ކުރީގެ ރައީސް މައުމޫން އަބްދުލްޤައްޔޫމް އިސްވެ ހުންނަވައިގެން އުފެއްދެވި ސިޔާސީ ޕާޓީ، އެމް.އާރް.އެމް އުވާލާފައިވަނީ ގަވާއިދާއި ޚިލާފަށް ކަމަށާ، އެކަން ސާބިތުކުރުމަށް މަސައްކަތް ކުރަމުންދާ ކަމަށް އެ ޕާޓީން ބުނެފި އެވެ.
އެމް.އާރް.އެމް އިން މިފަދައިން ބުނީ، އެ ޕާޓީގެ ނަމުގައި އެއްވެސް ސިޔާސީ ހަރަކާތެއް ނުހިންގުމަށް އިލެކްޝަންސް ކޮމިޝަނުން އެންގުމާއި ގުޅިގެން އެ ޕާާޓީން ނެރުނު ބަޔާނުގައިވެއެވެ.
އެ ބަޔާނުގައި އެމް.އާރް.އެމްގެ ނަމުގައި މިވަގުތު ސިޔާސީ އެއްވެސް ހަރަކާތެއް ނުހިންގުމަށް އެ ޕާޓީގެ އެންމެހާ މެންބަރުންނަށާއި، ކޮމިޓީތަކާއި، ގުނަވަންތަކާއި، ގޮފިތަކަށް ޕާޓީން ވަނީ އެދިފައެވެ.
އެއާއެކު އެމް.އާރް.އެމް އިން ބުނީ އިލެކްޝަންސް ކޮމިޝަނުން އެޕާޓީ އުވާލަން ނިންމާފައި ވަނީ ޤަވާއިދާ ޚިލާފަށް ކަމަށް ގަބޫލުކުރާ ކަމަށާ، އެކަން ސާބިތުކުރުމަށްޓަކައި ކުރަންޖެހޭ ހުރިހާ މަސައްކަތެއް ކުރަމުންގެންދާ ކަމަށްވެސް ހާމަކޮށްފައިވެއެވެ.
އަދި އެ ޕާޓީގެ މެންބަރުންނާއި ތާއީދުކުރާ ހުރިހާ ފަރާތްތައް ދެއްވަމުން ގެންދަވާ އެއްބާރުލެއްވުމަށް ޝުކުރު އަދާކޮށް އެމްއާރްއެމް އިން ވަނީ އިސްލާހީ މަސައްކަތުގައި ދެމިތިއްބެވުމަށް އެދިފައެވެ.
އެމްއާރްއެމް އުވާލަން ނިންމުމާއި ގުޅިގެން އެ ޕާޓީން އިއްޔެ ބޭއްވި ނޫސްވެރިންގެ ބައްދަލުވުމުގައި ޕާޓީގެ ރައީސް ފާރިސް މައުމޫން ވެސް ވަނީ ޕާޓީ އުވާލީ ގަވާއިދާއި ޚިލާފަށް ކަމަށް ވިދާޅުވެފައެވެ. އެގޮތުން އެ ޕާޓީ އުވާލީ، ޕާޓީއަށް ޖުމުލަ 5000 މެންބަރުން ހަމަވާ އަދަދަށް ފޯމް ހުށަހަޅާފައި ވަނިކޮށް ކަމަށްވެސް އޭނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
