ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ލަދުފުޅު ނުގަނޭބާއޭ ހިތަށް އަރާވަޑައިގަންނަވާކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ސަރުކާރުގެ މަގާމުތަކަށް އެމްޑީޕީގެ ސްލޮޓްގައި އައި ބައެއް ބޭފުޅުން އެ ޕާޓީ ދޫކުރައްވައި ރައީސް ނަޝީދުގެ ފެކްޝަނުގެ ދަ ޑިމޮކްރެޓްސް އާއި ގުޅެމުންދާތީ އެ މެންބަރުން މަގާމުތަކުން ވަކި ކުރުމުގެ މަސައްކަތް ސަރުކާރުން ވަނީ ފަށާފަ އެވެ.
އެގޮތުން އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު އަހުމަދު މުޖުތަބާއާއި ޓޫރިޒަމް މިނިސްޓްރީގެ ސީނިއާ އެގްޒެކެޓިވްގެ މަގާމުގައި ހުންނެވި އެމްޑީޕީގެ އެކްޓިވިސްޓް، އަލީ ހާޝިމް (ސްމިތު) ވެސް މިއަދު ވަނީ މަގާމުން ވަކިކޮށްފައެވެ.
މުޖުތަބާ މަގާމުން ވަކިކުރުމާއި ގުޅިގެން ރައީސް ނަޝީދު ކުރެއްވި ޓްވީޓެއްގައި ވިދާޅުވީ ރައީސް ޞާލިހް މިއަދު ސަރުކާރުން ވަކި ކުރެއްވި މުޖުތަބާއަކީ މުޅި އިސްލާހީ ހަރަކާތުގެ އެންމެ ވަރުގަދަ އެއް ތަނބު ކަމަށެވެ.
"ރައީސް ސޯލިހް ލަދުފުޅު ނުގަނޭބާއޭ ހިތަށް އަރާ،" ނަޝީދު ވިދާޅުވިއެވެ.
މީގެ އިތުރުން، ސުމިތާ ބެހޭ ގޮތުން ނަޝީދު ކުރެއްވި ޓުވީޓްގައި ވަނީ، ސުމިތުގެ ގަދަ ހިތްވަރާއި މަޖާ މިޒާޖަކީ އެމްޑިޕީގެ އެންމެ ބޮޑު އެއް ރަމްޒު ކަމަށް ވިދާޅުވެފައެވެ. އަދި ސުމިތަކީ ވެސް އެހެން ޒުވާނުން ފަދައިން އަނިޔާވެރިކަމާ ދެކޮޅަށް ނުކުމެ މި ސަރުކާރު ގެނައުމަށް މަސައްކަތް ކުރި ގަދަ ޒުވާނެއް ކަމަށްވެސް ނަޝީދު ވިދާޅުވިއެވެ.
"ސުމިތުގެ ހިތްވަރު ދެން އަދި މާ ގަދަވާނެ ކަން ޔަގީން،" ނަޝީދު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
