ސައުދީ ޕްރޮފެޝަނަލް ލީގުގެ މިރޭ ރަށުން ބޭރުގައި އަލް އިއްތިފާގު އާއި ވާދަކުރި މެޗު 1-1 ގެ ނަތީޖާއަކުން އެއްވަރުވެ، ލީގު ހޯދުމުގެ ފުރުސަތު އަލް ނަސްރަށް ގެއްލިއްޖެ އެވެ.

މިރޭގެ މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން އަލް ނަސްރުން ގިނަ ފުރުސަތުތަކެއް ތަނަވަސްކުރި ނަމަވެސް މި މެޗުގައި ފުރަތަަމަ ލަނޑުޖަހައި ކުރިހޯދީ އަލް އިއްތިފާގުން ނެވެ.

ފުރަތަަމަ ހާފުގެ 43 ވަނަ މިނެޓުގައި، މިލަނޑު އެޓީމަށް ކާމިޔާބުކޮށްދިނީ ފްރާންސްގެ ފޯވާޑް ޔޫސުފް ނިއަކެއިޓް އެވެ. މިއީ އެޓީމުގެ ސަޢީދު އަލް މޮވަލާދު ތިރިތިރިން ގޯލު ކުރިމައްޗަށް ހުރަސްކޮށްދިން ބޯޅައެއް އަލް ނަސްރުގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އަލް އިއްތިފާގު ކުރީގައި އޮވެގެންނެވެ.

ފުރަތަމަ ހާފުގައި އަލް ނަސްރުން ފޮނުވާލި ނުރައްކާތެރި ގިނަ ހަމަލާތަކެއް އަލް އިއްތިފާގު ގެ ބްރެޒިލް ކީއްޕަރު ޕައުލޯ ވިކްޓަރ ވަނީ ހުޝިޔާރުކަމާއެކު ދިފާއުކޮށްފައިވާއިރު، ފުރަތަމަ ހާފުގެ 32 ވަނަ މިނެޓުގައި އަލް ނަސްރުގެ ލުއިސް ގުސްޓާވޯ ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.

ދެވަނަ ހާފުގައި އަލް ނަސްރުން އެޓީމުގެ އެޓޭކުތަށް ވަރުގަދަކޮށް މެޗުގެ ނަތީޖާ އެއްވަރުކުރީ 56 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ ބްރެޒިލް މިޑްފީލްޑަރު ލުއިސް ގުސްޓާވޯ އެވެ. މިއީ އެޓީމުގެ ޒުވާން ފޯވާޑް އަބްދުއްރަހުމާން ގަރީބު ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މީގެއިތުރުންވެސް ދެވަނަ ހާފުގެ 74 ވަނަ މިނެޓުގައި ލުއިސް ގުސްޓާވޯ ލަނޑެއް ކާމިޔާބުކޮށް އަލް ނަސްރަށް ލީޑު ހޯދައިދިނެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. މިއާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެގެންނެވެ.

މި މެޗުން ލިބުނު އެއް ޕޮއިންޓާއެކު 29 މެޗު ކުޅެގެން އަލް ނަސްރަށް 64 ޕޮއިންޓް ލިބިފައިވާއިރު، މިރޭ ރަށުން ބޭރުގައި އަލް ފެއިހާ 3-0 ގެ ނަތީޖާއަކުން ބަލިކޮށް އަލް އިއްތިހާދުން ވަނީ ލީގު ޗެމްޕިއަންކަން ކަށަވަރުކޮށްފަ އެވެ.

ލީގުގައި ކޮންމެ ޓީމަކަށް ބާކީ އެއް މެޗު އޮއްވައި އަލް އިއްތިހާދުން ލީގު ޗެމްޕިއަންކަން ކަށަވަރުކުރި އިރު ލީގުގައި ކުޅުނު 29 މެޗުން އެޓީމަށް ވަނީ 69 ޕޮއިންޓް ލިބިފައެވެ.