މޯލްޑިވްސް ރިފޯމް މޫވްމެންޓް (އެމްއާރްއެމް) އުވާލުމުގެ މަސައްކަތް މަޑު ޖައްސާލުމުގެ ވަގުތީ އަމުރެއް ސިވިލް ކޯޓުން ނެރެފިއެވެ.
އެމްއާރްއެމްގައި 3000 މެމްބަރުން ހަމަނުވާކަމަށް އަންގައި އެ އަދަދަށް މީހުން ހަމަކުރަން އަންގައި، އެކަމަށް ދިން މުއްދަތު ހަމަވީއިރިވެސް އެކަން ކުރެވިފައިނުވާތީ މިދިޔަ ބުދަ ދުވަހު އިލެކްޝަންސް ކޮމިޓީއިން ވަނީ އެޕާޓީ އުވާލައިފިކަން އިއުލާނުކޮށް، އެ ޕާޓީގެ ނަމުގައި ސިޔާސި ހަރަކާތް ހިންގުންވެސް މަނާކޮށްފައެވެ.
ޕާޓީ އުވާލުމާއި ގުޅިގެން ބޭއްވި ނޫސްވެރިންގެ ބައްދަލުވުމުގައި ޕާޓިގެ އިސް ލީޑަރެއްގެ ގޮތުގައި ފެންނަ ފާރިސް މައުމޫން ވާހަކަފުޅު ދައްކަވަމުން ވިދާޅުވެފައި ވަނީ އެމައްސަލަ ކޯޓަށް ހުށައަޅުއްވާނެ ކަމަށެވެ.
އެ ޕާޓީއިން އެމައްސަލައިގައި ހުށައެޅި މައްސަލައާއި ގުޅިގެން ސިވިލް ކޯޓުން އަމުރު ނެރެފައިވަނީ، އެ ޕާޓީ އުވާލަން އީސީން ނިންމި ނިމުމަށް އަމަލުކުރަން މި ވަގުތަށް ފަސް ކުރުމަށެވެ.
ވަގުތީ އަމުރު ނެރުމަށް ބޭއްވި ޝަރީއަތުގައި އެމްއާރްއެމުން ބުނެފައި ވަނީ އެ ޕާޓީ އުވާލުމަށް އިލެކްޝަނުން ނިންމާފައި ވަނީ ޤާާނޫނުގައި ބުނާ އަދަދަށް މެންބަރުން ހަމަކޮށްފައިވަނިކޮށް ކަމަށެވެ. އަދި އެ ޕާޓީގެ ނަމުގައި ހަރަކާތް ނުހިންގުމަށް އެނގި އެންގުން ބާތިލުކުރުމަށް ވެސް އެ ޕާޓީން އެދިފައި ވެއެވެ.
މި މައްސަލާގައި ދާއިމީ ހައްލެއް ހޯދަން އީސީއާ ދެކޮޅަށް، އެމްއާރްއެމްގެ ފަރާތުން އިތުރު މައްސަލައެއް 30 ދުވަހުގެ ތެރޭގައި ކޯޓަށް ވައްދާނެ ކަމަށް، އެ ޕާޓިން ބުނެފައިވާތީ، ސިވިލް ކޯޓުން ވަގުތީ އަމުރު ނެރުނީ 30 ދުވަހުގެ މުއްދަތަށެވެ. އަދި އެ މުއްދަތުގައި މައްސަލަ ކޯޓަށް ހުށަނާޅައިފިނަމަ ވަގުތީ އަމުރު ބާތިލުވާނެ ކަމަށް ސިވިލް ކޯޓްގެ ހުކުމްގައި ވެ އެވެ.
އިލެކްޝަން ކޮމިޝަނުގެ ޣައިރު ހާޒިރުގައި ނިންމި މައްސަލައިގައި ސިވިލް ކޯޓުން، އެ ކޮމިޝަނުގެ މައްޗަށް އަމުރުކޮށްފައި ވަނީ ޝަރީއަތުން ވަކި ގޮތެއް އަންގަންދެން އެމްއާރްއެމް އުވާލުމަށް ނިންމާފައިވާ ނިންމުން ތަންފީޒު ކުރުމުގެ ގޮތުން އެއްވެސް ފިޔަވަޅެއް ނޭޅުމަށެވެ.
Advertisement
This content is created and paid for by advertisers and does not involve Voice Journalists
