2021-2022 ވަނަ އަހަރު ރ އަތޮޅު ތަޢުލީމީ މަރުކަޒުގެ މަތީ ޘާނަވީ އިން އެންމެ މޮޅު ދަރިވަރަކަށް ރ މީދޫ ދަނބުގެ، ޝަދާ މުހައްމަދު ރަމީޒު އަދި ޘާނަވީ ބައިން އެންމެ މޮޅު ދަރިވަރަކަށް، ރ. މީދޫ، ހެލެނގެލި، ޝައުފާ އަލީ ހޮވިއްޖެއެވެ.

މަތީ ޘާނަވީ ބައިން ހުރިހާ ގޮތަކުން އެންމެ މޮޅު ދަރިވަރުގެ މަގާމް ހާސިލް ކުރި ޝަދާ ވަނީ އޭ ލެވެލް އިމްތިހާނުގައި ބަޔޮލޮޖީ އިން ދުނިޔެގެ އެއްވަނާގައި ހިމެނިފައެވެ. 2019 ވަނަ އަހަރުވެސް ރ. އަތޮޅު ތައުލީމީ މަރުކަޒުގެ ޘާނަވީ ބައިން ހުރިހާ ގޮތަކުން އެންމެ މޮޅު ދަރިވަރަކަށް ހޮވިފައިވަނީ ވެސް ޝަދާ އެވެ.

މިދިޔަ އަހަރުގެ އޭ ލެވެލް އިމްތިހާނުގައި ތިން މާއްދާއިން އޭ ސްޓާ އަދި ދެ މާއްދާ އިން އޭ ފާސް ހޯދާ، އޭ ލެވެލްގެ ގައުމީ ގަދަ 10 ގެ ތިން ވަނައިގައި ޝަދާ ވަނި ހިމެނިފައެވެ.

ރޭގެ ޖަލްސާގައި 2021-2022 ވަނަ އަހަރުގެ ރ. އަތޮޅު ތައުލީމީ މަރުކަޒުގެ ހުރިހާ ގޮތަކުން އެންމެ ރަނގަޅު ގައިޑުގެ މަގާމަށްވެސް ހޮވިފައިވަނީ ޝަދާ އެވެ.

ޘާނަވީ ބައިން ހުރިހާ ގޮތަކުން އެންމެ މޮޅު ދަރިވަރުގެ މަގާމް ހޯދި ޝައުފާވަނީ މިދިޔަ އަހަރުގެ އޯ ލެވެލް އިމްތިހާނުގައި ފަސް އޭ ސްޓާ އާއި ތިން އޭ ހޯދާ، އޯ ލެވެލްގެ ޤައުމީ ގަދަ 10 ގެ ހަތަރު ވަނައިގައި ހިމެނިފައެވެ.

ރ އަތޮޅު ތަޢުލީމީ މަރުކަޒުގެ ހޯލުގައި ރޭ ބޭއްވުނު 2021-2022 ގެ އިނާމު ދިނުމުގެ ޖަލްސާގައި ދަރިވަރުންނަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ދެއްވާ ޝީލްޑާއި މިނިސްޓްރީ އޮފް އެޑިޔުކޭޝަނުން ދެއްވާ ޝީލްޑް އަދި ރ، އަތޮޅު ތައުލީމީ މަރުކަޒުންނާއި ރ. މީދޫ ކައުންސިލުން ދެއްވާ ޝީލްޑް ވަނީ އެ ދަރިވަރުންނަށް ހަވާލުކޮށްފައެވެ.

މީގެ އިތުރުން ރޭގެ ޖަލްސާ ގައި ވަނީ ސްކޫލު ނިންމާ، އިމްތިހާނުތަކުން ޑިސްޓިންކްޝަން އެވޯޑު އަދި ޓޮޕް އެޗީވާސް އެވޯޑު ހޯދި ދަރިވަރުންނަށްވެސް އިނާމު ހަވާލުކޮށްފައެވެ.

އަދި އޮނާލިސްޓެޑް އެވޯޑާއި ކުލާސް ޕްރައިޒް އަދި ސަބްޖެކްޓް ޕްރައިޒް ލިބުނު ދަރިވަރުންނަށްވެސް ރޭގެ ޖަލްސާގައި ޓްރޮފީ ދީފައިވެއެވެ.