ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ނޯތު މާލޭ ޒޯނުގެ ކުއާޓާ ފައިނަލުގެ ދެވަނަ މެޗުގައި މިއަދުގެ ހަވީރު ކުޑަހުރާ އާއި ހިލްޓަން ވާދަކުރި މެޗު 2-2 ގެ ނަތީޖާއަކުން އެއްވަރުވެ ޕެނަލްޓީގައި 5-7 ގެ ނަތީޖާއަކުން މޮޅުވެ މުބާރާތުގެ ސެމީ ފައިނަލުގެ ދެވަނަ ޖާގަ ކުޑަހުރާ އިން ކަށަވަރުކޮށްފިއެވެ.

ކުޑަހުރާ އިން މުބާރާތުގެ ކުއާޓާ ފައިނަލުން ޖާގަ ހޯދީ ކުޅުނު ތިން މެޗުން ވެސް މޮޅުވެ ގްރޫޕް ސީގެ އެއްވަނަ ޓީމުގެ ގޮތުގައެވެ. އަދި ހިލްޓަން އިން ކުއާޓާ ފައިނަލުގެ ޖާގައެއް ހޯދީ ގުރޫޕް ސްޓޭޖުގައި ކުޅުނު ތިން މެޗުގެ ތެރެއިިން ދެމެޗުން މޮޅުވެ ގްރޫޕްގެ ދެވަނަ ޓީމުގެ ގޮތުގައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ކުޑަހުރާ އިންނެވެ. މިލަނޑު ފުރަތަމަ ހާފުގެ 07 ވަނަ މިނެޓުގައި ކާމިޔާބުކޮށްދިނީ އެޓީމުގެ ރިޝާން އަހުމަދު ސަލީމް އެވެ. މިއީ ހިލްޓަންގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ކުޑަހުރާ ކުރީގައި އޮވެގެންނެވެ.

ދެވަނަ ހާފުގައި ކުޅުން ފަށައިގެން ތިންވަނަ މިނެޓުގައި ލަނޑެއް ކާމިޔާބުކޮށް ހިލްޓަން އިން މެޗުގެ ނަތީޖާ އެއްވަރުކުރި އެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ އަބްދުލް މުއްތަލިބު އިސްމާއިލް އެވެ. ހިލްޓަންގެ ލަނޑަށްފަހު ކުޑަހުރާއިން ގާތްގާތުގައި ރަގަޅު ހަމަލާތަކެއް ފޮނުވާލި ނަމަވެސް މި ހަމަލާތަކުގެ ހުރަހަކަށްވީ ހިލްޓަންގެ ގޯލްކީޕަރެވެ.

ހިލްޓަން އިން މެޗުގެ ލީޑު ހޯދީ ދެވަނަ ހާފުގެ 29 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ އިބްރާހިމް ރައިހާން އެވެ. މިއީ ކުޑަހުރާގެ ޕެނަލްޓީ އޭރިއާ ބޭރުން ލިބުނު ބޯޅައެއްގައި ކައިރީގައި ހުރި ކުޅުންތެރިއާ ކައިރިން ނައްޓާލުމަށް ފަހު ފޮނުވާލި ބާރު ހަމަލާއެއް ގޯލުގެ މަތީ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

ކުޑަހުރާއިން މެޗުގެ ނަތީޖާ އެއްވަރުކުރި ލަނޑު މެޗުގެ އެންމެ ފަހު މިނެޓްގައި ކާމިޔާބުކޮށްދިނީ އެޓީމުގެ މުހައްމަދު މަޒީން އެވެ. މިއީ ހިލްޓަންގެ ކުޅުންތެރިން ދެވަނަ ހާފުގައި ކުރި ހަވަނަ ފައުލާ އެކު ކުޑަހުރާއަށް ލިބުނު ދުރު ޕެނަލްޓީ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު މެޗުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމް އެއްވަރުވެގެންނެވެ.

މެޗުގެ ނަތީޖާ ނެރުމަށްޓަކައި ޖެހި ޕެނަލްޓީގައި ކުޑަހުރާ އިން ފޮނުވާލި ފަސް ޕެނަލްޓީ، އެޓީމުން ކާމިޔާބުކުރިއިރު، ހިލްޓަން އިން ޖެހި ހަތަރު ޕެނަލްޓީގެ ތެރެއިިން އެޓީމަށް ކާމިޔާބު ކުރެވުނީ ތިން ޕެނަލްޓީ އެވެ. އެޓީމުގެ އެޓީމުގެ ޒިރާރު ޝަމީމް ފޮނުވާލި ޕެނަލްޓީ ކުޑަހުރާގެ ކީއްޕަރު ވަނީ ދިފާއުކޮށްފައެވެ.