ވެރިކަން ކުރާ އެމްޑީޕީ އިން މައި ހަރުގެއެއްގެ ގޮތުގައި ބޭނުންކުރަމުން ދިޔަ މައި ހަރުގެ، އަލަށް އުފެދުނު ދަ ޑިމޮކްރަޓްސްގެ ހަރުގޭގެ ގޮތުގައި މިއަދު ހުޅުވައިފިއެވެ.

ހަވީރު އެކަމަށް ބޭއްވުނު ރަސްމިއްޔާތެއްގައި ދަ ޑިމޮކްރަޓްސް ހެދުމަށް މަސައްކަތް ކުރަމުން އަންނަ ފަރާތްތަކުން ވަނީ އެމްޑީޕީ އިން އެތަން ބޭނުން ކުރި އިރު ދަމާފައި ހުރި ޕޯސްޓަރު ތަކާއި ބެނާތައް ނެގުމުގެ މަސައްކަތް ފަށައިފައެވެ. އަދި އެމްޑިޕީގެ ކުލަ ކަމަށްވާ ރީނދޫ ކުލަ ފިލުވުމަށް ދަ ޑިމޮކްރެޓްސް ގެ ކުލަ ކަމަށްވާ މަޑު ނޫކުލަ ލާން ފަށައިފައިވެސް ވެއެވެ.

ދަ ޑިމޮކްރެޓްސް އުފެއްދުމަށް ބޭނުންވާ ޢަދަދަށް ފޯމު ފުރުމަށް ބޭނުންވާ ގޮނޑި އާއި މޭޒު އެތަނުގައި ޖަހައި އެމަސައްކަތް ވެސް ވަނީ ފަށައިފައެވެ.

Advertisement

އެމްޑީޕީ ގެ ތެރޭގައި ތިބި ރައީސް ނަޝީދަށް ތާއީދު ކުރާ މެމްބަރުން ތަކެެއް އެ ޕާޓީއިން ވަކިވެ އުފެއްދުމަށް މަސައްކަތް ކުރަމުންދާ ޕާޓީ އުދެއްދުމަށް އިލެކްޝަންސް ކޮމިޝަނުން ވަނީ ހުއްދަ ދީފައެވެ.

ހަރުގެ ހުޅުވުމަށް ބޭއްވި ރަސްމިއްޔާތަށް ހާޒިރުވި ނޫސްވެރިންނާއި ވާހަކަ ދައްކަމުން ހަރުގެ ހަދާފައި ހުރި ބިމުގެ ވެރިޔާ ޝަފިއްޔާ ބުނީ އެ ބިން މިހާރު އަމިއްލަ ވިޔަފާރިވެރިއަކަށް ކުއްޔަށް ދީފައިވާ ކަމަށެވެ. އެއީ އެ ވިޔަފާރިވެރިޔާ އެހެން ބަޔަކަށް ވެސް ކުއްޔަށް ދެވޭ ގޮތަށެވެ. ޝަފިއްޔާ ބުނީ ދަ ޑިމޮކްރެޓްސްއާ އޭނާއާ ދެމެދު އެއްވެސް އެއްބަސްވުމެއް ހަދާފައި ނުވާނެ ކަމަށެވެ.

އެހުއްދަ ލިބުމާއި އެކު އެ ޕާޓީ އިން ދަނީ ޕާޓީ ރެޖިސްޓަރ ކުރުމަށް ބޭނުންވާ 3000 ހަމަ ކުރުމަށް މަސައްކަތް ކުރަމުންނެވެ.