އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި 4-1 ގެ ނަތީޖާއަކުން ޗެލްސީ ބަލިކޮށް މެންޗެސްޓާ ޔުނައިޓެޑުން ގަދަ ހަތަރެއްގެ ޖާގައެއް ކަށަވަރުކޮށްފިއެވެ.

ފުރަތަަމަ ހާފުގެ ފަސްވަނަ މިނެޓްގައި ޗެލްސީގެ ޔުކްރެއިން ފޯވާޑް މަޑްރިކަށް ވަނީ ލަނޑު ޖަހާނެ ރަގަޅު ހުސް ފުރުސަތެއް ލިބި ބޭނުން ނުކުރެވިފައެވެ. ނަމަވެސް ޖެހިގެން އައި މިނެޓުގައި ޔުނައިޓެޑަށް ލިބުނު ހިލޭ ޖެހުމެއްގައި އެޓީމުގެ ޑެންމާކް މިޑްފީލްޑަރު ކްރިސްޓިއަން އެރިކްސަން ޗެލްސީގެ ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން ބްރެޒިލްގެ މިޑްފީލްޑަރު ކަސަމީރޯ ވަނީ އެޓީމަށް ލީޑު ހޯދައިދީފައެވެ.

މެންޗެސްޓާ ޔުނައިޓެޑްގެ ލަނޑަށްފަހު މެޗުގެ ނަތީޖާ އެއްވަރުކުރުމަށް ޗެލްސީ ޖަރުމަނު ފޯވާޑް ކައި ހާވަޓްޒް އަދި އިގިރޭސި މިޑްފީލްޑަރު ކޯނޯރ ގަލަގާރ އަށް ލިބުނު ފުރުސަތުތަކުގެ ބޭނުން ނުކުރެވުނު އިރު، ފުރަތަމަ ހާފުގެ އިތުރު ވަގުތުގެ ތެރޭގައި ޔުނައިޓެޑުން ވަނީ އެޓީމުގެ ލީޑު ފުޅާކޮށްފައެވެ.

މި ލަނޑު އެޓީމަށް ކާމިޔާބުކޮށްދިނީ އެޓީމުގެ ފްރާންސް ފޯވާޑް އެންތަނީ މާޝިއަލް އެވެ. މިއީ އެޓީމުގެ އިގިރޭސި މިޑްފީލްޑަރު ޖޭޑަން ސަންޗޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން މެންޗެސްޓާ ޔުނައިޓެޑް ކުރީގައި އޮވެގެންނެވެ.

ދެވަނަ ހާފު ފެށިގެން ދެވަނަ މިނެޓުގައި ޔުނައިޓެޑުގެ ޕޯޗުގަލް މިޑްފިލްޑަރު ބުރޫނޯ ފެނާންޑޭޒް ފޮނުވާލި ބާރު ހަމަލާ ގޯލްގެ ހުރަސް ދަނޑިއަށް އަމާޒުވިއިރު، އޭގެ ފަސް މިނެޓު ފަހުން ކްރިސްޓިއަން އެރިކްސަން ފޮނުވާލި ބޯޅަ ޗެލްސީގެ ކީއްޕަރު ކެޕާ ވަނީ ހުޝިޔާރުކަމާއެކު ދިފާއުކޮށްފައެވެ.

މިމެޗުގައި މެންޗެސްޓާ ޔުނައިޓެޑުން ކާމިޔާބުކުރި ތިންވަނަ ލަނޑަކީ ދެވަނަ ހާފުގެ 73 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ބްރޫނޯ ފެނާންޑޭޒް ކާމިޔާބުކޮށްދިން ލަނޑެކެވެ. މިއީ ޗެލްސީގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއަކު ކުރި ފައުލަކާއި ގުޅިގެން ރެފްރީ ޔުނައިޓެޑަށް ދިން ޕެނަލްޓީއެކެވެ.

މެންޗެސްޓާ ޔުނައިޓެޑްގެ ހަތަރު ވަނަ ލަނޑު ދެވަނަ ހާފުގެ 78 ވަނަ މިނެޓުގައި ކާމިޔާބުކޮށްދިނީ އެޓީމުގެ އިގިރޭސި ފޯވާޑް ރަޝްފޯޑް އެވެ. އަދި 85 ވަނަ މިނެޓުގައި އެޓީމުގެ ޒުވާން ފޯވާޑް އަލްޖެންޑްރޯ ގަނާޗޯ އަށް ލިބުނު ހުސް ފުރުސަތެއް އޭނާ ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ.

މި މެޗުގައި ޗެލްސީ ކާމިޔާބުކުރި ހަމައެކަނި ލަނޑު މެޗުގެ 89 ވަނަ މިނެޓުގައި ކާމިޔާބުކޮށްދިނީ އެޓީމުގެ ޕޯޗުގަލް ފޯވާޑް ޖައާއު ފެލިކްސް އެވެ. މިއީ ޔުނައިޓެޑުގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މެންޗެސްޓާ ޔުނައިޓެޑާއި ޗެލްސީ އެންމެ ފަހުން ވާދަކުރި ފަސް މެޗުވެސް ދެޓީމު އެއްވަރުވެގެން ނިމިފައިވާ އިރު، މިއީ 2020 ވަނަ އަހަރުގެ ފެބުރުއަރީގެ ފަހުން ޗެލްސީގެ މައްޗަށް ޔުނައިޓެޑުން ކުރި ހޯދި ފުރަތަމަ ފަހަރެވެ.

މިރޭގެ މެޗުން ލިބުނު ތިން ޕޮއިންޓާއެކު 37 މެޗު ކުޅެގެން މެންޗެސްޓާ ޔުނައިޓެޑަށް 72 ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލްގެ ތިންވަނައިގައެވެ. ހަތަރުވަނައިގައި އޮތް ނިއުކާސަލްއަށް 37 މެޗު ކުޅެގެން 70 ޕޮއިންޓް ލިބިފައިވާއިރު، މި ދެޓީމަށް ވެސް ވަނީ އަންނަ ސީޒަނުގެ ޗެންޕިއަންސް ލީގުގެ ޖާގައެއް ކަށަވަރުވެފައެވެ.

މި މެޗުން ބަލިވި ޗެލްސީ 37 މެޗު ކުޅުނުއިރު، އެޓީމަށް ލިބިފައިވަނީ 43 ޕޮއިންޓާއެކު، ލީގު ތާވަލުގެ 12 ވަނަ އެވެ. އަދި މިއީ 1995 ވަނަ އަހަރުގެ ފަހުން ލީގުގައި ޗެލްސީ އިން ނެރުނު އެންމެ ދަށް ނަތީޖާއެވެ.