ރޯޑް ޑިވަލޮޕްމެންޓް ކޯޕަރޭޝަނުން ލޯފަން މީހުންގެ ޖަމިއްޔާ ބްލައިންޑް  އެންޑް ވިޝުއަލީ އިމްޕެއާޑް ސޮސައިޓީ އޮފް މޯލްޑިވްސް އަށް ސްމާޓް ކޭން ހަދިޔާކޮށްފިއެވެ.

ގޯމޭ ރެސްޓޯރެންޓްގައި ރޭ ބޭއްވި ރަސްމިއްޔާތެއްގައި ލޯފަން މީހުންގެ ޖަމިއްޔާއަށް 150 ސްމާޓް ކޭން ހަދިޔާކޮށްދެއްވީ އާރްޑީސީގެ މާކެޓިން މެނޭޖަރު އާދަމް ޝަމްއޫން އެވެ.

މިރަސްމިއްޔާތުގައި ވަނީ ހެޔޮއެދޭ ފަރާތަކުން ދީފައިވާ 10 ކޭން ވެސް ޖަމިއްޔާއަށް ހަދިޔާކޮށްފަ އެވެ.

Advertisement

ދިގުދަނޑިކޮޅެއް ގޮތަށް ހުންނަ ސްމާޓް ކޭން އަކީ ލޯފަން މީހުން ހިނގާބިގާވެ އުޅުމަށް އިތުރު ފަސޭހަތަކެއް ގެނެސްދޭ ވަސީލަތެކެވެ.

މިދަނޑިކޮޅު ޖައްސާފައި ހުންނަ ޕޮއިންޓުން ފެށިގެން ފަސް މީޓަރުގެ ސަރަހަދެއްގެ ތެރެއަށް އެއްޗެއް ވަދެއްޖެނަމަ ވައިބްރޭޓްވެ، އެ ބޭނުންކުރާ މީހާއަށް އެކަން އަންގައިދޭނެ އެވެ. އޭގެ ސަބަބުން ލޯފަން ކުއްޖަކު އެއްޗެއްގައި އަޅައިގަނެގެން ވެއްޓުން ނުވަތަ މަގުމަތީގައި ޕާކްކޮށްފައި ނުވަތަ ދުއްވާފައިދާ އުޅަނދެއްގެ ޖެހި ލިބިދާނެ އަނިޔާއަކުން ސަލާމަތްކޮށްދެ އެވެ.

ދުނިޔޭގެ ގިނަ  ޤައުމު ތަކުގައި ލޯފަން މީހުން އެކަނި ހިނގައި އުޅުމަށް ކޭން ސްޓިކް ބޭނުން ކޮށް އުޅެއެވެ.

ބީވީއައިއެސްއެމް އިން މީގެކުރިންވެސް ވަނީ އެ ޖަމިއްޔާގެ މެންބަރުން ކޭން ހަދިޔާކޮށްފަ އެވެ.

އާރްޑީސީ އިން ހަދިޔާކުރި 150 ސްމާޓް ކޭންގެ ތެރެއިން 90 ސްމާޓް ކޭން ހަދިޔާކުރުމަށް ނިންމާފައިވަނީ ބީވީއައިއެސްއެމްގެ މެންބަރުންނަށެވެ. އަނެއް 70 ސްމާޓް ކޭން ހަދިޔާކުރާނީ ސްމާޓް ކޭން ބޭނުންވެގެން ގުޅާ މީހުންނަށެވެ.