މިދިޔަ 50 އަހަރު ރާއްޖޭގެ ރައްޔިތުން ގައިންތާހިރު ވެވޭނެގޮތެއް ނެތް ކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރު އަހުމަދު ސައީދު މުހައްމަދު ވިދާޅުވެއްޖެއެވެ.
ސައީދު މިހެން ވިދާޅުވީ، ބިލެއްދޫ އާ އިންޖީނުގެއާއި އޮފީސް ހުޅުވުމުގެ ރަސްމިއްޔާތުގައި ވާހަކަ ދައްކަވަމުންނެވެ.
ސައީދު ވިދާޅުވީ ރާއްޖެއަށް ތިން އިންތިހާބެއް އަންނާނެ ކަމަށާއި އެއީ ރައީސް ހޮވާ އިންތިހާބާއި، މަޖިލިސް އިންތިހާބާއި ކައުންސިލް އިންތިހާބު ކަމަށެވެ. އަދި ތިން އިންތިހާބުގައިިވެސް ރައްޔިތުންނަށް ވައުދުވާނެ ކަމަށާއި ނަމަވެސް އެ ވައުދުތައް ފުއްދާފައިވާތަން ނުފެންނަ ކަމަށެވެ.
މީގެ ކުރިން ރައީސް އިންތިހާބަށްފަހު ރަށްށަށްވެސް ނާރާ ކަމަށާއި މަޖިލިސް އިންތިހާބާއި ކައުންސިލް އިންތިހާބުގައި ހޮވުމުން، ސަރުކާރާ ގުޅިގެން މަސައްކަތް ކުރަން އެ ބޭފުޅުން ވިދާޅުވާނެ ކަމަށް ސައީދު ވިދާޅުވިއެވެ.
އެ ހުރިހާ ކަމަކަށް ބަލައި، އިހުލާސްތެރިކަމާއެކު ރައްޔިތުންނަށް ހިދުމަތް ކޮށްދޭން އައި ރައީސްއަކީ މިހާރުގެ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ކަމަށް ސައީދު ވިދާޅުވިއެވެ.
"ފާއިތުވެދިޔަ 50، 40 އަހަރު ދުވަހުގެ ތެރޭގަ ރާއްޖޭގެ ގިނަ ރައްރަށުގެ ރައްޔިތުން މިތިބީ އިންތިހާއަށް ތަކުލީފާ، ގައިން ތާހިރު ނުވެވޭނެ ގޮތް މެދުވެރިވެފަ" ސައީދު ވިދާޅުވިއެވެ.
މީގެ ކުރިން އެ ކަންކަން ފެނުނު މީހަކު، އަޑު އިވުނު މީހަކު، އަޅާލި މީހަކު ނެތް ކަމަށާއި ރައީސް ޞާލިހަށް ރައްޔިތުން ދަރަނިވެރި ވެފައި ވަނީ އެހެންވެ ކަމަށް ސައީދު ވިދާޅުވިއެވެ. އެހެންކަމުން ރައީސަށް ދެވަނަ ދައުރެއް ދިނުން ލާޒިމު ކަމަށް ސައީދު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
