުރި ލަނޑު 38 ވަނަ މިނެޓުގައި ކާމިޔާބުކޮށްދިނީ އެޓީމުގެ ޕެރަގުއޭގެ ފޯވާޑް ޖޫލިއޯ އެންސިސޯ އެވެ. މިއީ އެޓީމުގެ އިގިރޭސި ޑިފެންޑަރު ލެވީ ކޯލްވިލް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މެޗުން މޮޅުވުމަށް ދެޓީމަށް ވެސް ވަނީ މިހާފުގައި ލަނޑު ޖަހާނެ ރަގަޅު ހުސް ފުރުސަތުތަކެއް ލިބި ބޭނުންނުކުރެވިފައެވެ.

ދެވަނަ ހާފުގެ 79 ވަނަ މިނެޓުގައި މެންޗެސްޓާ ސިޓީގެ ކޯލް ޕާމަރ ތަނަވަސްކޮށްދިން ފުރުސަތެއްގައި ހާލަންޑް ލަނޑު ކާމިޔާބުކޮށް އެޓީމަށް ލީޑު ހޯދައިދިން ނަމަވެސް ވީއޭއާރުން ބެލުމަށްފަހު ރެފްރީ ނިންމީ ލަނޑު ޖެހުމުގެ ކުރިން ސިޓީގެ ކުޅުންތެރިއަކު ފައުލުކޮށްފައިވާކަމަށެވެ.

މިމެޗުން ލިބުނު އެއް ޕޮއިންޓާއެކު 37 މެޗު ކުޅެގެން ބްރައިޓަންއަށް ވަނީ 62 ޕޮއިންޓާއެކު އަންނަ ސީޒަނުގައި ޔުއެފާ ޔޫރޮޕާ ލީގުގެ ޖާގައެއް ކަށަވަރުވެފައެވެ.