ޖަރުމަނު ބުންޑަސްލީގާގައި މިރޭ ރަށުން ބޭރުގައި އެފްސީ ކްލޯން އާއި ދެކޮޅަށް ކުޅުނު މެޗު 2-1 ގެ ނަތީޖާއަކުން ކާމިޔާބުކޮށް ލީގު ޗެމްޕިއަންކަން ޖެހިޖެހިގެން 11 ވަނަ ފަހަރަށް ބަޔާން މިއުނިކުން ހޯދައިފިއެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިރޭގެ މެޗުގައި ފުރަތަަމަ ލަނޑުޖަހައި ކުރިހޯދީ ބަޔާން މިއުނިކް އިންނެވެ. މި ލަނޑު ފުރަތަމަ ހާފުގެ 08 ވަނަ މިނެޓުގައި ކާމިޔާބުކޮށްދިނީ އެޓީމުގެ ކިންގްސްލީ ކޯލްމަންއެވެ. އަދި ފުރަތަަމަ ހާފު ނިމުމުގެ ކުރިން އެޓީމުގެ ޖަރުމަނު ފޯވާޑް ސަނޭ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދިނެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ ރަގަޅު ލަނޑެއް ނޫންކަމަށެވެ.

ކްލޯން އިން މެޗުގެ ނަތީޖާ އެއްވަރުކުރީ ދެވަނަ ހާފުގެ 81 ވަނަ މިނެޓުގައި އެޓީމަށް ލިބުނު ޕެނަލްޓީއަކުންނެވެ. މިލަނޑު އެޓީމަށް ކާމިޔާބުކޮށްދިނީ އޮސްޓްރިއާގެ މިޑްފީލްޑަރު ޑެޖަން ލުބިސިޗް އެވެ. ނަމަވެސް މެޗުގެ 89 ވަނަ މިނެޓުގައި ބަޔާންގެ ޖަރުމަނު މިޑްފީލްޑަރު ޖަމާލު މުސިއާލާ ވަނީ ލަނޑެއް ކާމިޔާބުކޮށް ދެވަނަ ފަހަރަށް މި މެޗުގައި އެޓީމަށް ލީޑު ހޯދައިދީފައެވެ. މިއާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ބަޔާން މިއުނިކް މޮޅުވެގެންނެވެ.

Advertisement

މި މެޗުން ލިބުނު ތިން ޕޮއިންޓާއެކު 34 މެޗުން ބަޔާން މިއުނިކަށް 71 ޕޮއިންޓް ލިބުނުއިރު، ދެވަނައިގައި އޮތް ބޮރޫޝިއާ ޑޯޓްމަންޑަށް ވެސް ވަނީ 34 މެޗުން 71 ޕޮއިންޓް ލިބިފައެވެ. ނަމަވެސް ބަޔާން މިއުނިކަށް ކުރި ލިބެނީ ފައިދާ ގޯލުގެ ތަފާތުންނެވެ. އަދި މިއީ ބުންޑަސްލީގާގެ ޗެންޕިއަންކަން ބަޔާން މިއުނިކުން ހޯދި 33 ވަނަ ފަހަރެވެ.