ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާގައި ސަރުކާރާއި ރައީސް އިބްރާހިމް މުހައްމަދު ޞާލިހާއި ބައިވެރިވެވަޑައިގެންނެވި ކަމަށް ވިދާޅުވެ މަޖިލީހުގެ އިއްޔެގެ ޖަލްސާގައި "ދަ ޑިމޮކްރެޓްސް" ގެ  ބައެއް މެންބަރުން ކުރެއްވީ ކަނޑައެޅިގެން ދޮގު ތުހުމަތު ތަކެއް ކަމަށް ސަރުކާރުން ބުނެފި އެވެ.

ރައްޔިތުންގެ މަޖިލީހުގެ އިއްޔެގެ ޖަލްސާގައި ރައްޔިތުން މަޖިލީހުގެ ހެންވޭރު ހުޅަނގުދާއިރާގެ މެންބަރު ހަސަން ލަތީފް ވަނީ ޔާގޫތުގޭގައާއި މެރީބްރައުން ކައިރީ ވެސް ބޮމެއް ބާއްވައިގެން ގޮއްވާލަން އުޅުނުކަމުގެ މައުލޫމާތު ސަރުކާރަށް އެނގޭ ކަމަށް ވިދާޅުވެފައެވެ އަދި އެއީ ރައީސުލްޖުމްހޫރިއްޔާއަށް ނޭނގި ހިނގާ ކަންކަން ކަމަށް ދެކެވަޑައިގަންނަން ދަތިކަމަށްވެސް ހަސަން ވިދާޅުވި އެވެ.

"އަޅުގަނޑު މި ދަންނަވާ ވާހަކަ އަކީ އިއްޒަތްތެރި ރައީސް، މިތަނުގަ 241 ކޮމިޓީން، ސަލާމަތީ ހިދުމަތްތަކާ ބެހޭ ކޮމިޓީން ހިންގި އިންކުއަރީގަ ސާފުކޮށް އެބައޮތް އެނގެން، ކެނެރީގެ ހުންނަ ގޯޅީގާ ސައިކަލެއް ބަހައްޓާފާ އެ ސައިކަލުގަ ބޮމެއް ހަރުކޮށްފާ، ރައީސް ނަޝީދު ނުކުމެވަޑައިގަންނަވާ ގަޑީގާ އެ ބޮން ގޮއްވާލައިގެން ރައީސް ނަޝީދު މަރާލަން އުޅުނު ކަމުގެ މައުލޫމާތު ރައީސުލް ޖުމްހޫރިއްޔާއަށް އެނގިވަޑައިގަންނަވާ ކަމުގެ މައުލޫމާތު ވަނީ ލިބިފަ އިންކުއަރީއަށް" ހަސަން ލަތީފް ވިދާޅުވިއެވެ. 

ހަސަން ލަތީފް ގެ ވާހަކަތަކަށް ތާއީދު ކުރައްވައި މަޖިލީހުގެ ނާއިބު ރައީސް އީވާ އަބްދުالله ވެސް ވަނީ، ރައީސް ނަޝީދަށް ހަމަލާދޭން އުޅޭ ކަމުގެ މައުލޫމާތު ސަރުކާރަށް ކުރިން އެނގޭ ކަމަށާ، އެހެން ނަމަވެސް، އަޅާނުލި ކަމަށް ވިދާޅުވެފައެވެ. 

ރައީސް ނަޝީދަށް އޮތް ހަސަދައެއްގެ ސަބަބުން އެފަދަ ހަމަލާއެއް ދޭއިރު ކޮލޭޓަރަލް ޑެމޭޖް ނުވަތަ އެ ސަރަހައްދުގައި ތިބި އެހެން ބަޔަކަށް ވެދާނެ އަނިޔާއަކަށް ވެސް ބެލުމެއް ނެތްކަން ފާހަގަކުރައްވައި އީވާ ވަނީ ރައީސް ސޯލިހަކީ ގައުމަށް ނުރައްކަލެއް ކަމަށް ވިދާޅުވެފަ އެވެ.

"އިބްރާހީމް މުހައްމަދު ސޯލިހަކީ ދިވެހިރާއްޖެއަށް އޮތް ބޮޑު ނުރައްކަލެއް. ހަމައެކަނި ތަންދޮރު ނޭނގެނީކީ ނޫން، ބިރުވެރި ވެސް ކަމެއް. ހަމަ ބިރުވެރި ވެސް ކަމެއް،" އީވާ ވިދާޅުވި އެވެ.

އީވާގެ އިތުރުން މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ވެސް ވަނީ، ރައީސް ނަޝީދަށް އަމާޒުކޮށް ދިން ބޮމުގެ ހަމަލާއަކީ ރައީސް ޞާލިހު އަޑީގައި ހުންނަވައިގެން ކުރެއްވި ކަމެއް ކަމަށް ތުހުމަތު ކުރައްވާފައެވެ. 

"ރައީސް ނަޝީދު މަރާލަން ބޮން ގޮއްވާލި ސަރުކާރެއް. އޭގެ އަޑީގައި ހުރީ ރައިސުލްޖުމްހޫރިއްޔާ ކަމަށް މިއަދު އަޅުގަނޑަށް ސާފުވެއްޖެ،" ބޮންޑޭ ވިދާޅުވި އެވެ.

އެވާހަކަތަކަށް ރައްދުދެއްވައި މިއަދު ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ސަރުކާރުގެ ތަރުޖަމާނު މިއުވާން މުހައްމަދު ވަނީ އެއީ "ކަނޑައެޅިގެން ދޮގު" ތުހުމަތުތަކެއް ކަމަށް ވިދާޅުވެފަ އެވެ.

"އެއީ އެ ހަމަލާގެ ސީރިއަސްކަން ގެއްލުވާލައި ބަޔަކަށް ގެއްލިފައިވާ ސިޔާސީ ތާއީދު އަނބުރާ ހޯދުމުގެ ގޮތުން, ތާއީދު ހޯދިދާނެ ކަމަށް ދެކެވަޑައިގެން ބައެއް ބޭފުޅުން ދައްކަވާ ވާހަކަ. އެކަމުގައި ހަގީގަތެއް އޮތް ކަމަށްވާނަމަ މި ދެ ތިން ދުވަހު ރައްޔިތުންގެ މަޖިލީހުގެ ތަޅުމުގައި އެކަނި ކީއްވެގެންތޯ އެ ވާހަކަ ދައްކަވަންވީ," މިއުވާން ވިދާޅުވި އެވެ.

މިއުވާން ވިދާޅުވީ މީގެ ކުރިންވެސް އެ މެންބަރުންނަށް އެ ވާހަކަތައް ދެއްކެން އެކި ޕްލެޓްފޯމްތައް ލިބިފައިވާ ކަމަށެވެ. އެހެން ނަމަވެސް، އެވާހަކަތައް އޭރު ނުދައްކަވައި މިހާރު ދައްކަވާ ސަބަބު އެންމެހާ ފަރާތްތަކަށް ވެސް އެނގޭ ކަމަށް އޭނާ ވިދާޅުވި އެވެ. އަދި އެފަދަ ދޮގު ވާހަކަތައް ދައްކަވާނަމަ ކަމާބެހޭ ފަރާތްތަކަށް ހުށަހަޅައިގެން އެ މައްސަލަ ބައްލަވާނެ ކަމުގެ އިންޒާރު ވެސް އޭނާ ދެއްވި އެވެ. 

"ދައްކާ ވާހަކަތައް ސާބިތު ކޮށްދޭން ޖެހޭ ޕްލެޓްފޯމެއްގައި އެ ބޭފުޅުން އެ ވާހަކަ ނުދައްކަވަނީ ކީއްވެގެންތޯ ސުވާލު އުފެދޭ. މަޖިލީހުގެ ބޭރުގައި, އިމްތިޔާޒް ލިބިވަޑައިގަންނަވާ ތަނަކުން ބޭރުގައި, އަދި ރައްޔިތުންގެ ހިތުގައި ރުޅިވެރިކަމާއި ބައިބައިވުން އުފެއްދުމަށް ދޮގު ވާހަކަތަކެއް އެ ބޭފުޅުން ދައްކަވައިފިނަމަ ކަމާބެހޭ މުއައްސަސާތަކަށް ހުށަހަޅައިގެން އެ މައްސަލަ ބަލާނަން," މިއުވާން ވިދާޅުވި އެވެ.